رۋحانيات • 25 جەلتوقسان، 2020

الماتىدا «تاريح. تاعىلىم. حالىق» اتتى حالىقارالىق عىلىمي-تاجىريبەلىك كونفەرەنتسيا ءوتتى

247 رەت كورسەتىلدى

جۋىردا قر پرەزيدەنتى ارحيۆىندە «تاريح. تاعىلىم. حالىق» دەگەن اتاۋمەن ح حالىقارالىق عىلىمي-تاجىريبەلىك كونفەرەنتسيانىڭ ماتەريالدار جيناعىنىڭ تۇساۋكەسەرى وتكىزىلدى. ءىس-شارا بەينەبايلانىس فورماتىندا ۇيىمداستىرىلدى، دەپ حابارلايدى Egemen.kz.

«كونفەرەنتسيانىڭ وتاندىق جانە شەتەلدىك زەرتتەۋشىلەر اراسىنداعى تانىمالدىعى جىلدان-جىلعا ارتىپ كەلەدى. سوعان سايكەس جىل سايىن شاراعا قاتىساتىنداردىڭ دا قاراسى كوپ. وسى جىلدارداعى كونفەرەنتسيا ماتەريالدارىنىڭ بارلىق جيناقتارى حح عاسىرداعى قازاقستان تاريحىنا قىزىعۋشىلىق تانىتاتىن ماماندار مەن زەرتتەۋشىلەر ءۇشىن ۇلكەن سۇرانىسقا يە» دەپ اتاپ ءوتتى قر پرەزيدەنتى ءارحيۆىنىڭ ديرەكتورى ءجاميلا ابدىقادىروۆا. سونىمەن قاتار ج. ابدىقادىروۆا عىلىمي فورۋمدى ۇيىمداستىرۋداعى جەمىستى سەرىكتەستىك ءۇشىن قازاقستان حالقى اسسامبلەياسى مەن «ميتسۆا» قاۋىمداستىعىنىڭ باسشىلىعىنا العىسىن ءبىلدىردى. «بيىل ەلدە ورىن العان جاعدايعا بايلانىستى كونفەرەنتسيا بەينەكونفەرەنتسبايلانىس فورماتىندا ءوتتى. الايدا بۇل شارانىڭ ءتيىستى دەڭگەيدە وتۋىنە كەدەرگى كەلتىرمەدى، كەرىسىنشە ونلاين فورماتتا ۇيىمداستىرىلعان فورۋم جۇمىسىنا گرەكيا، يزرايل، قازاقستان، كانادا، قىرعىزستان، پولشا، رەسەي، اقش، وزبەكستان جانە ۋكراينا ەلدەرىنەن كوپتەگەن مامانداردىڭ قاتىسۋىنا مۇمكىندىك اشتى» دەپ ءوز ءسوزىن جالعادى.

«تاريح. تاعىلىم. حالىق» حالىقارالىق عىلىمي-تاجىريبەلىك كونفەرەنتسياسى ۇلى وتان سوعىسىنداعى جەڭىستىڭ 75 جىلدىعى مەن قازاقستان حالقى اسسامبلەياسىنىڭ 25 جىلدىعى اياسىندا وتكىزىلدى. ماتەريالدار جيناعىن دايىنداۋ جانە باسىپ شىعارۋ كونفەرەنتسيانى ۇيىمداستىرۋ كوميتەتىنىڭ ۇيلەسىمدى جەدەل جۇمىسىنىڭ ارقاسىندا جۇزەگە اسىرىلدى.

جيىرما جىل بويى جۇزەگە اسىرىلىپ كەلە جاتقان بۇل جوبا ەكىنشى دۇنيەجۇزىلىك سوعىس جىلدارىنداعى ءتۇرلى ۇلتتاردىڭ جاپپاي قونىس اۋدارۋ تاريحى تۋرالى اقپاراتتى ساقتاۋعا، ماڭگىلىككە قالدىرۋعا جانە تاراتۋعا ايتارلىقتاي ۇلەس قوسىپ كەلەدى. كونفەرەنتسيا جۇمىستارىنىڭ قورىتىندىسى بويىنشا حالىقتى، ونەركاسىپ نىساندارىن، مادەنيەت مەكەمەلەرىن ەۆاكۋاتسيالاۋعا بايلانىستى ماسەلەلەر، سونداي-اق جاھاندىق ساياسي وقيعالاردىڭ ناتيجەسىندە تۇرعىلىقتى جەرىن وزگەرتۋگە ءماجبۇر بولعان حالىقتىڭ ءومىر تاريحى كورسەتىلگەن ماتەريالدار جيناقتارى جارىق كوردى.

