سىرقات – ءتان جاراسى بولسا, قايعى – جان جاراسى بولىپ, قوس قاپتالدان قولتىقتى سوگە قاقىراتا سوقتى. قوس ىشەكتەن شەرتىلگەن شەرتەر كۇيدەي – شىرعالاڭى كوپ بولعانىمەن, شىعار مۇڭداي حالىقتىڭ بىرلىگى مەن بەكەمدىگى شىڭىراۋدىڭ قۇلاماسىنا قۇلاتقان جوق. «قايعىڭ قارا كوجە بولسىن» دەپ بۇرىنعىلار بەكەر ايتپاعانىنا تاعى ءبىر مارتە كوز جەتكىزدىك. قارا سۋعا سەمىرىپ جۇرگەن قايعىسىز كۇندەرگە قايىرىلا زەر سالدىق. كۇن تۇسكەن جەرگە كولەڭكە دە تۇسەتىنىن باعامدادىق. ەلەمەگەن اۋرۋ ەسىركەمەيتىنىن ەسكەرە باستادىق. ەكى دۇنيەنىڭ اراسى ءبىر قادام بولعان بۇل جىلى ءتان دە اۋىرماسىن, جان دا اۋىرماسىن دەگەن جۇرەگى ىزگى جاندار جۇرت بولىپ جۇمىلۋدىڭ ءنازيرا ۇلگىسىن كورسەتتى.
ناۋرىز مەرەكەسىن قارسى الىپ جاتقان كەزدە ناۋبەتتىڭ ءدۇيىم دۇنيەگە تاراعانىن باعامداعان مەملەكەت باسشىلىعى دەر كەزىندە ەلدىڭ ەتەك-جەڭىن قىمتاپ, كارانتيندىك شارالار قابىلدادى, شەكارالار جابىلدى, قالالارعا بلوك-بەكەتتەر قويىلدى, حالىقتىڭ قالىپتى قارىم-قاتىناسى شەكتەلدى. مەملەكەت باسشىسى قاسىم-جومارت توقاەۆ پەن ەلباسى نۇرسۇلتان نازارباەۆ حالىققا بىرنەشە مارتە ۇندەۋ جولداپ, توتەننەن كەلگەن تۇماۋعا قارسى توتەنشە جاعداي جاريالادى. بۇل شارالاردىڭ بارلىعى قازاقستان حالقىنىڭ كوروناۆيرۋس ىندەتىنە قارسى العاشقى قۋاتتى يممۋنيتەتى بولعانىن اتاپ ايتۋىمىز كەرەك. ارينە, اتالعان شەكتەۋلەر الىپ ەلدەردىڭ دە ەكونوميكاسىن شايقالتىپ جىبەردى. دەسە دە, ەلىمىزدە حالىقتى الەۋمەتتىك قورعاۋعا ەرەكشە نازار اۋدارىلعانى ءمالىم. قازىر قاشىقتان جۇمىس ىستەۋ, قاشىقتان وقۋ, قاشىقتان ساۋدا جاساۋ قالىپتى ىسكە اينالدى. وسىلايشا, ءبىر جىلعا جەتەر-جەتپەس قىسقا عانا مەرزىمدە دوڭگەلەنگەن دۇنيەنىڭ ديدارى وزگەرگەنىنە كۋا بولدىق. وسى سىندارلى كەزەڭدە سىناقتان جەكە تۇلعا رەتىندە دە, جالپى قوعام رەتىندە دە شىڭدالىپ شىعاتىنىمىزدى سەزىندىك.
«Egemen Qazaqstan» گازەتىنىڭ ءوتىپ بارا جاتقان جىلدىڭ نەگىزگى قورىتىندىلارىنا ارنالعان
ماتەريالدارىن 3-15 بەتتەردەن وقي الاسىزدار
