سايلاۋ كۇنى قاراعاندى وبلىسىندا تمد پارلامەنتارالىق اسسامبلەياسى اتىنان حالىقارالىق بايقاۋشىلار توبى جۇمىس ىستەدى. ولار تاڭ اتىسىمەن كەنشىلەر استاناسىندا جانە وبلىستىڭ باسقا قالالارىنداعى سايلاۋ ۋچاسكەلەرىنە بارىپ, ساياسي ءىس-شارانىڭ بارىسىن قاداعالادى.
بايقاۋشىلاردىڭ ءبىرى, كۋزباسس پارلامەنتىنىڭ دەپۋتاتى, كەمەروۆو مەملەكەتتىك ۋنيۆەرسيتەتىندەگى وتان تاريحى كافەدراسىنىڭ مەڭگەرۋشىسى الەكسەي زەلەنين سايلاۋ بارىسى تۋرالى ايتقاندا ساياسي ناۋقاننىڭ جوعارى دەڭگەيدە وتكەنىن اتاپ ءوتتى.
– قاراعاندى وبلىسىندا جۇمىس ىستەگەن دەلەگاتسيامىزدىڭ قۇرامىندا التى ادام بولدى. وبلىس ورتالىعىنداعى بىرنەشە سايلاۋ ۋچاسكەسىندە, سونداي-اق باسقا قالالاردا دا بولدىق. سايلاۋدىڭ قازاقستان رەسپۋبليكاسىنىڭ زاڭناماسى ساقتالا وتىرىلىپ, قالىپتى جاعدايدا وتكەنىنە كۋا بولدىق. سايلاۋشىلاردىڭ ءوز تاڭداۋلارىن ەرىكتى تۇردە جاساۋىنا ەشقانداي كەدەرگى بولمادى. ەڭ باستىسى, ەپيدەميالىق قاۋىپسىزدىك شارالارى ساقتالىپ, بارلىق ۋچاسكەلەر جەكە قورعانىس قۇرالدارىمەن قامتاماسىز ەتىلدى, – دەپ اتاپ ءوتتى رەسەيلىك بايقاۋشى.
قاراعاندى ەكونوميكالىق ۋنيۆەرسيتەتىندە ورنالاسقان №66 سايلاۋ ۋچاسكەسىنىڭ باسشىسى سايران ۇلاقوۆ العاشقىلاردىڭ ءبىرى بولىپ 85 جاستاعى اقساقالدىڭ داۋىس بەرگەنىن ايتتى.
– ءبىزدىڭ ۋچاسكەدە 80 جاستان اسقان 90-عا جۋىق ادام بار. ولاردىڭ بارىنە الدىن الا تەلەفون سوعىپ, حابار بەردىك. قاريالاردىڭ كوبى ءوز اياعىمەن كەلىپ, داۋىس بەردى. جاعدايلارى كەلمەگەندەرىنە ارنايى ماماندار بارىپ, ولار ۇيلەرىندە ءوز تاڭداۋلارىن جاسادى. ارينە, پاندەميا ءوز دەگەنىن ىستەدى. ەڭ باستىسى, سايلاۋ ۋچاسكەسىندە سانيتارلىق ءىس-شارالار قاتاڭ ساقتالدى. داۋىس بەرۋ زالىندا ىلعالدى تازالاۋ, كۆارتستاۋ, جەلدەتۋ جۇمىستارىن جۇرگىزدىك. سونداي-اق ۋچاسكەدە ەرىكتىلەر كەزەكشىلىك ەتتى. ولار كەلۋشىلەرگە ەرەجەلەردى ءتۇسىندىرىپ وتىردى جانە مۇمكىندىگى شەكتەۋلى ادامدارعا كومەكتەستى, – دەدى ول.
ورتالىق سايلاۋ كوميسسياسىنىڭ دەرەگىنە سەنسەك, قاراعاندى وبلىسى بويىنشا تۇسكە دەيىن سايلاۋشىلاردىڭ 33,5 پايىزى ۋچاسكەلەرگە كەلىپ, ءوز تاڭداۋلارىن جاساعان ەكەن. تۇستەن كەيىن دە ءوڭىر تۇرعىندارى بەلسەندىلىك تانىتىپ, ساياسي ناۋقاننىڭ ۇيىمشىلدىقپەن وتۋىنە ءوز ۇلەستەرىن قوستى.
قاراعاندى وبلىسى
