قارىز مولشەرىن ازايتىپ, ونى تولەۋ مەرزىمىن كەيىنگە قالدىرۋ شارالارى قولعا الىندى. قازان ايىندا 750 ملن اقش دوللارى كولەمىندە 12,5 جىلدىق ەۋرووبليگاتسيا شىعارىلىمى ويداعىداي ورنالاستىرىلدى. كومپانيا تۇسكەن قاراجاتتى 2022 جانە 2023 جىلدارى وتەلۋگە ءتيىس ەۋرووبليگاتسيالاردى مەرزىمىنەن بۇرىن وتەۋگە پايدالاندى. ناتيجەسىندە, كومپانيانىڭ الداعى بىرنەشە جىلدا ەۋرووبليگاتسيالاردى وتەۋ بويىنشا قوماقتى ءبىر رەتتىك شىعىندارى جوق.
ورتالىق اپپارات وڭتايلاندىرىلدى
ءساۋىر ايىندا جاڭا ۇيىمدىق قۇرىلىم بەكىتىلدى. سوعان سايكەس قمگ ورتالىق اپپاراتىندا جۇمىس ىستەيتىن قىزمەتكەرلەر سانى 249 ادامعا نەمەسە 34%-عا, ياعني 729 ادامنان 480 ادامعا ازايدى.
مامىر ايىندا كومپانيا باسشىلىعىنىڭ جالاقىسى 30%-عا, ورتا بۋىن باسشىلاردىڭ ەڭبەكاقىسى 20%-عا ازايعانى جونىندە جاريالادى.
سونىمەن قاتار ورتالىق اپپاراتتا باسقارۋشى ديرەكتور دەگەن لاۋازىم مۇلدەم جويىلدى, دەپارتامەنت سانى ءۇش ەسەگە, 60-تان 20-عا دەيىن قىسقاردى. بۇدان بولەك قمگ جىل سوڭىنا دەيىن ورتالىق اپپارات قىزمەتكەرلەرىنە تولەنەتىن بونۋس پەن سىياقىلاردى الىپ تاستادى جانە قىزمەتتىك كولىكتەردەن باس تارتتى.
اۋقىمدى ديۆيدەند تولەندى
مامىر ايىندا شىعىنداردىڭ قىسقارۋىنا قاراماستان, مەملەكەت باسشىسىنىڭ تاپسىرماسى اياسىندا اكتسيونەرلەرگە 2019 جىلعا 81,7 ملرد تەڭگە مولشەرىندە ديۆيدەند تولەۋ تۋرالى شەشىم قابىلداندى. بۇل – الدىڭعى جىلمەن سالىستىرعاندا ەكى ەسە كوپ قارجى. 2019 جىلدىڭ قورىتىندىسى بويىنشا ديۆيدەند تولەۋمەن قاتار قمگ ءوز اكتسيونەرلەرىنە نۇر-سۇلتان مەن تۇركىستان قالالارىنداعى الەۋمەتتىك نىسانداردىڭ قۇرىلىسىنا ارنالعان قاراجاتتى قوسا العاندا, 20 ملرد تەڭگە اقشا تولەدى.
ەلەۋلى وقيعالار
ماۋسىم ايىندا ماڭعىستاۋ وبلىسىنىڭ شىعىس بەكتۇرلى بارلاۋ بلوگىندا مۇناي بۇرقاعى اتقىلادى. دەبيتى تاۋلىگىنە 100 تەكشە مەترگە دەيىنگى «قارا التىن» تاريحي دەرەكتەردى كەشەندى گەولوگيالىق-گەوفيزيكالىق زەرتتەۋ, باسسەيندىك ۇلگىلەۋ, جوعارى تەحنولوگيالىق سەيسموبارلاۋ جۇمىستارىنىڭ ناتيجەسىندە الىندى.
ال جەلتوقسان ايىندا شىعىس ورىكتاۋ كەن ورنىندا ەكى ۇڭعىما تاجىريبەلىك پايدالانۋعا بەرىلدى. ءبىر جىلدان كەيىن تاعى دا بەس ۇڭعىما ىسكە قوسىلماق. جوبا تابىستى ىسكە اسىپ, وڭ ەكونوميكالىق احۋال قالىپتاسقان جاعدايدا وسى كەن ورنىندا تاعى 58 ۇڭعىمانى پايدالانۋ مۇمكىندىگى قاراستىرىلادى. جۇمىستار ءساتتى وتكىزىلگەن جاعدايدا, كەنىشتەگى ءوندىرىس كولەمى جىل سايىن 1,5 ملرد تەكشە مەتر گاز جانە 500 مىڭ توننا مۇنايعا دەيىن جەتۋى مۇمكىن.
«سارىارقا» ىسكە قوسىلدى
تامىز ايىندا نۇر-سۇلتان قالاسىندا جەكەمەنشىك ءۇي يەلەرىنەن ورتالىق گازبەن قامتۋدىڭ ورتالىقتاندىرىلعان جۇيەسىنە قوسىلۋعا ءوتىنىم قابىلدانا باستادى. ءوتىنىمدى ەلوردانىڭ گازداندىرىلعان تۇرعىن ءۇي القاپتارىندا ورنالاسقان زاڭدى تۇلعالار دا بەرە الادى.
ەسكە سالا كەتەيىك, «سارىارقا» ماگيسترالدى گاز قۇبىرىنىڭ قۇرىلىسى 2019 جىلدىڭ سوڭىندا اياقتالدى. گاز قۇبىرى قاراعاندى مەن اقمولا وبلىسىنىڭ 171 ەلدى مەكەنىن گازبەن قامتاماسىز ەتەدى.
قورداي تۇرعىندارى كوگىلدىر وتىنمەن قامتىلدى
تاۋەلسىزدىك كۇنى قارساڭىندا جامبىل وبلىسى قورداي اۋدانىنىڭ ون ەلدى مەكەنى نەمەسە 62 مىڭنان استام تۇرعىنى مەن 274 الەۋمەتتىك نىسان كوگىلدىر وتىنعا قوسىلدى. 2020 جىلدىڭ ماۋسىم-قازان ايلارىندا بارلىعى 392 شاقىرىم گاز قۇبىرى تارتىلعان بولاتىن. وسى جۇمىستىڭ ناتيجەسىندە قوردايلىقتاردى كوگىلدىر وتىنمەن قامتۋ كورسەتكىشى 47%-دان 95%-عا دەيىن ارتتى.
ىندەتپەن كۇرەسكە قارجىلاي قولداۋ كورسەتىلدى
«قازمۇنايگاز» كومپانيالار توبى حالىققا, وبلىس اكىمدىكتەرىنە جانە مەديتسينالىق مەكەمەلەرگە 3,6 ملرد تەڭگەگە دەمەۋشىلىك كومەك كورسەتتى. اتالعان قاراجاتقا وكپەنى جاساندى جەلدەتۋ اپپاراتتارى, وتتەگى كونتسەنتراتورلارى, جەدەل جاردەم كولىكتەرى جانە جەكە قورعانىس قۇرالدارى ساتىپ الىندى. بۇدان بولەك, جۇقپالى ىندەتپەن كۇرەستە ەرەن ەڭبەك ەتىپ جۇرگەن اق حالاتتى ابزال جاندارعا, پوليتسيا قىزمەتكەرلەرىنە ىستىق تاماق جەتكىزىپ بەرۋ ۇيىمداستىرىلدى.
