ۇشجاقتى كەزدەسۋ جابىق ەسىك جاعدايىندا ءوتتى. ۆ.پۋتين جيىن باستالار الدىندا كوپشىلىك الدىندا ءسوز سويلەدى. رەسەي پرەزيدەنتى ازەربايجان جانە ارمەنيامەن تاتۋ كورشىلىك قارىم-قاتىناستى جاقسى باعالايتىنىن, سونداي-اق ازەربايجان مەن ارمەنيا تاراپىنىڭ رەسەيدىڭ تاۋلى قاراباقتاعى اتىستى توقتاتۋ جونىندەگى ارەكەتىنە قولداۋ كورسەتكەنىنە ريزاشىلىعىن ءبىلدىردى.
رەسەي پرەزيدەنتى 2020 جىلدىڭ قاراشاسىندا جاسالعان كەلىسىمدەر رەت-رەتىمەن جۇزەگە اسىرىلىپ جاتقانىن جانە وسى ارەكەتتىڭ تاۋلى قاراباقتاعى شيەلەنىستى ارمەنيا مەن ازەربايجان حالقىنىڭ مۇددەسىنە ساي, ءادىل رەتتەۋگە مۇمكىندىك بەرەتىنىنە توقتالدى.
كەلىسسوزدەردەن كەيىن مەملەكەتتەر باسشىلارى ورتاق مالىمدەمەگە قول قويدى. وندا تاۋلى قاراباقتاعى ينفراقۇرىلىمدىق جوبالاردى دامىتۋ ماسەلەسى قامتىلعان. اتاپ ايتقاندا, ايماقتىڭ ەكونوميكالىق جانە كولىك قاتىناسى ماسەلەسىن شەشۋ ءۇشىن جۇمىس توبى قۇرىلادى. وعان ءۇش ەلدىڭ پرەمەر-مينيسترلەرىنىڭ ورىنباسارلارى جەتەكشىلىك ەتىپ, 30 قاڭتارعا دەيىن كەزدەسۋى ءتيىس.
جيىن اياقتالعان سوڭ جۋرناليستەرگە سۇحبات بەرگەن يلحام اليەۆ كەلىسسوزدەردىڭ جەمىستى بولعانىن جەتكىزىپ, تاۋلى قاراباق ءتۇيىنى تارقاتىلىپ كەلە جاتقانىنا توقتالدى. ونىڭ ايتۋىنشا, ايماقتاعى ينفراقۇرىلىمدى جانداندىرۋ ماسەلەسى بارلىق تاراپتىڭ مۇددەسىنە ساي كەلەدى.
سونداي-اق ي.اليەۆ ازەربايجاننىڭ ناحيچەۆان اۆتونوميالى رەسپۋبليكاسىمەن تىكەلەي قاتىناس جاساۋعا مۇمكىندىك تۋعانىنا ەرەكشە ەكپىن بەردى. اليەۆتىڭ سوزىنە قاراعاندا, ارمەنيا تاراپىنا دا ازەربايجان ارقىلى رەسەي, يرانعا شىعۋىنا جول اشىلادى.
ارمەنيا پرەمەر-ءمينيسترى نيكول پاشينيان ءالى دە تالقىلايتىن ماسەلەلەردىڭ كوپ ەكەنىنە توقتالدى. ونىڭ پايىمداۋىنشا, اتىستى توقتاتۋدىڭ ءوزى زور جەتىستىك بولدى. قازىر ايماقتاعى كولىك قاتىناسىن جانداندىرۋ كۇن تارتىبىندە تۇر. ەندى تاۋلى قاراباقتىڭ مارتەبەسىن ايقىنداۋ قاجەت.
ەستەرىڭىزگە سالا كەتسەك, بىلتىرعى قىركۇيەكتە تاۋلى قاراباق ايماعىندا قاقتىعىس ءورشىدى. ازەربايجان مەن ارمەنيا جاعدايدىڭ ۋشىعۋىنا ءبىر-ءبىرىن ايىپتادى. باكۋ مەن ەرەۆان ارا اعايىن ەلدەردىڭ كومەگىمەن بىرنەشە رەت اتىستى توقتاتۋ تۋرالى كەلىسىمگە كەلگەن. بىراق كوپ ۇزاماي قاقتىعىس قايتا جالعاستى.
اقىرى رەسەيدىڭ اراعا تۇسۋىمەن ارمەنيا مەن ازەربايجان سوعىستى توقتاتۋ جونىندەگى كەلىسىمگە كەلدى. ءسويتىپ 10 قاراشادا 44 كۇنگە سوزىلعان قاقتىعىستىڭ نۇكتەسى قويىلدى.
كەلىسىمگە سايكەس, ازەربايجان سوعىس كەزىندە ازات ەتكەن تاۋلى قاراباقتىڭ ءبىر بولىگىن جانە ارمەنيا باسىپ العان 7 اۋداندى وزىنە قايتاردى. ارمەنيا اۋماعىنان ازەربايجاننىڭ نەگىزگى تەرريتورياسىن ناحيچەۆان اۋماعىمەن جالعايتىن ءدالىز بەرىلدى. سونىمەن قاتار تاۋلى قاراباقتى ارمەنيامەن بايلانىستىراتىن ءدالىز قۇرىلدى.
