24 جەلتوقسانداعى جاعداي بويىنشا قازاقستاندا وتكەن تاۋلىكتە 754 ادامنان پتر ارقىلى Covid-19 ىندەتى انىقتالدى. ال كوروناۆيرۋس ينفەكتسياسىنىڭ بەلگىلەرى بار پنەۆمونيا بويىنشا 156 جاعداي تىركەلىپ, 2 ادام كوز جۇمعان. وتكەن اپتادا بۇل دەرت 49 ادامنىڭ ءومىرىن جالمادى. ەلىمىزدە كۇندەلىكتى ىندەتكە شالدىققانداردىڭ سانى شامامەن 0,51 پايىزعا ءوسىپ وتىر. كوروناۆيرۋستىڭ ءورشۋ دەڭگەيىنىڭ كورسەتكىشى 0,9 پايىزدى قۇرايدى.
وڭىرلەردەگى احۋالعا توقتالساق, دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعى 22 جەلتوقساندا نۇر-سۇلتان قالاسى مەن باتىس قازاقستان وبلىسى «سارى ايماققا» كىرگەنىن جاريا ەتتى. بۇعان قوسا «سارى ايماقتا» قوستاناي, اقمولا, سولتۇستىك قازاقستان مەن پاۆلودار وبلىستارى تۇر. ال «قىزىل ايماقتاعى» اتىراۋ وبلىسىنداعى جاعداي ءالى تۇراقتالا قويمادى. قالعان وڭىرلەردىڭ ءبارى – «جاسىل ايماقتا».
«قىزىل ايماققا» ەنگەن اتىراۋ وبلىسىنداعى ىندەت ءورشىپ تۇرعان ورىن – «تەڭىز» كەنىشى. ءبىر تاۋلىكتە اتالعان وڭىردە 62 ادام كوروناۆيرۋس جۇقتىرسا, سونىڭ تەڭ جارتىسى – «تەڭىز» كەنىشىنىڭ جۇمىسشىلارى. 22 جەلتوقساندا بۇل كەن ورنىنداعى ينفەكتسيالىق ستاتسيوناردا جاتقان ناۋقاستاردىڭ سانى 364 ادامعا جەتكەن. سوندىقتان كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) شەشىمىمەن 25 جەلتوقساننان باستاپ «تەڭىز» كەن ورنىندا شەكتەۋ شارالارى كۇشەيتىلەدى.
جالپى وسى جىلدىڭ 25 جەلتوقسانىنان باستاپ 2021 جىلدىڭ 5 قاڭتارىنا دەيىن ويىن-ساۋىق, سپورتتىق جانە باسقا دا بۇقارالىق ءىس-شارالاردى, ونىڭ ىشىندە جاڭا جىلدىق ەرتەڭگىلىكتەر مەن مەرەكەلىك كورپوراتيۆتەردى وتكىزۋگە تىيىم سالىنادى. سونداي-اق بولشەك ساۋدا جەلىسىندە انتيكوۆيدتى دارىلىك زاتتاردىڭ باعاسىن ورتا ەسەپپەن 24%-عا تومەندەتۋ بويىنشا شارالار قابىلدانباق.
بۇعان قوسا ۆاك ءبىلىم بەرۋ ساپاسىن قامتاماسىز ەتۋ ماقساتىندا قوعامنىڭ پىكىرىن ەسكەرە كەلە ءبىلىم جانە عىلىم مينيسترلىگىنىڭ ۇسىنىسى بويىنشا بىرقاتار شەشىم قابىلدادى. اتاپ ايتقاندا, وقۋ جىلىنىڭ III توقسانىنان باستاپ ءبىتىرۋشى سىنىپتار ءۇشىن (9, 11, 12-سىنىپتار) سانيتارلىق-ەپيدەميالىق تالاپتاردى ساقتاي وتىرىپ, ارالاس وقىتۋ (پاندەردىڭ 70%-ىن – ءداستۇرلى فورماتتا, 30%-ىن – قاشىقتان) قاراستىرىلادى; مەكتەپ وقۋشىلارى ءۇشىن ساباقتان تىس ۋاقىتتا 5 ادامنان اسپايتىن توپتاردا جەكە كونسۋلتاتسيا ۇيىمداستىرىلادى; II سەمەستردەن باستاپ كوللەدجدەر مەن جوعارى وقۋ ورىندارىنىڭ ءبىرىنشى كۋرس ستۋدەنتتەرىن ارالاس وقىتۋ قايتا باستالادى.
