پرەزيدەنت قاسىم-جومارت توقاەۆتىڭ ماقالاسى ەلىم, جۇرتىم دەگەن جۇرتتىڭ كوڭىلىنەن شىقتى دەپ ويلايمىن. جاڭا جىلدىق قۇتتىقتاۋىندا مەملەكەت باسشىسى "ەلىمىزدى اسپەن دە, تاسپەن دە قورعايمىز", دەگەن بولاتىن.
قازاق قازاقتىڭ اتامەكەنىندە وتىر! ءبىز ەشكىمنەن جەردى سىيعا العان جوقپىز! دالەل جەتكىلىكتى.
«بابالاردان مۇرا بولعان قاسيەتتى جەرىمىز – ەڭ باستى بايلىعىمىز. قازاققا وسىناۋ ۇلان-عايىر اۋماقتى سىرتتان ەشكىم سىيعا تارتقان جوق. بۇگىنگى تاريحىمىز 1991 جىلمەن نەمەسە 1936 جىلمەن ولشەنبەيدى», دەدى مەملەكەت باسشىسى قاسىم-جومارت توقاەۆ.
باتىل بايلام! ۇققان ادامعا – اتالى ءسوز! ءبىزدىڭ وسى ۋاقىتقا دەيىن ءبىر ولقى تۇسىمىز – قازاقستان تاريحىن تۇتاس قامتىپ جازا الماعانىمىز. پرەزيدەنت وسى ماسەلەنى دە تاپ باسىپ ايتىپتى.
«قازاقستاننىڭ اكادەميالىق ۇلگىدەگى جاڭا تاريحىن جازۋدى دەرەۋ باستاۋ كەرەك. بۇل ىسكە بەدەلدى تاريحشىلارىمىزدى تارتۋ قاجەت. سونىمەن قاتار, شەتەل اۋديتورياسىنا ارنالعان قازاقستاننىڭ قىسقاشا تاريحىن جازىپ, الەمنىڭ نەگىزگى تىلدەرىنە اۋدارۋدى ۇسىنامىن. بۇل – قازاقتىڭ سان عاسىرلىق شىنايى تاريحىن الەمگە تانىتۋدىڭ بىردەن-ءبىر جولى», دەپ جازادى پرەزيدەنت.
وسى رەتتە وتە بىلىكتى جاس تاريحشىلاردى الەمنىڭ ءار شالعايىنا اتتاندىرىپ, ارنايى قازاق تاريحىن زەرتتەۋ مەن زەردەلەۋ ىسىنە كوڭىل ءبولۋ كەرەك. اسىرەسە اعىلشىن, اراب, قىتاي, ءۇندى, پارسى جانە ەۋروپا ەلدەرىنىڭ ءتىلىن جاقسى بىلەتىن جاستاردان ماقساتتى توپ قۇرىپ, شەتەل ارحيۆتەرىن ۇڭگىپ زەرتتەۋ كەرەك.
تاريحىمىزدى دۇرىستاپ الۋ – مەملەكەتتىك ماسەلە. ۇلتتىق سانا تاريحى سانانى جاڭعىرتۋدان باستاۋ الادى. وسىنى ەسكەرۋ كەرەك!
وسى رەتتە تاريحي فيلمدەر ءتۇسىرۋ ارقىلى ۇلتتىڭ جادىن جاڭعىرتۋعا جول اشىلادى. ۇلتىمىز تالاي «تار جول, تايعاق كەشۋدەن» ءوتتى. قازاقتىڭ كورمەگەن قيىندىعى, تارتپاعان تاقسىرەتى جوق. مەملەكەت باسشىسى قىرعىزدىڭ «قۇرمانجان داتقا» ءفيلمى تۋرالى تەككە ايتىپ وتىرماعان بولار. پرەزيدەنت ەلدىك پەن مەملەكەتتىلىكتى ساناعا ءسىڭىرۋ ءۇشىن بىزگە تاريحي فيلمدەردىڭ قاجەت ەكەندىگىن ايتتى. تاريحي تاقىرىپقا ارناپ تۇسىرىلگەن التى-جەتى-اق فيلم قاي جىرتىققا جاماۋ بولادى؟ پرەزيدەنت تاپسىرماسىنا سايكەس, مەملەكەتتىك تاپسىرىستىڭ بەلگىلى ءبىر بولىگى مىندەتتى تۇردە تاريحي تاقىرىپتارعا باعىتتالاتىن بولادى. بۇل – وتە جاقسى ۇسىنىس!
ءتىل – تاۋەلسىزدىك تۇعىرى! مەملەكەتتىك ءتىل – تاۋەلسىزدىكتىڭ ءبىر اتريبۋتى! وسىنى ەسكەرگەن پرەزيدەنت بارشا قازاقستاندىقتارعا, ونىڭ ىشىندە قازاق ءتىلىن ءالى جەتە مەڭگەرمەگەن وتانداستارعا ۇندەۋ تاستادى.
«جاستار اعىلشىن ءتىلىن نەمەسە باسقا دا تىلدەردى از عانا ۋاقىتتا مەڭگەرە الاتىنىن كورىپ وتىرمىز. تۇتاس بۋىن الماسقان وسى جىلداردا قازاق ءتىلىن ۇيرەنگىسى كەلگەن ادام ونى الدەقاشان ءبىلىپ شىعار ەدى», دەدى پرەزيدەنت.
بيىل تاۋەلسىزدىگىمىزدىڭ 30 جىلدىعى.
بىلايشا الساق, از ۋاقىت ەمەس. ءوزىمىزدىڭ ءالسىز تۇستارىمىزدى ءوزىمىز بىلەمىز. تەزىرەك ولقىنىڭ ورنىن تولتىرماق كەرەك.
تاۋەلسىزدىك – ۇلتتىڭ باعى! قازاق ءۇشىن بارىنەن قىمبات ۇعىم! پرەزيدەنتتىڭ ماقالاسىندا ەلدىك مۇرات انىق ايقىندالعان. نازار اۋداراتىن, ءمان بەرەتىن مەملەكەتتىك ماسەلەلەر بارشىلىق.
قازاقستاننىڭ تۇڭعىش پرەزيدەنتى – ەلباسى «تاۋەلسىزدىكتى جىل ساناپ, اي ساناپ, اپتا ساناپ, كۇن ساناپ, ساعات ساناپ شەگەلەي بەرۋ كەرەك» دەگەن ەدى ءبىر سۇحباتىندا.
بىزگە تەگەۋرىندى ءىس كەرەك. تالاپ كەرەك. تاعات كەرەك. ماقالادان ويعا تۇيگەن نارسە كوپ.
ەستى ازاماتتار ەلدىكتىڭ جولىندا ەلدىڭ ارباسىن العا قاراي بىرگە تارتادى دەپ ەسەپتەيمىن.
نۇرتورە ءجۇسىپ,
سەنات دەپۋتاتى
