الەمدىك ەكونوميكالىق دامۋدا شاعىن جانە ورتا بيزنەستىڭ ۇلەسى مول. سوندىقتان دا ىلگەرىلەۋگە باعىت ۇستاعان ەلدەر كاسىپكەرلىكتى مەيلىنشە دامىتۋعا تىرىسادى. دامىعان وتىز ەلدىڭ قاتارىنا ەنۋگە قادام باسقان قازاقستان دا كاسىپكەرلىكتى دامىتۋدىڭ سونى سوقپاقتارىنا ءىز سالۋدا دەسەك ارتىق ايتقاندىق بولا قويماس. مۇنى شاعىن جانە ورتا بيزنەس نىساندارىنىڭ سانى ارتىپ, ەكونوميكالىق الەۋەتىمىزدىڭ جىل وتكەن سايىن نىعايىپ كەلە جاتقانى دا دالەلدەيدى.
الەمدىك ەكونوميكالىق دامۋدا شاعىن جانە ورتا بيزنەستىڭ ۇلەسى مول. سوندىقتان دا ىلگەرىلەۋگە باعىت ۇستاعان ەلدەر كاسىپكەرلىكتى مەيلىنشە دامىتۋعا تىرىسادى. دامىعان وتىز ەلدىڭ قاتارىنا ەنۋگە قادام باسقان قازاقستان دا كاسىپكەرلىكتى دامىتۋدىڭ سونى سوقپاقتارىنا ءىز سالۋدا دەسەك ارتىق ايتقاندىق بولا قويماس. مۇنى شاعىن جانە ورتا بيزنەس نىساندارىنىڭ سانى ارتىپ, ەكونوميكالىق الەۋەتىمىزدىڭ جىل وتكەن سايىن نىعايىپ كەلە جاتقانى دا دالەلدەيدى. بۇل باعىتتا جاستارعا مول سەنىم ارتىلاتىنى دا جاسىرىن ەمەس. العىر ويلى, ءىستىڭ تەتىگىن بىلەتىن جاستار ەلدىڭ ەرتەڭى ەكەنى ءسوزسىز. ارينە, بۇل باعىتتا ولاردىڭ ءوزارا تاجىريبە الماسىپ, ورتاق ويلاسۋىنىڭ دا ماڭىزى زور. وسى تۇرعىدان كەلگەندە اقتوبە قالاسىندا وتكەن «ىسكەر جاستار» اتتى جاس كاسىپكەرلەردىڭ ءبىرىنشى شەكاراارالىق بيزنەس فورۋمى ناتيجەلى بولدى. ونى وبلىستىق جاستار ساياساتى ماسەلەلەرى باسقارماسىنىڭ مەملەكەتتىك الەۋمەتتىك تاپسىرىسى بويىنشا «كونتاكت» زەرتتەۋلەر مەن جوبالار ورتالىعى» قوعامدىق بىرلەستىگى قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەس اياسىندا ۇيىمداستىردى. فورۋمعا اقتوبە, اتىراۋ, باتىس قازاقستان جانە رەسەيدىڭ كورشىلەس ورىنبور وبلىسىنان جاس كاسىپكەرلەر قاتىستى. فورۋمنىڭ ماقساتى اياعىنان نىق تۇرىپ كەتكەن بيزنەسمەندەرمەن جاس كاسىپكەرلەردى جولىقتىرىپ, ءوزارا پىكىر الماسۋىنا جاعداي جاساپ, جاس بۋىن مەن ورتا بۋىن اراسىندا تاجىريبە الماسۋعا مۇرىندىق بولۋ, جاستار كاسىپكەرلىگىنىڭ باستى باعىتتارىن ايقىنداۋ, ولاردىڭ كاسىپكەرلىككە دەگەن قۇلشىنىسىن وياتۋ جانە جاستار اراسىندا كاسىپكەرلىكتىڭ دامۋ قارقىنىن ارتتىرۋ بولىپ تابىلادى. جاس كاسىپكەرلەر باس قوسقان القالى جيىندى وبلىس اكىمىنىڭ ورىنباسارى سارا نۇرقاتوۆا اشىپ, فورۋم جۇمىسىنا ساتتىلىك تىلەدى. ول سونداي-اق, جاستاردىڭ كاسىپكەرلىكتىڭ قىر-سىرىن مەڭگەرۋى ءۇشىن بارلىق جاعداي جاسالىپ وتىرعانىن جەتكىزە كەلىپ, ولارعا جاڭاشا ويلاۋ قاجەتتىگىن, ءبىلىمدى جانە ىزدەنىمپاز بولۋ كەرەكتىگىن العا تارتا سويلەدى. جاڭا تەحنولوگيالاردى يگەرۋگە تالپىنۋ, بيزنەستى ءتيىمدى ۇيىمداستىرا ءبىلۋ عانا تابىسقا جەتكىزەتىنىن تىلگە تيەك ەتتى.
جاس كاسىپكەرلەردىڭ جيىنى بارىسىندا يزرايل مەملەكەتىنىڭ ديپلوماتيالىق ۆەدومستۆو باسشىسىنىڭ ورىنباسارى حەزي كەينانمەن بەينە-لينك ۇيىمداستىرىلدى. ءوز بيزنەس جوباسىن جۇزەگە اسىرۋعا مەملەكەتتىك گرانت العان رەسەيدىڭ جاس بيزنەسمەنى ا.پوروشينا, «دامۋ» كاسىپكەرلىكتى دامىتۋ قورى» اق اقتوبە فيليالىنىڭ ديرەكتورى جەدەلبەك مىرزاعاليەۆ, اقتوبەلىك جاس ميلليونەر مارات ابيەۆ جانە باسقالارى شىعىپ سويلەپ, كاسىپكەرلىك تۋرالى ويلارىن ورتاعا سالدى. شارا بارىسىندا «سىبايلاس قىلمىس – شاعىن جانە ورتا بيزنەسكە كەدەرگى» اتتى پلاكاتتار بايقاۋىنىڭ قورىتىندىسى شىعارىلىپ, جەڭىمپازدار ماراپاتتالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
