فۋتبول يندۋسترياسىندا جۇمىس ىستەۋ داۋلەتتىڭ بالا كەزىنەن ارمانى بولاتىن. سوندىقتان بولار, ۋەفا باس كەڭسەسىنە قىزمەتكەرلەر ىرىكتەپ جاتىر دەگەن جاڭالىقتى ەستي سالىسىمەن بىردەن قۇجاتتارىن جيناپ وتكىزدى. ال باس كەڭسەنىڭ جاس قازاق جىگىتىن اڭگىمەلەسۋگە شاقىرۋى دا توسىن بولعان ەدى. داۋلەت بىردەن جۇمىسقا قابىلداندى. بۇگىندە ول چەمپيوندار ليگاسىنا جەتەكشىلىك ەتەتىن دەپارتامەنتتەردىڭ بىرىندە ەڭبەك ەتەدى.
«ارينە, العاشقى ساتتە ۇلكەن جاۋاپكەرشىلىكتەن, ابدىراپ قالۋدان باس اينالعانداي كورىندى. ال قازىر ءبارىن جادىما ساقتاپ, قاجەتتى تاجىريبە جيناقتاۋعا تىرىسىپ ءجۇرمىن. ويتكەنى, مۇنىڭ بارلىعى وتانىمدا, قازاقستاندا قاجەتىمە جارايتىندىعى ءسوزسىز», دەدى جاس مامان.
شىنىمەن دە داۋلەت ۋرانحاەۆ ۋاقىتى كەلگەندە وتانىنا ورالىپ, جيناعان مول تاجىريبەسىن وتاندىق سپورت يندۋسترياسىن دامىتۋعا قوسقىسى كەلەدى. ءدال وسى سەبەپپەن ول بۇقارالىق سپورتتى دامىتۋعا قاتىستى ءوز ۇسىنىستارىن قاعازعا ءتۇسىرىپ, ەلىمىزدىڭ پرەزيدەنتى قاسىم-جومارت توقاەۆقا حات جازعان ەدى. مەملەكەت باسشىسىنىڭ اتىنان ستراتەگيالىق جوسپارلاۋ جانە رەفورمالار جونىندەگى اگەنتتىكتەن ناقتى جاۋاپ تا الدى.
«حالىق ۇنىنە قۇلاق اساتىن مەملەكەت» شىنىمەن دە جۇمىس ىستەيدى. جاسىم نەبارى 21-دە عانا ءارى بىلەتىم دە از ەمەس. ارينە, كەيدە جاستىڭ البىرتتىعى دا بار شىعار. دەگەنمەن, مەن ۇمىتقان جوق, ساۋالدارىم مەن ۇسىنىستارىما جاۋاپ بەردى. مەملەكەت مەنەن بەزىنگەن جوق, بار ەكەندى بىلەدى. مىنە ءدال وسى جايت مەنى مۇنان دا جاقسى جۇمىس ىستەۋگە ىنتالاندىرىپ وتىر. جيناقتاعان كەز كەلگەن تاجىريبەمنىڭ ەلىمنىڭ قاجەتىنە جارارىنا سەنىمدىمىن», دەدى داۋلەت.
وتانداسىمىز فۋتبولمەن اۋەستەنۋمەن قاتار ەلىمىزدىڭ ءيميدجىن شەتەلدە ىلگەرىلەتۋگە تىرىسىپ, شەتەلدىك دوستارىنا قازاق حالقىنىڭ مادەنيەتى, سالت-ءداستۇرى جايىندا ۇنەمى ايتىپ جۇرەدى. سونىمەن قاتار دوستارىمەن بىرگە Glion ۋنيۆەرسيتەتى ۇيىمداستىراتىن جىل سايىنا كورمەگە قاتىسىپ, ادامدارعا قازاقتىڭ اس مازىرىمەن, داستۇرىمەن تانىستىرادى. وتكەن جىلى شۆەيتسارياداعى قازاقستان ستۋدەنتتەرى پرەزيدەنتتىك سايلاۋدا داۋىس بەرۋگە قاتىسۋ ءۇشىن وزدەرى ۇيىمداستى.
وسىلايشا, ونى وزدەرى ءۇشىن ۇلكەن وقيعا اينالدىردى. ويتكەنى, جاستاردىڭ باسىم كوپشىلىگى العاش رەت داۋىس بەرۋگە قاتىسقان بولاتىن. مۇنان بولەك, داۋلەت ۋرانحاەۆ ءتۇرلى ەلدەردە ءبىلىم الىپ جاتقان ستۋدەنتتەر اراسىندا ابايدىڭ 175 جىلدىق مەرەيتويىنا ارنالعان پوەزيالىق ەستافەتانى دا ۇيىمداستىرعان ەدى.
