«التىن كورسە, پەرىشتە جولدان تايادى» دەۋشى ەدى باياعىنىڭ قاريالارى. بۇگىندە اتىراۋدا تەڭگە كورسە, جەمساۋى بۇلكىلدەپ تۇراتىن پاراقورلار قاتارى ازايار ەمەس. وسى ايتقانىمىزعا وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ تومەندەگى مالىمەتتەرى ايقىن دالەل بولماق.
«التىن كورسە, پەرىشتە جولدان تايادى» دەۋشى ەدى باياعىنىڭ قاريالارى. بۇگىندە اتىراۋدا تەڭگە كورسە, جەمساۋى بۇلكىلدەپ تۇراتىن پاراقورلار قاتارى ازايار ەمەس. وسى ايتقانىمىزعا وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ تومەندەگى مالىمەتتەرى ايقىن دالەل بولماق. قارجى پوليتسەيلەرى تاراپىنان اتىراۋ وبلىستىق توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسىنىڭ باستىعى ن.عا جانە وسى دەپارتامەنتتىڭ تەحنيگى ا.عا قاتىستى قر قك-ءنىڭ پارا الۋ جانە پارا الۋعا جاردەمدەسۋ دەرەگى بويىنشا 2 قىلمىستىق ءىس قوزعالعان. ويتكەنى, توتەنشە جاعدايلار دەپارتامەنتىنىڭ اتىنا كىر كەلتىرگەن قوس قىزمەتكەر مەملەكەتتىك قىزمەتتى اتقارۋعا ۋاكىلەتتى جانە تەڭەستىرىلگەن لاۋازىمدى تۇلعا بولا تۇرا, ءبىر سەرىكتەستىكتىڭ اۆتوماتتاندىرىلعان ءورت دابىلداماسىن پايدالانۋعا قابىلداۋ اكتىسىنە جىلدامداتىپ جانە كەدەرگىسىز كەلىسىم بەرۋ ءۇشىن 30 000 تەڭگە پارا العان.
پارا الۋ فاكتىسىنە بايلانىستى تاعى ءبىر دەرەككە توقتالار بولساق, اتىراۋ قالالىق سالىق باسقارماسىنىڭ جەڭىلدەتىلگەن تاراتۋدى جۇرگىزۋ ءبولىمىنىڭ جەتەكشى مامانى جەڭىل تابىس تابۋدىڭ جاڭا ءبىر ءتۇرىن ويلاپ تاۋىپتى. ءسىرا, جەتەكشى مامان «ادامنان قۋلىق ارتىلعان با» دەگەندى جادىنا مىقتاپ تۇيگەن سەكىلدى. ناقتىلاي ايتقاندا, ول قىزمەتتىك وكىلەتتىگىنە كىرەتىن پارا بەرۋشىنىڭ پايداسىنا جاساعان ءىس-ارەكەتىنە, ياعني, جەكە كاسىپكەرلىكتى تاراتۋ كەزىندە ايىپپۇل مەن وسىماقىنى ەسەپتەمەۋ ءۇشىن 80 800 تەڭگە پارانى ءوزىنىڭ «قازاقستان حالىق بانكى» اق-تاعى كارتالىق شوتىنا اۋدارتۋ ارقىلى العان.
قازىر پارا الۋشىلارعا قاتىستى قوزعالعان قىلمىستىق ىستەر سوتقا جولداندى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
