ورتالىق كوممۋنيكاتسيالار قىزمەتى الاڭىندا وتكەن ارنايى ءباسپاسوز جيىنىندا 2021 جىلدان باستاپ زەينەتاقى قاراجاتىنىڭ ءبىر بولىگىن ماقساتتى پايدالانۋ تۋرالى جان-جاقتى مالىمەت بەرىلدى.
الدىمەن ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ ءسوز الىپ, پرەزيدەنتتىڭ تاپسىرماسىن ورىنداۋدىڭ جاي-جاپسارى زاڭمەن ناقتىلانعانىن اتاپ ءوتتى. اتالعان ماقساتتا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق ءوسۋدى قالپىنا كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ اياسىندا قاجەتتى زاڭنامالىق تۇزەتۋلەر پىسىقتالىپ, 23 جەلتوقساندا پارلامەنت قۇجاتتى قابىلدادى. زاڭعا سايكەس 2021 جىلدان باستاپ قازاقستاندىقتارعا زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋعا, قىمبات تۇراتىن ەمدەلۋگە اقى تولەۋگە نەمەسە جەكە باسقارۋشى كومپانيالارعا قاراجاتىن باسقارۋعا بەرۋ ءۇشىن پايدالانۋ قۇقىعى بەرىلەدى.
زەينەتاقى جيناقتارىنىڭ ءبىر بولىگىن ناقتى قاجەتتىلىكتەرگە پايدالانۋ قۇقىعىن بۇدان بۇرىن بىرنەشە رەت حابارلانعانداي جۇمىس ىستەيتىن, ءتيىستى جاستا زەينەتاقى جيناقتارى جەتكىلىكتى شەگىنەن اساتىن ازاماتتار پايدالانا الادى. سونداي-اق ساقتاندىرۋ كومپانيالارىمەن بجزق-دا قالعان زەينەتاقى جيناقتارىنىڭ سوماسى شەگىندە ءومىر بويى اننۋيتەتتىك تولەمدەردى قامتاماسىز ەتەتىن زەينەتاقى اننۋيتەتى شارتتارىن جاساعان ادامدار, زەينەتكەرلىككە شىققان ازاماتتار اتالعان مۇمكىندىككە يە بولادى. جەتكىلىكتىك شەك ايەلدەر مەن ەرلەر ءۇشىن بىردەي بەلگىلەنەدى جانە ءاربىر جاس ءۇشىن ەسەپتەلەدى.
«سونداي-اق زاڭدا جوعارىدا اتالعان ساناتتاعى ازاماتتار زەينەتاقى جيناقتارىنىڭ ءبىر بولىگىن وزدەرى, جۇبايلارى نەمەسە جاقىن تۋىستارى ءۇشىن تۇرعىن ءۇي جاعدايلارىن جاقسارتۋ ماقساتىندا نەمەسە ەمدەلۋگە اقى تولەۋگە پايدالانا الادى دەپ كوزدەلگەن. ماقساتتى پايدالانۋ ءۇشىن كورسەتىلگەن وتباسى مۇشەلەرىنىڭ قاراجاتىن بىرىكتىرۋگە بولادى», دەدى ا.سارباسوۆ.
«بىرىڭعاي جيناقتاۋشى زەينەتاقى قورى» اق باسقارما توراعاسى جانات قۇرمانوۆتىڭ ايتۋىنشا, 2020 جىلدىڭ 1 جەلتوقسانىنداعى جاعداي بويىنشا 761 مىڭنان اسا ادام زەينەتاقى جيناعىنىڭ ءبىر بولىگىن مەرزىمىنەن بۇرىن پايدالانۋ قۇقىعىن قولدانا الادى, ولاردىڭ شوتتارىندا 2,4 ترلن تەڭگەدەن اسا قاراجات بار.
