الماتى قالاسىندا ADAL پارتياسىنان ءماجىلىس دەپۋتاتتىعىنا ۇمىتكەرلەر الينا اسقاروۆا, اقمارال بەكمۇرزاەۆا, ولجاس ورداباەۆ, نۇرلىبەك مالەلوۆ, ماقسات تولىقباي, داۋلەت مۇقاەۆ, ءلاززات شىڭعىسباەۆا, سونداي-اق پارتيا وكىلى نۇرلىبەك مۇقانوۆتار تۇرعىندارمەن كەزدەستى.
ADAL ساياسي پارتياسىنىڭ كەڭسەسىندە الماتى قالاسىنىڭ بەلسەندى جاستارى مەن اباي اتىنداعى قازۇپۋ وقىتۋشىلارىمەن, ستۋدەنتتەرىمەن ونلاين-جيىن ۇيىمداستىرىلدى. ءىس-شاراعا سپيكەرلەر رەتىندە الينا اسقاروۆا, اقمارال بەكمۇرزاەۆا جانە ولجاس ورداباەۆ قاتىستى. كەزدەسۋگە قاتىسۋشىلار پارتيانىڭ سايلاۋالدى باعدارلاماسى تۋرالى اقپارات الىپ, بىرقاتار وزەكتى ماسەلەلەردى تالقىلادى.
ءىس-شارا بارىسىندا ولجاس ورداباەۆ ءبىلىم بەرۋ سالاسى قىزمەتكەرلەرىنىڭ جالاقىسىن كوتەرۋدىڭ ماڭىزىنا توقتالدى.
«مەكتەپكە دەيىنگى ءبىلىم بەرۋ مەكەمەلەرىنەن باستاپ, مۇعالىمدەردىڭ جالاقىسىن ارتتىرۋ ماسەلەسى وتە وزەكتى كۇيىندە تۇر. ءبىز ءبىلىم بەرۋدىڭ بارلىق دەڭگەيلەرىندە مۇعالىمدەردىڭ جالاقىسىن ارتتىرۋ مۇمكىندىكتەرى بويىنشا جۇمىس ىستەۋدى جالعاستىرامىز», دەدى ولجاس ورداباەۆ.
دەپۋتاتتىققا كانديدات نۇرلىبەك مالەلوۆ پەن پارتيا وكىلى نۇرلىبەك مۇقانوۆ وقۋ ورنىنىڭ وقىتۋشىلارى جانە ستۋدەنتتەرىمەن كەزدەستى. جيىن بارىسىندا قاتىسۋشىلار پارتيانىڭ ءبىلىم بەرۋ جۇيەسىن رەفورمالاۋ جونىندەگى ۇسىنىستارىن دا جوعارى باعالادى.
ۇمىتكەرلەردىڭ ۇگىت-ناسيحات جۇمىستارى مەگاپوليستىڭ ءىرى بازارلارى مەن ساۋدا نۇكتەلەرىندە جالعاستى. دەپۋتاتتىققا كانديداتتار ماقسات تولىقباي, داۋلەت مۇقاەۆ جانە ءلاززات شىڭعىسباەۆا شاعىن بيزنەس وكىلدەرىمەن كەزدەستى.
بازار قىزمەتكەرلەرى ADAL پارتياسىنىڭ ماقساتتارى مەن مىندەتتەرى تۋرالى اقپاراتتى تىڭدادى. قىزۋ پىكىرتالاستار جۇمىسپەن قامتۋ جانە مەديتسينالىق ساقتاندىرۋ ماسەلەلەرىنەن تۋىندادى. كەزدەسۋلەر بارىسىندا تۇرعىندار پارتيانىڭ ەلدەگى كاسىپكەرلىكتى دامىتۋ جونىندەگى ۇسىنىستارىن قولدايتىندارىن جەتكىزدى.
ء«ىس جۇزىندە سىزدەر جۇمىس ورنىنان شىعا المايسىزدار. سوندىقتان سىزدەردىڭ شەتتە قالماۋلارىڭىز ءۇشىن, وسى ساياسي ناۋقانعا بەلسەندى قاتىسۋلارىڭىز ءۇشىن ءبىز ارنايى وسىندا كەزدەسۋ ۇيىمداستىرىپ وتىرمىز», دەدى ءلاززات شىڭعىسباەۆا.
جۇمىس كۇنىنىڭ سوڭىندا كانديداتتار ADAL پارتياسىنىڭ توراعاسى سەرىك سۇلتانعاليمەن كەزدەستى. كانديداتتار پارتيا توراعاسىنا ايماقتارداعى ۇگىت-ناسيحات جۇمىستارىنىڭ ناتيجەلەرى تۋرالى ايتىپ بەردى. سونىمەن قاتار ولار قالالار مەن اۋىلدار تۇرعىندارىن مازالايتىن, ەڭ كوپ كەزدەسكەن پروبلەمالاردى جەتكىزدى.
«وتە اۋقىمدى, ماڭىزدى جانە قاجەتتى جۇمىس اتقارىلدى, كوپتەگەن مالىمەت, تىلەك پەن ۇسىنىس جينالدى. مەن ارقايسىڭىزعا وسىنداي قيىن ساتتە بەلسەندىلىك پەن جۇمىستى ادال ورىنداعانىڭىز ءۇشىن العىس ايتامىن. وزدەرىڭىزگە جانە دەنساۋلىقتارىڭىزعا مۇقيات بولىڭىزدار, مەنىڭ ويىمشا, بۇل بۇگىنگى كۇننىڭ ەڭ ماڭىزدى باسىمدىعى ەكەندىگى بارشاعا تۇسىنىكتى. بارلىعىڭىزعا ۇمىتتەرىڭىزدى جوعالتپاۋعا جانە ءبىزدىڭ ورتاق ماقساتىمىزعا تاباندىلىقپەن ۇمتىلۋلارىڭىزعا تىلەكتەسپىن. حالىق بىزگە سەنەدى, سوندىقتان ولارعا ادال بولىپ, ۋادەلەرىمىزدى ورىندايىق», دەدى سەرىك سۇلتانعالي.