بۇگىنگى تاڭدا ىندەتتىڭ جايىلۋ قارقىنى ودان ءارى ۇدەمەس ءۇشىن كارانتين ءتارتىبىنىڭ ساقتالۋى ۇدايى قاداعالانۋدا. بۇل ماقساتتا ارنايى مونيتورينگ توپتارى كۇشەيتىلگەن رەجىمدە جۇمىس ىستەپ جاتىر. 2020 جىلدىڭ 17 تامىزى مەن 23 جەلتوقسان ارالىعىندا مونيتورينگتىك توپتار 58 600 رەيد جۇرگىزىپ, 259 711 نىساندى تەكسەردى. ناتيجەسىندە 20 286 نىساندا كارانتيندىك شارالاردىڭ بۇزىلعانى انىقتالدى. ماسكا تاعۋ رەجىمىن, جۇمىس رەجىمىن, توپتىق ءىس-شارالاردى وتكىزۋ جانە باسقا دا ءتارتىپ بۇزۋشىلىقتار بويىنشا 18 896 حاتتاما تولتىرىلىپ, 18 588 ادامعا اكىمشىلىك ايىپپۇل سالىندى. 2020 جىلدىڭ جەلتوقسان ايىنىڭ باسىنان نىسانداردى رەيدتىك تەكسەرۋلەر كوبەيدى.
الماتى قالاسىندا كارانتين رەجىمىن بۇزعاندارعا 74,7 ملن تەڭگە ايىپپۇل سالىندى. بۇل قالادا 8 قازان مەن 19 جەلتوقسان ارالىعىندا 590 رەيد جۇرگىزىلىپ, سونىڭ بارىسىندا 4 947 نىسان تەكسەرىلدى. ناتيجەسىندە كارانتين شارالارىن بۇزۋدىڭ 1 065 فاكتىسى انىقتالدى. كارانتين شارالارىن ساقتاماعانى ءۇشىن اكىمشىلىك قۇقىقبۇزۋشىلىق جونىندە 890 حاتتاما تولتىرىلدى. زاڭدى جەكە تۇلعالارعا جالپى سوماسى 74,7 ملن تەڭگە ايىپپۇل سالىندى. جۇيەلى زاڭبۇزۋشىلىقتار بويىنشا 15 ماتەريال سوتقا جىبەرىلدى. سونىمەن قاتار جەكە كاسىپكەر رەنات بيجانوۆقا جانە Suddenly جشس-نا (Hookan Dreems كافە بارى) ارقايسىسىنا 277 800 تەڭگەدەن ايىپپۇل سالىندى, تۇركسىب اۋدانىنداعى نامانگانسكايا كوشەسى, 35 مەكەنجايىندا بويىنشا ورنالاسقان Atlantis بيليارد كلۋبىنىڭ جانە مەدەۋ اۋدانىنداعى قايىربەكوۆ كوشەسى, 35ا مەكەنجايىندا ورنالاسقان Hookan Dreems بار كافەسىنىڭ قىزمەتى
1 اي مەرزىمگە توقتاتىلدى.
حالقى كوپ تاعى ءبىر مەگاپوليسىمىز نۇر-سۇلتان قالاسىندا دا كارانتين ءتارتىبىنىڭ ۇنەمى بۇزىلۋىنا بايلانىستى بىرقاتار ويىن-ساۋىق مەكەمەلەرىنىڭ جۇمىسى توقتاتىلۋى مۇمكىن. بۇگىنگى تاڭدا 8 ماتەريال نۇر-سۇلتان مامانداندىرىلعان اۋدانارالىق اكىمشىلىك سوتىنا جىبەرىلدى. فەميدا قىزمەتشىلەرى قاراعاننان كەيىن Alanya تۇنگى كلۋبى مەن Janym Sol كاراوكە-بارىنىڭ جۇمىسىن توقتاتۋ تۋرالى شەشىم قابىلدادى. سونداي-اق SOVA كاراوكە-بارىنا, Echo بارىنا, ZOLOTO مەيرامحاناسىنا, «ستوريس» دەمالىس ورنىنا قاتىستى ماتەريالدار قاراستىرىلۋدا. Teqila لاۋندج-بارىنا ەكى حاتتاما جاسالعان.
