بۇدان بىلاي قازاقستاندىقتار Halyk Bank ءموبيلدى قوسىمشاسىندا ىسكە اسىرىلعان جاڭا سەرۆيستىڭ كومەگىمەن ۇيدەن شىقپاي-اق جەكە كاسىپكەرلىكتى تىركەي الادى. وسىعان دەيىن بۇل حابارلامانى www.egov.kz ەلەكتروندىق ۇكىمەت پورتالىندا, سونداي-اق Kaspi.kz قوسىمشاسىندا جىبەرۋ مۇمكىندىگى بولعان.
حابارلامانى Halyk Bank قوسىمشاسىندا بىرنەشە باتىرمالاردى باسۋ ارقىلى جىبەرۋگە بولادى. ول «جك بولۋ» سىلتەمەسى بويىنشا وتسە جەتكىلىكتى. ودان كەيىن جۇيە الداعى قادامداردى ۇسىنادى. سونداي-اق جك اشۋدىڭ بارلىق پروتسەسى 5 مينۋتتان اسپايدى.
ەسكەرە كەتەتىن جايت, نىساندى تولتىرۋ كەزىندە جەكە تۇلعا قىزمەتتى جۇزەگە اسىرۋدى جوسپارلاپ وتىرعان وبلىستىڭ مەملەكەتتىك كىرىستەر ورگانىنىڭ كودىن, جەكە كاسىپكەردىڭ اتاۋىن, مەكەن-جايىن, جۇزەگە اسىرىلاتىن قىزمەت ءتۇرىن, سونداي-اق سالىق سالۋ رەجيمىن تاڭداۋى كەرەك.
حابارلاماعا جەكە تۇلعانىڭ ەلەكتروندى تسيفرلىق قولتانباسىمەن قول قويۋ كەرەك.
كەلەسى كۇنى جەكە كاسىپكەر رەتىندە تىركەۋدى مەملەكەتتىك كىرىستەر كوميتەتىنىڭ www.kgd.gov.kz سايتىندا تەكسەرۋگە بولادى.
