تاۋەلسىزدىك جىلدارى جاڭا ەلوردامىز – نۇر-سۇلتان قالاسى سالىندى. تاريحي تۇركىستان قايتا تۇلەدى. ۇلى دالادا جۇزدەگەن جاڭا كاسىپورىن اشىلىپ, كەن ورىندارى يگەرىلىپ, ەكونوميكامىز دامۋدىڭ جاڭا ارناسىنا ءتۇستى. حالىقتىڭ ءال-اۋقاتى جاقسارىپ, الەۋمەتتىك سالالاردا دا تۇبەگەيلى وزگەرىستەر جۇزەگە اسىرىلدى. ءبىلىم بەرۋ, دەنساۋلىق ساقتاۋ سالالارى الەمدىك ۇردىستەرگە قاراي جەدەل دامىپ كەلەدى.
الايدا كەيبىر رەسەيلىك ساياساتكەر-سىماقتار «قازاقتا بۇرىن جەر بولماعان, جەردى وعان رەسەي سىيعا تارتقان» دەپ ءبىزدىڭ ەلدىگىمىزگە, مەملەكەتتىگىمىزگە باسقالاردىڭ كۇمان-كۇدىگىن تۋعىزىپ, جەرىمىزدىڭ تۇتاستىعىنا قاۋىپ توندىرۋدە. بۇل ءبىزدىڭ تاۋەلسىزدىگىمىزدىڭ 30 جىلدىق مەرەيتويىنا قاراي ادەيى جاسالىپ وتىرعان ارانداتۋشىلىق ەكەنىن جەر-جاھاننىڭ كوزى اشىق, كوڭىلى سارا ادامدارى ءتۇسىنىپ وتىر.
مىنە, مەرەيتويلىق جىلدىڭ باسىندا پرەزيدەنتىمىز قاسىم-جومارت توقاەۆ «Egemen Qazaqstan» گازەتىندە «تاۋەلسىزدىك بارىنەن قىمبات» دەپ اتالاتىن سالماقتى دا ساليقالى ماقالا جاريالاپ, حالقىمىزدىڭ ساناسىنداعى اۋىر ويدى سەرپىلتكەندەي بولدى. ول ءبىرىنشى كەزەكتە ء«بىز ۇلتتىق مۇددەنى اسپەن دە, تاسپەن دە قورعاۋعا دايىن بولۋىمىز قاجەت», دەپ ۇلتتىق مۇددەنى الدىڭعى كەزەككە قويا وتىرىپ, قازاق جەرىنىڭ تۇتاستىعىنا كوز الارتۋشى ارام پيعىلدى ساياساتكەرلەردىڭ سوزىنە تويتارىس بەرۋگە شاقىرادى. «قازاققا وسىناۋ ۇلان-عايىر اۋماقتى سىرتتان ەشكىم سىيعا تارتقان جوق... اۋماقتىق تۇتاستىعىمىزعا كۇمان كەلتىرىپ, تاتۋ كورشىلىك قاتىناستارعا سىنا قاققىسى كەلەتىن كەيبىر شەتەل ازاماتتارىنىڭ ارانداتۋشىلىق ءىس-ارەكەتتەرىنە رەسمي جانە قوعامدىق دەڭگەيدە تويتارىس بەرە وتىرىپ, اعارتۋشىلىق جۇمىستارىن ۇستامدىلىقپەن جۇرگىزگەن ءجون», دەگەن ق.توقاەۆ وسى ارادا قازاق تاريحىن قايتا زەردەلەپ, ەلىمىزدىڭ اكادەميالىق جاڭا تاريحىن جازۋدى دەرەۋ قولعا الۋدى تاريحشى عالىمدارىمىزعا تاپسىردى. سونداي-اق پرەزيدەنت شەتەل اۋديتورياسىنا ارنالعان قازاقستاننىڭ قىسقاشا تاريحىن جازىپ, الەمنىڭ نەگىزگى تىلدەرىنە اۋدارۋدى ۇسىندى. شىن مانىندە ۇلى دالادا قاي زاماندا قانداي مەملەكەت ورناپ, ول قانشا اۋماقتى بيلەگەنىن, سول جەرلەردە نەندەي وقيعالار بولعانىن بۇلتارتپاس دالەلدەرمەن دالەلدەپ بەرسەك ەشكىمگە ەسەمىز كەتپەس ەدى. پرەزيدەنتتىڭ, سونداي-اق التىن وردا, ۇلىق ۇلىس, ءبىزدىڭ قازىرگى ءتول تاريحىمىز ەكەنىن ايتا كەلىپ, ولار تۋرالى فيلمدەر شىعارۋدى نازارعا سالۋى وتە ورىندى. ويتكەنى رەسەيدى 300 جىل بيلەگەن التىن وردانىڭ نەگىزى بىزدە جاتقانىن بۇگىنگى جانە كەيىنگى ۇرپاق جاقسى بىلۋگە ءتيىس.
مەملەكەت باسشىسىنىڭ بيىل 100 جىل تولعالى وتىرعان 1921 جىلعى اشارشىلىق تاريحىن تەرەڭ زەرتتەۋ, جەلتوقسان كوتەرىلىسىنىڭ 35 جىلدىعىنا وراي جەلتوقسانشىلاردىڭ ەرلىگىن لايىقتى باعالاۋ, انا ءتىلىمىزدىڭ ابىروي-بەدەلىن كوتەرۋ, تالانتتى جاستاردى قولداۋ تۋرالى ۇسىنىستارىنىڭ ءبارى تاۋەلسىزدىگىمىزدى تۇعىرلى ەتۋدىڭ قامى.
قورىتا ايتقاندا, مەملەكەت باسشىسىنىڭ بۇل ماقالاسى حالقىمىزدىڭ ساناسىن وياتىپ, ويىنا وي قوسقان, رۋحىن قايتا جانداندىرىپ, جىگەرىن جاني تۇسكەن پاراساتتى وي-تولعامعا تولى وتە قۇندى دۇنيە بولدى. ونىڭ ۇلكەنگە دە, كىشىگە دە بەرەر تاعىلىمى مول. سوندىقتان ءبىز, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باسشىلىعى, پرەزيدەنت ماقالاسىن قىزمەتكەرلەر مەن ستۋدەنتتەر اراسىندا كەڭىنەن ناسيحاتتاۋ ءۇشىن ءىس-شارالار جوسپارىن جاساپ وتىرمىز. بۇل جونىندە اشىق دارىستەر, عىلىمي كونفەرەنتسيالار, دوڭگەلەك ۇستەلدەر وتكىزىلەتىن بولادى. تاريحشى عالىمدارىمىز قازاقستاننىڭ جاڭا اكادەميالىق تاريحىن جازۋعا بەلسەنە اتسالىسۋعا قۇلشىنىپ وتىر.
تاكير بالىقباەۆ,
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى
