مەملەكەت باسشىسى قاسىم-جومارت توقاەۆتىڭ قاۋىپسىزدىك جونىندەگى 56-شى ميۋنحەن كونفەرەنتسياسى اياسىنداعى پانەلدىك پىكىرتالاسقا قاتىسۋى شارتاراپتىڭ نازارىن قازاقستانعا اۋداردى.
The Economic Times گازەتىنىڭ حابارلاۋىنشا, اتالعان پانەلدىك پىكىرتالاستا كوتەرىلگەن ماسەلەلەردىڭ وزەكتىلىگىن ۋاقىت كورسەتىپ وتىر. اۋعانستاندا تۇراقتىلىق ورناتۋ جونىندەگى قازاقستان باستامالارىنا توقتالعان باسىلىم ەلىمىزدىڭ ءوز ەركىمەن يادرولىق قارۋدان باس تارتۋىن دا جوعارى باعالادى. The Economic Times گازەتىنىڭ پايىمداۋىنشا, مۇنداي قادام قازاق حالقىنىڭ دانالىعى مەن كورەگەندىگىن انىق اڭعارتادى.
Euractiv اگەنتتىگى مەملەكەت باسشىسىنىڭ ەۋرازيالىق ينتەگراتسيانى ىلگەرىلەتۋدەگى قازاقستاننىڭ ءرولى جونىندەگى سوزىنە ەكپىن بەردى. پىكىرتالاس كەزىندە ق.توقاەۆ ەۋرازيالىق ەكونوميكالىق وداقتىڭ ساياسي استارى جوق, ەكونوميكالىق جوبا ەكەنىن ايتتى. سونداي-اق 182 ميلليوننان استام تۇرعىنى بار ايماقتى قامتىعان بۇل ۇيىمنىڭ شەتەلدەن ينۆەستيتسيا تارتۋداعى الەۋەتى جونىندە اڭگىمەلەپ بەردى.
جىل باسىندا اقش-تىڭ مەملەكەتتىك حاتشىسى مايك پومپەو ەلورداعا ات باسىن بۇرعانى بەلگىلى. م.پومپەو مىرزانىڭ وسى ساپارى كەزىندە الەمنىڭ بارشا بۇقارالىق اقپارات قۇرالدارىنىڭ نازارى ۇلى دالاعا اۋدى.
قازاقستاننىڭ سىرتقى ىستەر ءمينيسترى مۇحتار تىلەۋبەردىمەن كەزدەسۋى بارىسىندا م.پومپەو ەكىجاقتى ىنتىماقتاستىق ماسەلەسىن تالقىلاي كەلە, قىتايداعى ەتنوستىق قازاقتاردىڭ جاعدايىن ايتىپ وتكەن ەدى.
«رەيتەرس» اگەنتتىگى م.پومپەونىڭ قىتايداعى مۇسىلمانداردى قۋدالاۋىنا قاتىستى سوزىنە ەكپىن بەردى. «پومپەو اڭگىمە بارىسىندا قازاقستان شەكاراسىنا تاياۋ ماڭداعى شىڭجاڭ اۆتونوميالىق اۋدانىندا (قىتاي) مۇسىلمان ۇيعىرلار مەن ەتنوستىق قازاقتارعا قىتايدىڭ كوممۋنيستىك پارتياسىنىڭ قىسىم كورسەتۋى تۋرالى ايتتى. م.پومپەو اقش بۇكىل مەملەكەتتى قىتايدىڭ قۋدالاۋىن توقتاتۋىن تالاپ ەتۋگە قوسىلۋعا شاقىراتىنىن, وسى ەلدەن قاشقاندارعا ساياسي پانا ۇسىنىپ, بوسقىن مارتەبەسىن بەرۋدى سۇرايتىنىن جەتكىزدى» دەپ حابارلادى «رەيتەرس» اگەنتتىگى. بۇدان بولەك, Deutsche Welle, سينحۋا سەكىلدى اگەنتتىكتەر دە وسى ساپار تۋرالى, اقش پەن قازاقستاننىڭ اراسىنداعى قارىم-قاتىناس جونىندە جارىسا جازدى.
The Diplomat پورتالى ەلىمىزگە قاتىستى كوپتەگەن ساراپتامالىق ماقالا جاريالادى. سونىڭ ءبىرى – لاتىن قارپىنە اۋىسۋعا ارنالدى. «قازاقستان لاتىن الىپبيىنە كوشۋدىڭ ۇزاق جولىنا ءتۇستى» دەپ اتالاتىن ماقالادا اۆتور قازاق حالقىنىڭ ءالىپبي تاڭداۋىنا تاريحي, مادەني جانە پراكتيكالىق جاعدايلار اسەر ەتتى دەپ وي تۇيەدى.
