ءاربىر سايلاۋ ۋچاسكەسىندە كىرەبەرىستە مەديتسينا قىزمەتكەرلەرى نەمەسە ۆولونتەر كەزەكشىلىكپەن تەرمومەتر ارقىلى كەلگەن ازاماتتاردىڭ تەمپەراتۋراسىن ولشەۋى كەرەك; قولدى دەزينفەكتسيالاۋعا ارنالعان سانيتايزەر بولۋى ءتيىس; سايلاۋشىلاردىڭ قوزعالىس باعىتى بويىنشا اراقاشىقتىق بەلگىلەر مەن نۇسقاۋلىق بولۋى ءتيىس; پايدالانىلعان جەكە قورعانىس قۇرالدارىن تاستاۋعا ارنالعان كونتەينەرلەر; دەنە قىزۋى كوتەرىلگەن (37ºس-تان جوعارى) جاعدايدا ادامداردى وقشاۋلاۋعا ارنالعان جەكە ورىن بولۋى قاجەت.
سايلاۋ كوميسسيالارىنىڭ قىزمەتىن ۇيىمداستىرۋ كەزىندە كوميسسيا مۇشەلەرى ءاربىر 3 ساعات سايىن ماسكانى اۋىستىرۋى ءتيىس, ىشكە كىرگەندە قولدى تازالاۋ, ال قول الىسۋعا جانە كەلۋشىلەرمەن جاقىن بايلانىسۋعا بولمايدى, سايلاۋ كوميسسياسى نىسانىن ىلعالدى تازالاپ, جيھاز بەن تەحنيكالىق جابدىقتى ءبىر-بىرىنەن كەمىندە 1,5-2 مەتر قاشىقتىقتا ورنالاستىرۋ قاجەت.
بۇدان باسقا سايلاۋ بيۋللەتەندەرىن تاراتقاندا تىكەلەي بايلانىس ورناتۋعا بولمايدى. «سايلاۋشىلار جەكە باسىن كۋالاندىراتىن قۇجاتتى سايلاۋ كوميسسياسىنىڭ مۇشەسىنە كورسەتەدى, بىراق قولىنا بەرىلمەيدى», دەدى ە.قياسوۆ.
ەپيدەميالىق جاعدايدى باعالاۋ ماتريتساسىنا سايكەس 2020 جىلعى 25 جەلتوقساننان باستاپ 2021 جىلعى 5 قاڭتارعا دەيىن جوعارى جانە ورتاشا قاۋىپتى ايماقتاردا (قىزىل جانە سارى ايماقتاردا) بولاتىن وڭىرلەردەگى سايلاۋ كوميسسياسىنىڭ مۇشەلەرى پتر ادىسىمەن COVID-19-عا زەرتحانالىق تەكسەرۋدەن الدىن الا ءوتۋى ءتيىس. پتر ادىسىمەن COVID-19 تەستىن سايلاۋ باستالعانعا دەيىن 5 كۇن بۇرىن تاپسىرۋ قاجەت.
