10 قاڭتار كۇنى سايلاۋ ۋچاسكەلەرىنەن شىعا بەرىستە ازاماتتارعا ساۋالداما – Exit poll جۇرگىزگەن «قوعامدىق پىكىر» عىلىمي-زەرتتەۋ ينستيتۋتىنىڭ ديرەكتورى اينۇر ءماجيتوۆانىڭ حابارلاۋىنشا, Nur Otan-نان كەيىنگى ورىن «اق جول» دەموكراتيالىق پارتياسىنا بۇيىرعان. اتالعان پارتياعا سايلاۋشىلاردىڭ 10,18 پايىزى داۋىس بەرگەن. ءۇشىنشى ورىنعا سايلاۋشىلاردىڭ 9,03 پايىز داۋىسىنا يە بولعان «قازاقستان حالىق پارتياسى» جايعاستى. سونىمەن قاتار سايلاۋشىلاردىڭ 5,75 پايىزى «اۋىل» حالىقتىق-دەموكراتيالىق پاتريوتتىق پارتياسىن, ال 3,07 پايىزى ADAL پارتياسىن تاڭداعان.
– ينستيتۋتتىڭ ينتەرۆيۋەرلەرى 600 سايلاۋ ۋچاسكەسىندە ساۋالناما وتكىزدى. ونىڭ 316-سى – قالادا, 284-ءى اۋىلدا ورنالاسقان. ساۋالداما نۇر-سۇلتان, الماتى, شىمكەنت قالالارىن, بارلىق وبلىس ورتالىقتارىن, اۋداندىق ماڭىزى بار قالالاردى, شاعىن قالالار جانە اۋىلدىق ەلدى مەكەندەردى قامتىدى. كۇنى بويى ساۋالدامانىڭ ءتورت تولقىنى وتكىزىلدى. ناتيجەسىندە, 24 مىڭ سايلاۋشى قامتىلدى. ساۋالدامانىڭ 2 پايىزىنان قاتەلىك كەتتى. جالپى, بۇل جۇمىسقا 600-دەن استام ينتەرۆيۋەر اتسالىستى, – دەپ حابارلادى اينۇر ءماجيتوۆا ورتالىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا, Exit poll zakon.kz اقپاراتتىق پورتالىنىڭ تاپسىرىسى بويىنشا جۇرگىزىلگەن. قازاقستان رەسپۋبليكاسىنىڭ «سايلاۋ تۋرالى» زاڭىنىڭ 28-بابىنا سايكەس «قوعامدىق پىكىر» ينستيتۋتى سايلاۋالدى الەۋمەتتىك ساۋالداما جانە Exit poll-دى جۇرگىزۋ نيەتى تۋرالى ورتالىق سايلاۋ كوميسسياسىن حاباردار ەتكەن.
– سايلاۋشىلارعا ساۋالداما Exit poll-دىڭ حالىقارالىق ادىستەمەسى بويىنشا جۇرگىزىلدى. رەسپوندەنتتەرگە «قازاقستان رەسپۋبليكاسىنىڭ پارلامەنتتىك سايلاۋىندا قاي پارتياعا داۋىس بەردىڭىز؟» دەگەن ءبىر عانا سۇراق قويىلدى, – دەپ ناقتىلادى اينۇر ءماجيتوۆا.
