نارىقتى رەتتەۋ جونىندەگى مەملەكەتتىك باسقارماسى كەلتىرگەن مالىمەتكە سۇيەنسەك, Alibaba Group ساتۋشىلاردى «ەكەۋدىڭ بىرەۋىن تاڭداۋعا», ياعني وزدەرىمەن عانا جۇمىس ىستەپ, باسەكەلەستەرىمەن جۇمىستى توقتاتۋعا ماجبۇرلەگەن.
«زاڭعا سايكەس, Alibaba Group-قا قاتىستى مونوپوليستىك ارەكەتتەرگە كۇدىك بويىنشا تەرگەۋ باستالدى», دەلىنگەن مەملەكەتتىك باسقارمانىڭ نارىقتى رەتتەۋ جايلى مالىمدەمەسىندە.
Alibaba Group كومپانياسى بەيسەنبىدە حابارلاما العانىن جانە رەتتەۋشىلەردىڭ تەرگەۋىنە بەلسەندىلىك تانىتىپ كومەكتەسەتىنىن راستادى. وسىدان كەيىن كومپانيانىڭ گونكونگ قور بيرجاسىنداعى اكتسيالارىنىڭ باعاسى 8,1 پايىزعا تومەندەدى.
ءبىراز ۋاقىت بۇرىن قىتاي بيلىگى Alibaba كومپانياسىنىڭ قۇنى 35 ملرد دوللارلىق Ant Group جوباسىن IPO-عا شىعارۋىنا تىيىم سالعان-دى. بۇل قادام Alibaba باسشىلىعىن دا, ينۆەستورلاردى دا تاڭعالدىرعانى انىق.
بەيجىڭ بيلىگىنىڭ Ant Group-تىڭ IPO-عا شىعۋىنا جول بەرمەۋىنىڭ باستى سەبەبى بىرەۋ عانا. تاياۋدا Alibaba-نىڭ نەگىزىن قالاعان دجەك ما شانحايداعى جيىنداردىڭ بىرىندە قىتايدىڭ ينتەرنەت تەحنولوگيا سالاسىنداعى ەرەجەلەرىن سىناعان بولاتىن. Wall Street Journal-دىڭ كەلتىرگەن مالىمەتتەرىنە سۇيەنسەك, وسى وقيعادان كەيىن سي تسزينپين قۇزىرلى ورگاندارعا ارنايى تاپسىرما بەرىپ, Alibaba-نىڭ ماسەلەسىن مايشاممەن قاراۋدى تاپسىرعان كورىنەدى.
