ورتالىق كوممۋنيكاتسيالار قىزمەتى الاڭىندا دەنساۋلىق ساقتاۋ ۆيتسە-ءمينيسترى, مەملەكەتتىك باس سانيتارلىق دارىگەر ەرلان قياسوۆ ەلدەگى ەپيدەميالىق احۋال جونىندە بايانداپ, سوڭعى مالىمەتتەردەن حاباردار ەتتى. ونىڭ ايتۋىنشا, 13 قاڭتارداعى جاعداي بويىنشا كۆي-مەن اۋىرعان 164 477 ناۋقاس جانە كۆي تەرىس ناتيجەلى 46 499 ناۋقاس تىركەلدى. ناۋقاستاردىڭ 87%-ى ساۋىعىپ شىقتى. بۇگىندە اۋرۋحانالاردا – 5 732 ناۋقاس, ال رەانيماتسيادا 357 ناۋقاس جاتىر.
«قازىر تاۋەكەلى ورتاشا ايماقتا نەمەسە «سارى ايماقتا» الماتى, نۇر-سۇلتان قالالارى, سولتۇستىك قازاقستان, پاۆلودار, اتىراۋ وبلىستارى تۇر. سونداي-اق سوڭعى ايدا باتىس قازاقستان وبلىسى «جاسىل ايماقتان» «سارى ايماققا» كوشىرىلدى. قالعان وڭىرلەر – «جاسىل ايماقتا». اتىراۋ وبلىسىندا سىرقاتتانعانداردىڭ سانى ايتارلىقتاي وسكەنى بايقالادى, دالىرەك ايتقاندا, 3,7 ەسەگە ارتقان. بۇل كورسەتكىش بويىنشا الماتى وبلىسىندا 1,8 ەسەگە, قاراعاندى وبلىسىندا جانە الماتى قالاسىندا 1,5 ەسەگە, ماڭعىستاۋ وبلىسىندا 81-دەن 315 جاعدايعا دەيىن, تۇركىستان وبلىسىندا 102-دەن 256 جاعدايعا دەيىن, شىمكەنت قالاسىندا 150-دەن 195 جاعدايعا دەيىن, قىزىلوردا وبلىسىندا 48-دەن 135 جاعدايعا دەيىن اۋرۋ جۇقتىرۋدىڭ وسكەنى بايقالادى», دەدى ە.قياسوۆ.
مەملەكەتتىك باس سانيتارلىق دارىگەردىڭ قالىپتاسقان ەپيدەميالىق جاعدايدى ەسكەرە وتىرىپ, كارانتيندىك شارالاردى كۇشەيتۋ بويىنشا شارالار قابىلداۋ قاراستىرىلىپ جاتقانىن مالىمدەدى. سونىمەن قاتار اۋرۋدى سىرتتان اكەلۋ جاعدايى ازايار ەمەس. 13 قاڭتارداعى جاعداي بويىنشا مەملەكەتتىك شەكارادا 859 ادامنان كۆي انىقتالدى. زەرتحانالاردىڭ قۋاتى تاۋلىگىنە 100 مىڭعا جۋىق زەرتتەۋ جۇرگىزۋگە دەيىن ارتتى.
«قىركۇيەك ايىندا انگليانىڭ وڭتۇستىك-شىعىسىندا گەنەتيكالىق جولداعى كوپتەگەن وزگەرىستەردەن تۇراتىن ۆيرۋستىق گەنومدىق جۇيەلەۋ ارقىلى كوروناۆيرۋستىڭ جاڭا شتاممىنىڭ العاشقى جاعدايى انىقتالدى. بۇگىنگى تاڭدا ۆيرۋستىڭ بۇل ءتۇرى بىرنەشە ەلدە سونىڭ ىشىندە اۋستراليا, دانيا, يتاليا, يسلانديا, نيدەرلاندى, رەسەي جانە باسقا ەلدەردە انىقتالعان. الدىن الا مالىمەتتەر بويىنشا جاڭا شتامم ۆيرۋستىڭ باسقا نۇسقالارىنا قاراعاندا, جاس پوپۋلياتسيالار اراسىندا بەلسەندى تارالادى. بىراق بۇل قۇبىلىستى زەرتتەۋ ءالى دە جالعاسۋدا. قازاقستاندا ۆيرۋستىڭ بۇل ءتۇرى انىقتالعان جوق. ۆيرۋستىڭ اۋا ارقىلى بەرىلۋ مەحانيزمىن ەسكەرە وتىرىپ, ونى ەلىمىزگە اكەلۋ قاۋپىن جوققا شىعارۋعا بولمايدى», دەدى ۆيتسە-مينيستر.
بۇدان كەيىن ءتيىستى ۆەدومستۆو وكىلى مەكتەپتەردەگى وفلاين وقۋدىڭ جالعاسۋىنا بايلانىستى جۋرناليستەردىڭ ساۋالىنا جاۋاپ بەردى. سونىڭ ىشىندە مەكتەپ اسحانالارىنىڭ جۇمىسىنا توقتالدى. اسحانالاردى قولايلى ەپيدەميالىق ايماقتاردا ورنالاسقان جەكەلەگەن ايماقتاردا اشۋ جوسپارلانىپ جاتىر ەكەن. سونداي-اق بالالاردىڭ قاۋىپسىزدىگىن قامتاماسىز ەتۋ جانە كوروناۆيرۋس ينفەكتسياسىن جۇقتىرۋ قاۋپىن ازايتۋ ءۇشىن اسحانالاردى اشۋ الگوريتمى ەگجەي-تەگجەيلى سيپاتتالادى.
سونىمەن قاتار بريفينگتە مەديتسينالىق جانە فارماتسەۆتيكالىق باقىلاۋ كوميتەتى توراعاسىنىڭ ورىنباسارى نۇرلىبەك اسىلبەكوۆ ۆاكتسينالاۋعا دايىندىق بارىسى تۋرالى ايتىپ بەردى. ونىڭ ايتۋىنشا, جۇمىس توبى شپريتستەردى دايىنداۋ, لوگيستيكا, تاسىمالداۋ جانە ساقتاۋ ماسەلەلەرىن پىسىقتاۋدا. قازىر «سك-فارماتسيا» ۆاكتسينالاردى كوپتەپ ورنالاستىرۋعا بولاتىن 4 حاب دايىندادى. ۆاكتسينالاردى جۇرگىزۋ, ساقتاۋ جانە تاسىمالداۋ بويىنشا ادىستەمەلىك ۇسىنىمدار ازىرلەنۋدە. جوسپارلانعان كولەم بويىنشا شپريتستەر قورى دايىندالدى.
