ءتاتتىنى كىم جەك كورەدى. ناننىڭ ءجونى بولەك, ال كامپيت, پەچەنە, تورت داستارقاننىڭ ءسانى ەمەس پە؟ جانگەلدين اۋدانىندا, قوستاناي قالاسىنان 600 شاقىرىم قاشىقتا جاتقان تورعاي كەنتىندە بۇرىن كونديتەر تسەحى بولعان ەمەس ەدى. شوكولاد, كارامەل كامپيتتەرى, پەچەنەنىڭ سان ءتۇرى قوستاناي قالاسىنداعى «بايان سۇلۋ» كونديتەر فابريكاسىندا وندىرىلەدى. بىراق بۇلاردان باسقا دا ءتاتتىنىڭ ءتۇرى تولىپ جاتىر عوي.
ءتاتتىنى كىم جەك كورەدى. ناننىڭ ءجونى بولەك, ال كامپيت, پەچەنە, تورت داستارقاننىڭ ءسانى ەمەس پە؟ جانگەلدين اۋدانىندا, قوستاناي قالاسىنان 600 شاقىرىم قاشىقتا جاتقان تورعاي كەنتىندە بۇرىن كونديتەر تسەحى بولعان ەمەس ەدى. شوكولاد, كارامەل كامپيتتەرى, پەچەنەنىڭ سان ءتۇرى قوستاناي قالاسىنداعى «بايان سۇلۋ» كونديتەر فابريكاسىندا وندىرىلەدى. بىراق بۇلاردان باسقا دا ءتاتتىنىڭ ءتۇرى تولىپ جاتىر عوي.تورعايلىقتار توي-تومالاق بولا قالسا, ءتاتتىنىڭ بارلىعىن شالعايدا جاتقان قوستانايدان, ودان جاقىنداۋ ارقالىق قالاسىنان تاسيتىن. ەندى تورعايلىقتار الىستان اربالاپ تورت تاسىمايتىن بولدى. «بيزنەستىڭ جول كارتاسى-2020» باعدارلاماسىنىڭ شەڭبەرىندە اۋدان ورتالىعىندا كونديتەر تسەحى اشىلدى. ول جەرگىلىكتى كاسىپكەر جانىبەك زەينۋلليننىڭ وسى باعدارلامادان ۇتىپ العان 2,7 ميلليون تەڭگە گرانتىنىڭ ارقاسىندا مۇمكىن بولدى.
كونديتەر تاعامدارىن دايىندايتىن پەش, باسقا دا زاماناۋي جابدىقتار ساتىپ الىندى. رەسەيدەن شىققان ارنايى كرەم, قامىر دايىندايتىن قۇرالدار قۇراستىرىلدى. نەگىزى كونديتەر تاعامدارىنىڭ ءوزى ناعىز شىعارماشىلىق جۇمىسپەن قاتار. ونىڭ تولىپ جاتقان «قۇپيالارى» بولاتىنى انىق. سوندىقتان, تسەح جۇمىسىن باستاماي تۇرىپ, وبلىس ورتالىعىنان وسى سالانىڭ مامانى شاقىرىلدى. كاسىپكەرلەر ءوز جۇمىسشىلارىن قوستانايعا اپارىپ وقىتقاننان گورى, ماماندى تورعايعا شاقىرعاننىڭ ارزانعا تۇسەرىنە دەيىن ەسەپتەپ قويعان. بيزنەسپەن اينالىسقىسى كەلەتىن اۋىلداعى كاسىپكەرلەر قازىر الدىمەن اقشا ساناۋدى ۇيرەنۋ كەرەكتىگىمەن كەلىسكەن.
– تسەحتا ءتاتتى تاعامداردىڭ 17 ءتۇرىن پىسىرەمىز. بۇل ءۇشىن پەچەنەلەردىڭ فورمالارى تاعى دا اكەلىنەدى. ونىڭ ۇستىنە تورتتى, پيروجنىيدى قوسىڭىز. تورتتىڭ نەشە ءتۇرىن گۇلدەپ پىسىرەتىن بولامىز, – دەيدى «يپ زەينۋللين» جەكە كاسىپورنىنىڭ قىزمەتكەرى گۇلشات مۇحامەدعاليەۆا.
كاسىپكەردىڭ ۇتىپ العان گرانتىنىڭ قارجىسى تۇگەلدەي كونديتەر جابدىقتارىن الۋعا جۇمسالدى. ونىڭ سىرتىندا تسەح ورنالاسقان عيماراتتى جوندەۋ, جاماپ-جاسقاۋ جۇمىستارىنا كاسىپكەر قالتاسىنان 1 ميلليون 300 مىڭ تەڭگە جۇمسادى. ول بۇل قارجىنىڭ قايتارىمى بولارىنا سەنىمدى. ەڭ باستىسى, كونديتەر تسەحىنىڭ تورعايلىقتار ءۇشىن قاجەتتىلىك ەكەنىنە بەرىك سەنىمى بار. قوستانايدان, ارقالىقتان تاسىلاتىن تورتتار مەن باسقا تاتتىلەر ەندى اۋداننىڭ وزىندە ءوندىرىلىپ جاتسا, ونىڭ جۇرتشىلىق ءۇشىن باعاسى ارزاندايدى ءارى ساپاسى دا جوعارى بولادى.
