پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە ءونىم بەرۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق تسيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وتق-نى جەتكىزۋ نەمەسە وزدىگىنەن الىپ كەتۋ ارقىلى الۋعا بولادى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق, سۋردوتەحنيكالىق, تيفلوتەحنيكالىق جانە گيگيەنالىق قۇرالداردى, سونداي-اق كرەسلو-اربالار بەرۋدى قامتيدى.
2020 جىلى پورتال ارقىلى وتق-نىڭ 24 ءتۇرىن ساتىپ الۋ مۇمكىندىگى بەرىلدى. ونى 16,3 مىڭنان استام ادام پايدالاندى, ولارعا 28,8 مىڭ وڭالتۋدىڭ تەحنيكالىق قۇرالدارى بەرىلدى.
قازىرگى ۋاقىتتا تىزبە وتق-نىڭ 67 ءتۇرىن قامتيدى, ول ودان ءارى كەڭەيتىلەتىن بولادى.
«پورتال ىسكە قوسىلعان كەزدە تاۋاردى الۋ الدەقايدا وڭاي جانە جىلدام بولدى, سونىمەن قاتار ءبىز ونى جولدا باقىلاي الامىز. ەندى تاپسىرىس بۇرىنعىعا قاراعاندا تەزىرەك كەلەتىنىن اتاپ وتكىم كەلەدى. قازىر جەتكىزۋ مەرزىمى 2 اپتاعا دەيىن قىسقارتىلدى. بۇل وتە قۋانتادى. ال حالىقتى جۇمىسپەن قامتۋ ورتالىعىنىڭ قىزمەتكەرلەرى بارلىعىن ءتۇسىندىرىپ, پورتالداعى وتق-عا ءوتىنىش بەرۋگە كومەكتەستى», – دەپ اتاپ ءوتتى قىزىلوردا وبلىسىنىڭ تۇرعىنى, I توپ مۇگەدەگى الەكساندر گۋندارەۆ.
2020 جىلعى قازان ايىندا پيلوتتىق رەجيمدە تاپسىرىس بويىنشا جەكە كومەكشىلەر مەن ىمداۋ ءتىلى ماماندارىنىڭ قىزمەتتەرى پورتالى ارقىلى, سونداي-اق ساناتوري-كۋرورتتىق ەم الۋ ءۇشىن ۇيىمدى تاڭداۋ بويىنشا فۋنكتسيونال ىسكە قوسىلدى.
2020 جىلى جەكە كومەكشىنىڭ قىزمەتىنە 172 تاپسىرىس, ىمداۋ ءتىلى مامانىنىڭ قىزمەتىنە 157 جانە ساناتوري-كۋرورتتىق ەمدەلۋگە 210 تاپسىرىس جۇزەگە اسىرىلدى.
بۇدان باسقا, پورتالدا پيلوتتىق رەجيمدە اتاۋلى الەۋمەتتىك كومەك الۋشىلارعا مەملەكەتتىك الەۋمەتتىك توپتاما بەرۋ بويىنشا فۋنكتسيونال ىسكە قوسىلدى. جىل قورىتىندىسى بويىنشا 19,6 مىڭ ادام 40 مىڭنان استام الەۋمەتتىك توپتاما الدى.
مينيسترلىك ءونىم بەرۋشىلەر سانىن ارتتىرۋ بويىنشا بەلسەندى جۇمىس جۇرگىزۋدە. 2020 جىلدىڭ قورىتىندىسى بويىنشا پورتالدا 7,6 مىڭنان استام وڭالتۋ قۇرالدارى مەن قىزمەتتەرىن جەتكىزۋشىلەر تىركەلگەن, اتاپ ايتقاندا: ارناۋلى الەۋمەتتىك قىزمەتتەر كورسەتەتىن 828 مەديتسينالىق-الەۋمەتتىك مەكەمە, وتق بويىنشا 25 ءونىم بەرۋشى, جەكە كومەكشىنىڭ 6456 قىزمەتى, 156 ىمداۋ ءتىلى, 41 ساناتوري-كۋرورتتىق ەمدەۋ, 112 – الەۋمەتتىك توپتاما.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە كوزدەلگەن.
پورتالدى پايدالانۋ بويىنشا كەڭەستى call-ورتالىقتان 1411 ءنومىرى بويىنشا الۋعا بولادى.