«قازاق حالقى تۇتىنعان الىپبيلەر عاسىرلار بويى ساياسي جاعدايلارعا بايلانىستى ءتۇرلى وزگەرىستەردى باستان وتكەردى. قازاق ءتىلى تۇركى تىلدەر توبىنا جاتادى. قازاق ءتىلى نەگىزىنەن ورتالىق ازيا, قىتاي, اۋعانستان, يراندى مەكەندەگەن قازاقتار مەن الەمدەگى قازاق دياسپورالارىنىڭ انا ءتىلى», دەيدى اۆتور.
اتالعان پورتالداعى تاعى ءبىر ساراپتاما قازاقستاننىڭ بىتىمگەرلىك ميسسياسىنا ارنالعان. قازىرگى تاڭدا ەلىمىزدىڭ ساربازدارى ليۆانداعى UNIFIL ميسسياسى اياسىندا بىتىمگەرلىك وپەراتسيالارىنا قاتىسىپ ءجۇر.
ماقالا اۆتورى – قورعانىس جانە گەوساياسي ماسەلەلەردى زەرتتەپ جۇرگەن امەريكالىق ساراپشى ۋيلدەر الەحاندرو سانچەس قازاقستاننىڭ UNIFIL اياسىندا ليۆانعا جۇزدەن اسا سارباز جىبەرۋى كەيىنگى جىلدارى بۇل باعىتتاعى جۇمىستىڭ بەلسەندى اتقارىلىپ جاتقانىن كورسەتەتىنىن جەتكىزگەن.
«بۇۇ دەرەكتەرىنە سۇيەنسەك, قازىرگى تاڭدا قازاقستاننىڭ 128 اسكەري قىزمەتكەرى بىتىمگەرلىك ميسسيالارىمەن اينالىسادى. ياعني وسى سالاعا ۇلەس قوسقان مەملەكەتتەر اراسىندا 66-ورىندا تۇر. قازاقستاننىڭ بىتىمگەرلىك ميسسياسىنا قاتىسىپ جۇرگەن اسكەري قىزمەتكەرلەرىنىڭ سانى بۇۇ بىتىمگەرلىك ميسسياسىنا ەڭ كوپ ۇلەس قوسۋشى ەل – ەفيوپياعا (6650 سارباز) قاراعاندا الدەقايدا از. ايتسە دە قازاقستان – ورتالىق ازياداعى باسقا ەلدەرگە قاراعاندا بىتىمگەرشىلىك ميسسياسىندا كوپ قىزمەتكەرى بار مەملەكەت. ماسەلەن, قىرعىزستان نەبارى 12 ادام عانا جىبەرگەن. سوعان قاراماستان قازاق ساربازدارى UNIFIL اياسىنداعى ميسسياسىن ءساتتى ورىندادى دەۋگە تولىق نەگىز بار», دەيدى ول.
The Guardian گازەتى قازاقستاننىڭ تۇمسا تابيعاتى تۋرالى جازىپ, تۋريستەرگە كەرەكتى قۇندى مالىمەت ۇسىنادى. «الەمنىڭ اشىق تەڭىزگە شىعا المايتىن ەڭ ۇلكەن مەملەكەتى سانالاتىن قازاقستان سولتۇستىگىندە رەسەيمەن, شىعىسىندا قىتايمەن شەكتەسىپ جاتىر. ەلدە كلاسسيكالىق قۇرلىقتىق كليمات قالىپتاسقان. قىسى سۋىق, جازى جانعا جايلى جىلى.
قازاقستاننىڭ سولتۇستىگى وڭتۇستىگىنە قاراعاندا سۋىقتاۋ بولعاندىقتان, كوكتەم مەن كۇز سالقىن. بىراق قوڭىرسالقىن ساتتەرى كوپ. سوندىقتان, بۇل ەلگە ءساۋىر مەن ماۋسىم, قىركۇيەك پەن قازان اراسىندا بارۋعا كەڭەس بەرەمىز», دەيدى The Guardian.
Forbes جۋرنالى بيىلعى ىندەت پەن مۇناي باعاسىنىڭ قۇلدىراۋى قازاقستانعا وڭاي تيمەگەنىن, بىراق سەنىم ارتۋعا بولاتىن ءبىر مەكەمە بار ەكەنىن جازادى. ول – استانا حالىقارالىق قارجى ورتالىعى.
«ارحيتەكتۋرالىق ديزاينى Epcot Center-گە ۇقساعانىمەن, بۇل ورتالىق قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ءتول تۋىندىسى. استانا حالىقارالىق قارجى ورتالىعى ەلدە دە, شەتەلدە دە قازاقستاننىڭ زاماناۋي كەلبەتى سانالادى», دەيدى Forbes.
