جاتاقحانانىڭ اشىلۋ راسىمىنە قاتىسقان وبلىس اكىمى ارحيمەد مۇحامبەتوۆ ستۋدەنتتەرمەن كەزدەسىپ, جاڭا عيماراتتى ارالاپ كوردى. 656 ملن تەڭگە بيۋدجەت قارجىسىنا سالىنعان توعىز قاباتتى عيمارات قۇرلىسى جەتى ايدىڭ ىشىندە اياقتالىپ وتىر.
جاتاقحانانىڭ ءار قاباتىندا 3 ورىندىق 10 بولمە, ءار بولمەدە توڭازىتقىش بار. اس بولمەسى مەن جۋىناتىن بولمەسى, دارەتحانا بولەك ورنالاسقان. جاتاقحانادا 19 ادام جۇمىس ىستەيتىن بولادى. جاڭا باسپاناعا بۇگىننەن باستاپ ستۋدەنتتەردىڭ العاشقى لەگى ورنالاسا باستادى.
«بىزدە وقيتىن 1437 ستۋدەنتتىڭ 400-ءى جاتاقحانامەن قامتىلماعان. جاڭا جاتاقحاناعا 250 ستۋدەنت سيادى. ەڭ ءبىرىنشى كەزەكتە تۇرمىس جاعدايى تومەن جانە كامەلەتكە تولماعان ستۋدەنتتەرگە ورىن بەرىپ جاتىرمىز. ءبىرىنشى قاباتتا مۇگەدەكتىگى بار ستۋدەنتتەرگە ارنايى 10 ورىن قاراستىرىلعان», دەدى كوللەدج ديرەكتورى ايگەرىم وسپانوۆا.