«وتكەن دەمالىس كۇندەرى تىزىمدە كورسەتىلگەن بىرقاتار نىساندارعا قاتىستى بىرنەشە رەت جەدەل حابارلامالار ءتۇسىپ, جوسپاردان تىس تەكسەرۋلەر جۇرگىزىلدى. سول رەيدتەر بارىسىندا بۇزۋشىلىق فاكتىلەرى راستالدى. تەكسەرۋ ناتيجەلەرى بويىنشا ماتەريالدار اكىمشىلىك سوتقا قوسىمشا دالەل رەتىندە جىبەرىلدى», دەدى ەلوردانىڭ باس مەملەكەتتىك سانيتارلىق دارىگەرى جاننا پىراليەۆا.
سونىمەن قاتار مەرەكە كۇندەرى Mega Silk Way ساۋدا ويىن-ساۋىق ورتالىعىنداعى Kango باتۋت ورتالىعى مەن تۇران داڭعىلى, 21 مەكەنجايىنداعى Icon كلۋبىنا قاتىستى بىرنەشە رەت جەدەل حابارلامالار كەلىپ ءتۇستى. بۇعان دەيىن اتالعان نىساندارعا زاڭبۇزۋشىلىقتى جويۋ تۋرالى نۇسقاۋلار بەرىلگەن ەدى. وسى نىساندارعا قاتىستى بۇيرىقتى ورىنداماعانى ءۇشىن اكىمشىلىك قۇقىقبۇزۋشىلىق تۋرالى حاتتاما قاراۋعا اكىمشىلىك سوتقا جىبەرىلەدى.
قالادا اكىمدىك, پوليتسيا, اۋداندىق سانيتارلىق-ەپيدەميالىق باقىلاۋ باسقارمالارى قىزمەتكەرلەرى كاسىپكەرلىك سۋبەكتىلەرىنە كارانتين جانە شەكتەۋ شارالارىنىڭ ساقتالۋىنا بايلانىستى ۇدايى باقىلاۋ جۇرگىزۋدە. شىلدەدەن باستاپ وسى ۋاقىتقا دەيىن
1 297 جەكە, لاۋازىمدى جانە زاڭدى تۇلعالار 261 بۇزۋشىلىقتارى ءۇشىن
296 654 تەڭگەگە اكىمشىلىك جاۋاپكەرشىلىككە تارتىلدى.
ىندەتتىڭ الدىن الاتىن, بەتىن قايتاراتىن بىردەن-ءبىر «قارۋ» ۆاكتسينا ەكەنى انىق. بۇل باعىتتاعى جۇمىستاردان وڭ وزگەرىس بايقالادى. 19 جەلتوقساندا وتاندىق QazCovid-in ۆاكتسيناسىن كلينيكالىق سىناقتان وتكىزۋدىڭ سوڭعى ءىىى ساتىسى باستالدى. ونىڭ شەڭبەرىندە جەلتوقساننىڭ سوڭىندا دەيىن 3 مىڭ ەرىكتى ازاماتقا ەكپە ەگىلەدى. العاشقى ەرىكتىلەرگە الماتى جانە تاراز قالالارىنىڭ كلينيكالارىندا, عزي-دا ۆاكتسينا ەگىلدى. 2021 جىلدىڭ ناۋرىز ايىندا جامبىل وبلىسى قورداي اۋدانىندا جىلىنا قۋاتى 60 ملن مولشەردە ۆاكتسينا شىعارۋعا جەتەتىن بيوفارماتسەۆتيكالىق زاۋىت پايدالانۋعا بەرىلەدى. بۇعان قوسا قاراعاندى قالاسىندا رەسەيلىك «سپۋتنيك V» ۆاكتسيناسىن شىعارۋ ءوندىرىسى ىسكە قوسىلدى.
