مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ XXVIII سەسسياسىنا قاتىسىپ, قحا اتىنان ماجىلىسكە سايلاناتىن دەپۋتاتتارعا داۋىس بەردى.
سونداي-اق تۇڭعىش پرەزيدەنت – ەلباسى نۇرسۇلتان نازارباەۆ داۋىس بەرۋ راسىمىنە قاتىستى. سودان كەيىن ەلباسى اسسامبلەيانىڭ ماڭىزى تۋرالى اڭگىمەلەپ بەردى. تۇڭعىش پرەزيدەنت بۇكىلحالىقتىق سايلاۋ وتكىزىلىپ, تۇتاس حالىق رەتىندە ەلدىڭ بولاشاعىنا داۋىس بەرگەنىن اتاپ ءوتتى.
«بۇل الداعى بەسجىلدىق باعدارلامامىزدى بەكىتكەن ۇلكەن سايلاۋ بولدى. بۇل سايلاۋدا Nur Otan پارتياسى تاعى دا ۇلكەن جەڭىسكە جەتىپ, حالىقتىڭ سەنىمىنە بولەندى. سوندىقتان الدىمىزدا اۋقىمدى جۇمىستار تۇر. بۇگىن كونستيتۋتسيامىز بويىنشا قازاقستان حالقى اسسامبلەياسىنان سايلاناتىن 9 كانديداتقا داۋىس بەردىك. اسسامبلەيامىز 25 جىلدان بەرى ەلىمىزدەگى ەتنوستار مەن دىندەردى ءبىر-بىرىنە جاقىنداستىراتىن, توزىمدىلىككە تاربيەلەيتىن, بىرلىكتى ناسيحاتتايتىن, ەلىمىزدى العا جەتەلەيتىن بىرەگەي ورگانعا اينالىپ كەلە جاتىر», دەدى ەلباسى.
وسى ورايدا ن.نازارباەۆ باسقا ەلدەر قازاقستان تاجىريبەسىن ۇيرەنىپ جاتقانىن اتاپ ءوتتى. سوندىقتان اسسامبلەيادان سايلانعان دەپۋتاتتار ەلدىڭ بىرلىگىن ساقتاپ, قازاق حالقىنىڭ توڭىرەگىندە بارلىق ادامدى بىرىكتىرۋگە ءوز ۇلەسىن قوسادى.
بۇدان بولەك, سەنات توراعاسى ماۋلەن اشىمباەۆ, ءماجىلىس توراعاسى نۇرلان نىعماتۋلين, ۇكىمەت باسشىسى اسقار مامين, پرەمەر-ءمينيستردىڭ ورىنباسارى ەرالى توعجانوۆ, سونداي-اق ءتۇرلى ۆەدومستۆو باسشىلارى داۋىس بەردى.
قازاقستان حالقى اسسامبلەياسىنىڭ XXVIII سەسسياسىنىڭ اشىلۋ راسىمىندە قحا توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ ءسوز سويلەپ, جيىننىڭ ماڭىزىنا توقتالدى.
«وزدەرىڭىز بىلەتىندەي, 2007 جىلى كونستيتۋتسيالىق رەفورما ناتيجەسىندە قابىلدانعان اتا زاڭعا قازاقستان حالقى اسسامبلەياسىنان پارلامەنت ماجىلىسىنە 9 دەپۋتات سايلاۋ قۇقىعى بەرىلگەن وزگەرىستەر مەن تولىقتىرۋلار ەنگىزىلگەن بولاتىن. بۇل قادام ءبىزدىڭ قوعامنىڭ بىرلىگىن نىعايتۋعا, ەتنوستار مۇددەلەرىن بىلدىرۋگە, ولاردىڭ ەلىمىزدىڭ قوعامدىق-ساياسي ومىرىنە قاتىسۋىن جانداندىرۋعا باعىتتالعان ەدى. وسى نورما بىرىككەن ۇلتتار ۇيىمىنىڭ, ەۋروپاداعى قاۋىپسىزدىك پەن ىنتىماقتاستىق ۇيىمىنىڭ جانە باسقا دا حالىقارالىق ۇيىمداردىڭ حالىقارالىق پاكتىلەر مەن كونۆەنتسيالارى اياسىندا قازاقستاننىڭ ادام قۇندىلىقتارى, ازاماتتىق جانە ساياسي قۇقىقتار جونىندەگى حالىقارالىق مىندەتتەمەلەرىن ورىنداۋ ۇدەسىنە جاتادى», دەدى ج.تۇيمەباەۆ.
