«دارىندى جاستاردىڭ ءبارى شەتەلدە جۇرگەن جوق. ەل ىشىندە دە بىلىكتى ءارى ءبىلىمدى ورەندەر جەتىپ ارتىلادى. ءبىز ولاردى باسشىلاردىڭ جاڭا بۋىنىن دايارلاۋعا بارىنشا تارتىپ جاتىرمىز. مەنىڭ باستاماممەن قۇرىلعان پرەزيدەنتتىك كادر رەزەرۆى – وسىنىڭ ايقىن دالەلى. جوبانىڭ كەلەسى كەزەڭىندە قوعام مۇددەسىنە ادال كوشباسشىلاردى ىرىكتەۋگە ەرەكشە نازار اۋدارامىز. بيلىك ورگاندارىنداعى ازاماتتار, ەڭ الدىمەن, ۇلتتىق مۇددەگە بەرىك بولۋعا ءتيىس», - دەيدى مەملەكەت باسشىسى.
وسىعان وراي پرەزيدەنت «جاس كەلسە – ىسكە» دەگەن ءتامسىلدى العا قويادى.
«جاستار – قاشاندا تىڭ يدەيالاردىڭ قاينار كوزى, وڭ وزگەرىستەردىڭ قوزعاۋشى كۇشى. سوندىقتان وسكەلەڭ ۇرپاقتىڭ وسىنداي الەۋەتىن دۇرىس ارناعا باعىتتاپ, ءتيىمدى پايدالانۋىمىز كەرەك. وسى ورايدا پرەزيدەنت جانىنداعى جاستار كەڭەسىنىڭ قىزمەتىن جانداندىرعان ءجون. ونى بىلىكتى ءارى ءبىلىمدى جاستاردى جۇمىلدىراتىن جۇيەلى جۇمىس الاڭىنا اينالدىرامىز. بۇدان بولەك, مەن ازاتتىق جىلدارىندا دۇنيەگە كەلگەن, ءالى تانىلىپ ۇلگەرمەگەن تالانتتى جاستاردى قولداۋ ماقساتىندا «تاۋەلسىزدىك ۇرپاقتارى» اتتى گرانت تاعايىنداۋدى ۇسىنامىن», - دەيدى مەملەكەت باسشىسى.
