قازىر بۇكىل الەم قاۋىمداستىعى COVID-19 پاندەمياسىمەن كۇرەس جۇرگىزىپ كەلدى. SARS-CoV-2 كوروناۆيرۋسىنىڭ تارالۋى باستالعاننان بەرى الەمدە 87 ميلليوننان استام ادام ىندەتتى جۇقتىردى. شامامەن 1,9 ميلليون ادام قايتىس بولدى, 63 ميلليوننان استامى ساۋىعىپ شىقتى.
اۆستراليا كوروناۆيرۋسقا قارسى ۆاكتسينالاۋدى ەرتەرەك باستاۋعا نيەتتى – ناۋقان ناۋرىز ايىنان, اقپان ايىنىڭ ءبىرىنشى جارتىسىنا اۋىستىرىلدى. پاندەميا باستالعالى ەلدە 28 543 ادام ىندەتتى جۇقتىرعانى راستالدى, 909 ادام قايتىس بولىپ, 25 806-سى جازىلدى.
ماتەريكتىك قىتايدا COVID-19 جۇقتىرۋدىڭ جاڭادان 63 جاعدايى انىقتالدى. ونىڭ 11-ءى شەتەلدەن كەلگەندەردەن انىقتالسا, تاعى 52-ءسى حەبەي مەن لياونين پروۆينتسيالارىنا تيەسىلى. گەرمانيا پەدياترلارى بالالار مەن جاسوسپىرىمدەردى ۆاكتسيناتسيالاۋدى تەزىرەك باستاۋعا شاقىرۋدا.
بۇل, مەكتەپتەر مەن بالاباقشالاردىڭ قالىپتى جۇمىسىن قايتا باستاۋعا مۇمكىندىك بەرەدى. فەدەرالدى پەدياترلار قاۋىمداستىعىنىڭ باسشىسى توماس فيشباح «بالالارعا ارنالعان ارنايى ۆاكتسينانى مۇمكىندىگىنشە تەزىرەك جاساپ, سەرتيفيكاتتاۋدان وتكىزۋ قاجەت», دەپ اتاپ ءوتتى.
سونىمەن قاتار گەرمانيانىڭ ەكى ءىرى فارماتسەۆتيكالىق كومپانياسى جاقىن ارادا كوروناۆيرۋسقا قارسى ۆاكتسينانى بىرلەسىپ شىعارۋعا نيەتتى. اليانس حالىق اراسىندا ەكپە ەگۋ ءۇردىسىن جەدەلدەتۋ ءۇشىن جانە گەرمانيانىڭ بارلىق تۇرعىندارىن جاز مەزگىلىنە دەيىن ەكپەمەن قامتۋ ماقساتىندا قۇرىلعان.
