ەلباسى نۇرسۇلتان نازارباەۆ ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى راشيد تۇسىپبەكوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ەلباسى نۇرسۇلتان نازارباەۆ ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى راشيد تۇسىپبەكوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ر.تۇسىپبەكوۆ مەملەكەت باسشىسىن اگەنتتىكتىڭ بيىلعى 10 ايداعى قىزمەتىنىڭ قورىتىندىلارى تۋرالى حاباردار ەتتى.
كەزدەسۋ بارىسىندا نۇرسۇلتان نازارباەۆ سىبايلاس جەمقورلىقتى قابىلداۋ يندەكسى رەيتينگىندە ەلىمىزدىڭ پوزيتسياسى تومەندەگەنىن اتاپ كورسەتتى.
– رەيتينگتىڭ ناشارلاۋى بۇل باعىتتاعى جۇمىس قارقىنىنىڭ تومەندەگەنىن نەمەسە اگەنتتىكتىڭ قىزمەتىندە ءتيىستى ەسەپ جۇرگىزىلمەيتىنىن بىلدىرەدى. جەرگىلىكتى جەرلەردە تۇرعىندار سىبايلاس جەمقورلىقتىڭ احۋالىنان جاقسى حاباردار, سولارمەن تىعىز جۇمىس ىستەۋ قاجەت. وعان قوسا, بۇل ىسپەن «نۇر وتان» پارتياسىنىڭ وكىلدىگى اينالىسۋدا, ولارعا مۇنداي فاكتىلەردى جۇرت حابارلاپ وتىرادى. ەگەر وسىنداي ەسكەرتۋلەر نازاردان تىس قالدىرىلماي, تەكسەرىس جۇرگىزىلىپ, ءىس سوڭىنا دەيىن جەتكىزىلسە, وندا بۇل سىبايلاس جەمقورلىققا قارسى ناقتى ءىس-قيمىل بولادى, – دەدى قازاقستان پرەزيدەنتى.
مەملەكەت باسشىسى جەمقورلىقتى جويۋ ءۇشىن جالعىز اگەنتتىكتىڭ نەمەسە قۇقىق قورعاۋ ورگاندارىنىڭ كۇشى جەتكىلىكسىزدىگىن, جۇيەلى شارالار قاجەت ەكەنىن اتاپ ءوتتى.
– جىلدان-جىلعا ەكونوميكالىق, زاڭنامالىق جاعدايلار جاقسارا تۇسۋدە, تەكسەرىستەر سانى قىسقارۋدا. شەنەۋنىكتەر مەن تۇرعىندار اراسىندا بايلانىس ازايىپ, ەڭبەكاقى مولشەرى ارتىپ كەلەدى. وسىنىڭ ءبارى سىبايلاس جەمقورلىققا قارسى تۇرۋعا باعىتتالعان. كورسەتكىشتەردى جاساندى تۇردە كوتەرۋدىڭ قاجەتى جوق, سىبايلاس جەمقورلىققا قارسى بارلىعى سەزىنەتىن, ناعىز كۇرەس ءجۇرگىزىلۋى ءتيىس, – دەدى نۇرسۇلتان نازارباەۆ.
اگەنتتىك توراعاسى سىبايلاس جەمقورلىققا قارسى ءىس-قيمىل ءماسەلەلەرى بويىنشا بىرقاتار حالىقارالىق جانە قازاقستاندىق قوعامدىق ۇيىمدارمەن ىنتىماقتاستىق تۋرالى ايتتى جانە بۇل جۇمىستار جالعاساتىنىن مالىمدەدى.
ر.تۇسىپبەكوۆ اگەنتتىك ءوز جۇمىسىنىڭ بىرقاتار باعىتتارى بويىنشا كورسەتكىشتەردى جاقسارتقانىن دا باياندادى.
– بيىلعى جىلدىڭ باسىنان بەرى سىبايلاس جەمقورلىق قىلمىس جاساعان 900 تۇلعاعا, سونداي-اق, مەملەكەتتىك فۋنكتسيالاردى ورىنداۋعا ۋاكىلەتتى لاۋازىمدى تۇلعالار مەن ولارعا تەڭەستىرىلگەن تۇلعالارعا قاتىستى 1333 قىلمىستىق ءىس قوزعالدى. سونىڭ ىشىندە, رەسپۋبليكالىق جانە وبلىستىق دەڭگەيدەگى 120-دان استام لاۋازىمدى تۇلعا جاۋاپكەرشىلىككە تارتىلدى. كولەڭكەلى ەكونوميكا بويىنشا, ءسىزدىڭ تاپسىرماڭىزعا سايكەس, ءبىز الكوگولدىڭ, مۇنايدىڭ زاڭسىز اينالىمىنا, جالعان كاسىپورىندارعا قارسى كۇرەستى كۇشەيتتىك. جالپى, 4652 قىلمىس انىقتالدى. بۇگىندە وسى جۇمىستىڭ بارلىعى ناتيجەسىن بەرۋدە, – دەدى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى.
كەزدەسۋ قورىتىندىسىندا مەملەكەت باسشىسى قارالعان ءماسەلەلەر بويىنشا بىرقاتار ناقتى تاپسىرمالار بەردى.