بيىلعى جىلعى شارانىڭ ماتەريالدار جيناعىنداعى 662 بەتتە 71 اۆتوردىڭ 74 بايانداماسى ۇسىنىلعان، جالپى كولەمى – 42 باسپا تاباق.

«ميتسۆا» قاۋىمداستىعىنىڭ باسشىسى الەكساندر بارون «فورۋم ماتەريالدارىن باسىپ شىعارۋ – ەكىنشى دۇنيەجۇزىلىك سوعىس تاريحى تۋرالى ءبىلىمدى كەڭەيتۋگە قوسقان ۇلەس» ەكەنىن اتاپ ءوتتى. «تاريح. تاعىلىم. حالىق» حالىقارالىق جوباسىنىڭ كەلەسى ءحى كونفەرەنتسياسى 2022 جىلى ءوز جالعاسىن تابادى دەپ جوسپارلانىپ وتىرعانىن دا جەتكىزدى.

تۇساۋكەسەرگە وتاندىق جانە شەتەلدىك زەرتتەۋشىلەر ل.ن. گۋميلەۆ اتىنداعى ەۇۋ پروفەسسورى، قازاقستان حالقى اسسامبلەياسىنىڭ عىلىمي-ساراپتامالىق كەڭەسىنىڭ مۇشەسى، پەداگوگيكا عىلىمدارىنىڭ دوكتورى ناتاليا كالاشنيكوۆا، ءال-فارابي اتىنداعى قازۇۋ پروفەسسورى، تاريح عىلىمدارىنىڭ دوكتورى لايلا احمەتوۆا، سولتۇستىك قازاقستان وبلىسى مەملەكەتتىك ءارحيۆىنىڭ ديرەكتورى، تاريح عىلىمدارىنىڭ كانديداتى ساۋلە مالىكوۆا، قر پرەزيدەنتى ءارحيۆىنىڭ باس ساراپشىسى ەۆگەنيا چيليكوۆا، تۇركىستان وبلىسى قوعامدىق-ساياسي تاريحى مەملەكەتتىك ءارحيۆىنىڭ باس قور ساقتاۋشىسى، جوعارى ساناتتى ءارحيۆشى ەلەنا تيموفەەۆا، ج. بالاساعۇن اتىنداعى قىرعىز ۇلتتىق ۋنيۆەرسيتەتىنىڭ «ارحەولوگيا، ەتنولوگيا، دەرەكتانۋ جانە تاريحناما» كافەدراسىنىڭ مەڭگەرۋشىسى، تاريح عىلىمدارىنىڭ دوكتورى، پروفەسسور شايىركۇل باتىرباەۆا (قىرعىزستان)، گدانسك قالاسىنداعى ەكىنشى دۇنيەجۇزىلىك سوعىس مۋزەيىنىڭ قىزمەتكەرى، PhD دميتري پانتو (پولشا)، مىرزا ۇلىقبەك اتىنداعى ۇلتتىق ۋنيۆەرسيتەتىنىڭ تاريح فاكۋلتەتى «دەرەكتانۋ جانە ارحيۆتانۋ» كافەدراسىنىڭ دوتسەنتى، تاريح عىلىمدارىنىڭ كانديداتى حايريا بۋريەۆا (وزبەكستان)، تيۋمەن مەملەكەتتىك ۋنيۆەرسيتەتىنىڭ پروفەسسورى الەكساندر ياركوۆ (رەسەي) قاتىستى. ولار باسىلىمنىڭ عىلىمي قۇندىلىعىمەن قاتار، جيناق ماتەريالدارىنداعى ادام تاعدىرىنىڭ ناقتى مىسالدارى ارقىلى قيىن جانە قايعىلى تاريحي كەزەڭدەردەگى ادامگەرشىلىك تۋرالى ويلارىنىڭ كەلەشەك ۇرپاق ءۇشىن ۇلكەن تاربيەلىك ءمانى بار ەكەنىن اتاپ ءوتتى.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار