قورعانىس مينيسترلىگىنىڭ اسكەري-اۋە كۇشتەرى قولباسشىسىنىڭ بۇرىنعى ورىنباسارى, گەنەرال-مايور اسقار بولدەشوۆ اقمولا گارنيزونى اسكەري سوتىنىڭ ۇكىمىمەن 8 جىل 6 ايعا سوتتالدى. ال ونىڭ سىبايلاسى رەتىندە ايىپتالعان "RG Trade" كومپانياسىنىڭ باسشىسى تالعات جۇماحانوۆ 6 جىلعا تەمىر تورعا قامالدى. بۇل تۋرالى «استانا» تەلەارناسى حابارلادى.
ا.بولدەشوۆ ءساۋىر ايىندا ۇستالعان بولاتىن. قۇزىرلى ورگان اۆياتسيا گەنەرال-مايورىنا "اسكەري تەحنيكالاردىڭ جوندەۋ جۇمىستارىنا بولىنگەن قارجىنى جىمقىردى جانە قىزمەت بابىن اسىرا پايدالاندى" دەگەن ايىپ تاققان ەدى. 8 ايعا سوزىلعان سوت پروتسەسىنە اقمولا گارنيزونى اسكەري سوتىنىڭ توراعاسى نۇكتە قويدى.
قىلمىستىق كودەكستىڭ 380-بابى 2-ءبولىمىنىڭ «ۆ» تارماعى بويىنشا اسكەري سوت اسقار بولدەشوۆتى 8 جىل 6 ايعا باس بوستاندىعىنان ايىرۋعا, جازاسىن جالپى تۇزەۋ مەكەمەسىندە وتەۋگە جانە قىلمىستىق كودەكستىڭ 50 بابى 2 ءبولىمى بويىنشا اسقار بولدەشوۆتى "اۆياتسيا گەنەرال-مايورى" اسكەري شەنىنەن جانە بارلىق مەملەكەتتىك ناگرادالارىنان ايىرۋ جونىندە مەملەكەت باسشىسىنا ۇسىنىس ازىرلەنسىن»-دەدى اقمولا گارنيزونى اسكەري سوتىنىڭ توراعاسى داۋلەت مولداباەۆ.
ايىپتالۋشىلار اسقار بولدەشوۆ پەن تالعات جۇماحانوۆ سوت ۇكىمىمەن كەلىسپەيدى. ا.بولدەشوۆتىڭ ايتۋىنشا, بۇل شىتىرمان وقيعانىڭ ارتىندا تۇرعان تۇلعالار بار. ياعني الدەكىمدەردىڭ مۇددەلىك تانىتۋىمەن جۇزەگە اسىپ وتىر. ءتىپتى ول "لاۋازىمىما كوز تىككەندەر بار" دەگەن بولجامىن دا جاسىرمادى.
سونىمەن, اۋە اسكەري گەنەرالى "اسكەري تەحنيكانى جوندەۋ توڭىرەگىندەگى الاياقتىقتارعا قاتىسى بار" دەگەن ايىپتى تولىعىمەن جوققا شىعارىپ وتىر. ايتا كەتەيىك, قاماۋعا الىنعان تۇستا ا.بولدەشوۆ قورعانىس مينيسترلىگى باس ينسپەكتسياسىنىڭ باس ينسپەكتورى قىزمەتىنە تاعايىندالعان ەدى. ەندىگى جەردە ۇكىممەن كەلىسپەگەن ايىپتالۋشى تاراپ سوتقا قايتا شاعىم تۇسىرۋگە بەكىنىپ وتىر.
باقىتبەك كەنەش ۇلى.
دەرەككوز: «استانا» تەلەارناسى