«بيزنەستىڭ جول كارتاسى-2020» باعدارلاماسىنىڭ تورعايلىقتار ءۇشىن بەرەرى تەك بۇل ەمەس. وسى كونديتەر تسەحىنىڭ وزىنەن بىرنەشە جۇمىس ورنى اشىلدى. ءۇش ناۋبايشى, ءۇش كۋلينار جانە ءبىر تەحنولوگ وسى تسەح جۇمىسىن ورگە باستىرىپ قانا قويماي, ءوز ناپاقاسىن دا وسىدان تاباتىن بولادى.
– تورعايدا كاسىپكەرلىككە دەگەن ۇمتىلىس سوڭعى جىلدارى ارتىپ كەلەدى. بيىل «بيزنەستىڭ جول كارتاسى-2020» باعدارلاماسى بويىنشا اۋدان قاتارىنان ەكى گرانت ۇتىپ الدى. ءبىرى كونديتەر تسەحى بولسا, ەكىنشىسى, پلاستيك تەرەزەلەر جاسايتىن «جالىن» جەكە كاسىپورنى. قىس ايلارىندا بۇل كاسىپورىن جۇمىسىن توقتاتۋعا تۋرا كەلەدى, بىراق كۇن جىلىنىسىمەن ونىڭ جۇمىسى قىزادى. قازىر اۋىلداعىلار توزىپ تۇرعان تەرەزەلەرىن پلاستيككە اۋىستىرىپ جاتىر, ونىڭ ۇستىنە اراگىدىك بولسا دا ءۇي سالىپ جاتقاندار دا بار, – دەيدى جانگەلدين اۋداندىق ونەركاسىپ جانە كاسىپكەرلىك ءبولىمىنىڭ مەڭگەرۋشىسى سايان شايىموۆ.
كاسىپكەر بولعىڭ كەلسە, كادىمگى شارق ۇرعان ىزدەنىستە بولۋىڭ شارت. تورعايدا مۇنداي ادامدار دا بار. ميداي دالاعا باق وسىرگىسى كەلەتىندەر جوق ەمەس. تورعايدا الما, ورىك, جيدەك وسسە, ونىڭ دۇكەندەر سورەسىندە سىقاپ تۇرعان افريكالىق تسيترۋس جەمىستەرىنەن, ەۋروپادان اكەلىنگەن ءيسى, ءدامى جوق, سىرتى ويىنشىقتاي كورىنەتىن الما, المۇرتتاردان نەسى كەم بولار ەدى؟ وسى وي سوناۋ شەتتەگى قابىرعا وزەنىنىڭ بويىندا جاتقان كوكالات اۋىلىنىڭ تۇرعىنى بولات يبىكەنوۆتى ءبىرازدان «قاۋجاپ» جۇرسە كەرەك. «سورتاڭ توپىراقتى دالاعا جەمىس ءوسۋشى مە ەدى؟» دەيتىندەرگە بولاتتىڭ قارسى قويار دالەلى بار. ونىڭ ءۇيىنىڭ الدىندا باق جايقالىپ تۇر. بوكەڭ «بيزنەستىڭ جول كارتاسى-2020» باعدارلاماسىنىڭ گرانتىنا ءوزىنىڭ جەمىس باعى تۋرالى جوباسىن دايىنداپ جاتىر.
سوناۋ 90-جىلدارى وسى كوكالاتتان اۋىلداستار ۇدەرە كوشكەندە, جيىرماشاقتى ءۇي وتىرىپ قالعان. سايىن دالادا وازيس سەكىلدى كورىنەتىن شاعىن اۋىل قايتادان وركەن جايىپ كەلەدى. بىلەتىندەرگە كوكالاتتىڭ جەمسىز, شوپكە سەمىرەتىن مالىنىڭ ءدامى, وزەن بويىنا ەگىپ الاتىن باقشاسىنىڭ كەرەمەتى بەلگىلى. ەندى بولاتتىڭ ىزدەنىسىنىڭ, تاۋەكەلىنىڭ ارقاسىندا مۇندا الما باعىنىڭ جايقالماۋىنا كىم كەپىلدىك بەرەدى؟! «بيزنەستىڭ جول كارتاسى-2020» باعدارلاماسى قول ۇشىن بەرسە تالاي كەرەمەتتەر جاسالادى. العا!
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
جانگەلدين اۋدانى.