وسى ورايدا ول بۇگىن پارلامەنت ماجىلىسىنە قازاقستان حالقى اسسامبلەياسى سايلايتىن دەپۋتاتتار انىقتالاتىنىن اتاپ ءوتتى.
«اسسامبلەيانىڭ 9 دەپۋتاتى قازاقستاننىڭ بارلىق ەتنوستارىنىڭ, بۇكىل حالىقتىڭ مۇددەسىن بىلدىرەدى. قحا-نىڭ دەپۋتاتتىق توبى ەلدىڭ تاتۋلىعى مەن بىرلىگىن نىعايتۋ ماسەلەلەرى بويىنشا پارتياارالىق ىنتىماقتاستىقتىڭ پارلامەنتتىك تەتىگى ءرولىن اتقارادى. «سايلاۋ تۋرالى» كونستيتۋتسيالىق زاڭعا سايكەس, اسسامبلەيا سايلايتىن پارلامەنت ءماجىلىسىنىڭ دەپۋتاتتىعىنا كانديداتتار ۇسىنۋ اسسامبلەيا كەڭەسىنىڭ وكىلەتتىگىنە جاتادى. 2020 جىلعى 11 جەلتوقساندا اسسامبلەيا كەڭەسىنىڭ وتىرىسىندا پارلامەنت ءماجىلىسىنىڭ دەپۋتاتتىعىنا قازاقستان حالقى اسسامبلەياسى سايلايتىن كانديداتتار ۇسىنىلدى», دەدى ج.تۇيمەباەۆ.
ونىڭ ايتۋىنشا, اسسامبلەيا كەڭەسى كانديداتتار ءتىزىمىن جاساۋ بارىسىندا بىرقاتار ماڭىزدى كريتەريلەردى ەسكەردى. اتاپ ايتقاندا, دەپۋتاتتىق كورپۋستىڭ ساباقتاستىعى, ايماقتىق قامتۋ, گەندەرلىك تەڭدىكتىڭ قامتىلۋى, جاستاردى تارتۋ, ەتنيكالىق توپتاردىڭ ەسكەرىلۋى, دەپۋتاتتىق كورپۋستا ەكى مەرزىمنەن ارتىق سايلانباۋىنا ماڭىز بەرىلگەن. كەڭەس قاراۋىنىڭ قورىتىندىسى بويىنشا پارلامەنت ماجىلىسىنە دەپۋتاتتىققا اسسامبلەيا سايلايتىن كانديداتتار ۇسىنۋ تۋرالى شەشىم قابىلدانىپ, ولار سايلاۋ بيۋللەتەنىنە ەنگىزىلدى.
قازاقستان حالقى اسسامبلەياسىنان ۇسىنىلعان پارلامەنت ءماجىلىسى دەپۋتاتىنا كانديداتتاردى سايلاۋ اياقتالعان سوڭ, نۇر-سۇلتان قالالىق سايلاۋ كوميسسياسى داۋىس بەرۋ ناتيجەسىن جاريالادى.
داۋىس بەرۋگە قاتىسقان قحا مۇشەلەرىنىڭ جالپى سانى – 351 ادام. ءماجىلىس دەپۋتاتتىعىنا كانديداتتار ءۇشىن بەرىلگەن بيۋللەتەندەر: ساۋىتبەك ابدراحمانوۆ – 298, اۆەتيك اميرحانيان – 270, يلياس بۋلاروۆ – 274, ناتاليا دەمەنتەۆا – 292, يۋري لي – 282, ۆاكيل نابيەۆ – 285, شاميل وسين – 271, ۆلاديمير توحتاسۋنوۆ – 277, ابيلفاس حامەدوۆ 290 داۋىسقا يە بولدى.
داۋىس بەرۋ ناتيجەسىندە قحا-نىڭ 9 كانديداتى پارلامەنت ماجىلىسىنە ءوتتى. قازاقستان حالقى اسسامبلەياسىنان سايلاناتىن پارلامەنت ءماجىلىسى دەپۋتاتتارىن سايلاۋ قورىتىندىلارىن ورتالىق سايلاۋ كوميسسياسى شىعارادى.