«زەينەتاقى جيناقتارىنىڭ ءبىر بولىگىن پايدالانۋ قۇقىعىن ىسكە اسىرۋ ءۇشىن ازاماتتار, ەڭ الدىمەن, ءوز جيناعىن تەكسەرىپ, جەتكىلىكتى شەگىنەن اساتىن قاجەتتى سومانىڭ بار ەكەنىنە كوز جەتكىزۋى ءتيىس. بجزق ءوز سايتى نەمەسە ۇيالى قوسىمشاسى ارقىلى ءۇزىندى-كوشىرمە الۋدىڭ قولجەتىمدى جانە جەدەل تاسىلدەرىن ۇسىنادى. زەينەتاقى شوتىنىڭ جاي-كۇيىن egov.kz پورتالى ارقىلى دا تەكسەرۋگە بولادى. زەينەتاقى جيناقتارىن الۋ تۋرالى شەشىم قابىلداعان ادامدار تۇرعىن ءۇي ساتىپ الۋ جانە ەمدەلۋ ماسەلەلەرى جونىندەگى ۋاكىلەتتى وپەراتور – وتباسى بانكىنە جۇگىنە الادى. ۋاكىلەتتى وپەراتوردان حابارلاما العاننان كەيىن بجزق زەينەتاقى جيناقتارىن ۋاكىلەتتى وپەراتوردىڭ ارنايى شوتتارىنا سالۋ ءۇشىن اۋدارۋدى جۇزەگە اسىرادى. سونداي-اق سالىمشى زەينەتاقى جيناعىن ماقساتتى قاجەتتىلىكتەرگە العان كەزدە جەكە تابىس سالىعىن تولەۋ ءتاسىلىن تاڭداۋ قۇقىعىنا يە بولادى (جارنالار اۋدارىلعان كەزدە جتس الىنباعانىن ەسكەرتەمىز). ياعني ازاماتتار جتس تولەۋدى كەيىنگە قالدىرۋدى تاڭداسا بولادى نەمەسە تۇرعىن ءۇي جاعدايىن جاقسارتۋ جانە ەمدەلۋگە اقى تولەۋگە ارنالعان جيناقتارىن العان كەزىندە جتس-تى تولىق كولەمدە وتەي الادى», دەدى ج.قۇرمانوۆ.
جاڭا جىلدىڭ باسىنان باستاپ وتباسى بانك زەينەتاقى جيناعىن پايدالانۋعا ارنالعان ونلاين پلاتفورمانى ىسكە قوسادى. بۇل جونىندە «وتباسى بانك» اق باسقارما ءتورايىمى ءلاززات يبراگيموۆا كەڭىنەن ايتىپ بەردى.
ونىڭ ايتۋىنشا, زەينەتاقى قاراجاتىن پايدالانۋ ءۇشىن ونلاين پلاتفورمادا ءوتىنىش بەرۋگە بولادى. جوبا ەرەجەلەرىنە سايكەس كليەنت ءوتىنىش تاپسىرعان كەزدە ارنايى پورتالعا كىرىپ, ەلەكتروندى-تسيفرلى قولتاڭبا ارقىلى اۆتوريزاتسيادان ءوتىپ, جەكە كابينەتكە كىرەدى. كليەنت اۆتوريزاتسيا بارىسىندا ءۇشىنشى تۇلعالارعا زەينەتاقى جارنالارى بويىنشا قۇپيا مالىمەتتەردى اشۋعا, جەكە دەرەكتەرىن جيناپ, وڭدەۋگە, جىلجىمايتىن م ۇلىكتى جاقىن تۋىستارىنان ساتىپ الماۋ تۋرالى مىندەتتەمەنى جانە بىرىڭعاي زەينەتاقى تولەمدەرىن تەك جاقىن تۋىستارىنان قابىلداۋ جانە تاعايىنداۋ تۋرالى مىندەتتەمەنى ورىنداۋعا كەلىسىم بەرەدى. جەكە كابينەتتە ول قاراجاتتى قانداي ماقساتتا قولداناتىنىن تاڭدايدى جانە سكانەردەن وتكىزىلگەن كوشىرمەلەر تۇرىندە الدىن الا دايىندالۋى ءتيىس قۇجاتتار تىزىمىمەن تانىسادى. ءار ماقساتتىڭ جەكە قۇجاتتار ءتىزىمى بار.
ءارى قاراي پايدالانۋعا قاجەتتى سومانى كورسەتۋ قاجەت. كليەنت ماقساتى مەن وعان جۇمسالاتىن سومانى انىقتاعاننان كەيىن ء«وتىنىم جاساۋ» باتىرماسىن باسادى. ەتسق ارقىلى بجزق-دان قاراجات سۇراتۋعا قاجەتتى ءۇش كەلىسىمگە قول قويۋ كەرەك. كليەنتتىڭ كەلىسىمىن العاننان كەيىن بانك ونىڭ ارنايى شوتى بار-جوعىن تەكسەرەدى. ەگەر ارنايى شوت تابىلماسا, بانك بۇل تۋرالى كليەنتكە «قالقىمالى» تەرەزە ارقىلى حابارلايدى. بۇل – كليەنتكە ارنايى شوت اشۋ كەرەك دەگەن ءسوز. ارنايى شوت اشقاننان كەيىن كليەنت جەكە كابينەتكە قايتا ورالىپ, توقتاعان جەرىنەن قايتا جالعاستىرا الادى. ال ارنايى شوت بولعان جاعدايدا «بجزق-عا ءوتىنىم جولداۋ» باتىرماسىن باسۋ قاجەت. كليەنت تالاپ ەتىپ وتىرعان قاراجاتتىڭ قاجەتتى مولشەرى سۇرالىپ, ىزىنشە بۇل سوما ارنايى شوتقا اۋدارىلعانى تۋرالى حابارلاما كەلەدى.
كليەنت ەمدەلۋ ماقساتىن تاڭداعان جاعدايدا, قاراجات ارنايى شوتقا اۋدارىلعاننان كەيىن مەديتسينالىق قىزمەتكە قاجەتتىلىكتى راستاۋ ءۇشىن دارىگەرلىك-كەڭەس بەرۋ كوميسسياسىنا (دكك) جۇگىنەدى. راستاۋ تۋرالى انىقتاما الىپ, سودان كەيىن ەمدەلۋ ءۇشىن مەديتسينالىق ۇيىمعا جۇگىنەدى, ۇيىمدا قانداي قىزمەت ۇسىنىلاتىنى, قانشا تۇراتىنى جانە مەديتسينالىق ۇيىمنىڭ مالىمەتتەرى كورسەتىلگەن كەلىسىم قۇرادى. ەگەر بۇل شەتەلدىك كلينيكا بولسا, وندا كەلىسىمشارتتىڭ نوتاريالدى كۋالاندىرىلعان اۋدارماسى دا بولۋى كەرەك. ارنايى شوتقا اقشا تۇسكەننەن كەيىن 45 جۇمىس كۇنى ىشىندە سالىمشى جوعارىدا اتالعان قۇجاتتاردى الىپ, جەكە كابينەتكە جۇكتەۋى كەرەك. سودان كەيىن ۋاكىلەتتى ورگان ونى تەكسەرەدى, ەگەر قۇجاتتار دۇرىس بولسا, اقشا كەلىسىمشارتتا كورسەتىلگەن دەرەكتەمەلەر بويىنشا اۋدارىلادى.
قاجەتتى سومانىڭ بار ەكەنىن راستايتىن حابارلاما كەلگەننەن كەيىن, كليەنتكە قۇجاتتاردى جۇكتەۋگە ارنالعان تەرەزە اشادى. كليەنت بەلگىلەنگەن فورماتتاعى (JPG نەمەسە PNG) قۇجاتتاردىڭ سكانەرلىك كوشىرمەلەرىن جۇكتەپ, اقشا اۋدارىلاتىن دەرەكتەمەلەردى قولىمەن تەرۋگە ءتيىس. دەرەكتەمەلەر سكانەرلەنگەن قۇجاتتاردا كورسەتىلگەن دەرەكتەمەلەرگە سايكەس كەلۋى كەرەك. قۇجاتتاردى جۇكتەپ, دەرەكتەمەلەردى جازعاننان كەيىن, كليەنت ء«وتىنىش جىبەرۋ» باتىرماسىن باسادى. قۇجاتتار ارنايى شوتقا قاراجات تۇسكەننەن كەيىن 45 جۇمىس كۇنى ىشىندە جۇكتەلۋى كەرەك. ايتپەسە, ولار بجزق-عا كەرى قايتارىلادى.
