تاريح • 16 جەلتوقسان، 2020

قالامگەردىڭ وجەت قىزى

3568 رەت كورسەتىلدى

جەلتوقسان وقيعاسى (1986 جىل) كەزىندە ەڭگەزەردەي ءۇش ساقشىنىڭ قورشاۋىندا، كانىگى اڭشىنىڭ قولىنا تۇسكەن ەلىكتىڭ لاعىنداي ۇركە-قورقىپ، لەكىتە باسىپ بارا جاتقان وسى قازاق قىزىنىڭ فوتوسى كوپكە ايان. بۇل ادامدى قازىر ەلدىڭ كوبى تانيدى. الماتى قالاسىنىڭ تۇرعىنى – انار تولەگەنقىزى راحىمجانوۆا.

اناردىڭ تۋعان جەرى – شىعىس قازاقستان وبلىسى، كاتونقاراعاي اۋدانى. اكەسى تولەگەن راحىمجانوۆ كوپ جىل مەكتەپ ديرەكتورى مىندەتىن اتقارعان ولكەگە وتە تانىمال پەداگوگ. ماماندىعى ادەبيەتشى. كەزىندە كازگۋ-دە ءبىلىم العان. توكەڭنىڭ ديپ­لوم جۇمىسىنا اكادەميك مۇحتار اۋەزوۆ جەتەكشىلىك ەتكەن ءھام جوعارى باعا بەرگەن. 2010 جىلى دۇنيەدەن وتكەن قالامگەردىڭ ارتىندا «تۋعان جەر، سەنى جىرلايمىن»، «بۋىرقانعان بۇقتىرما»، «اسىل دارىن» اتتى جىر جيناقتارى جانە «ولەڭمەن ورىلگەن ءومىر» اتتى ەستەلىگى قالدى.

ادەبيەتشى-قالامگەر وتباسىندا تۋىپ، قازاقى تاربيەگە قانىعىپ وسكەن انار قارىنداسىمىز دا اكە جولىن قۋىپ ادە­بيەتشى بولماققا نيەت ەتكەنىمەن جولى بولا قويماپتى. سودان 1985 جىلى الماتى قالاسىنا كەلىپ قۇرىلىستا نەسىبەسىن ايىرىپ جۇرگەن. جەلتوقسان داۋىلى كوتەرىلگەن 17-ءسى كۇنى انار قىز قاسىندا سىنىپتاسى گۇلشات بار، جاستارمەن بىرگە الاڭعا ەنتەلەپ جەتىپ بارماي ما. حالىق كوپ.

 – ءتۇس اۋىپ قالعان كەز ەدى، – دەپ ەسكە الادى قارىنداسىمىز: – جاستار مەن ميليتسيانىڭ قاقتىعىسى باستالىپ كەتتى. اپىر-توپىردا قۇربىم گۇلشاتتان كوز جازىپ قالدىم. قولدارىندا سويىلدارى بار توپ جاساق جاس­تاردى كەرى تىقسىرعان كەزدە، مەن مۇزعا تايىپ ۇشىپ ءتۇستىم. دەرەۋ ءۇش ميليتسيا مەنى جۇلقىپ تۇرعىزىپ، سۇيرەپ الا جونەلدى. ء«وزىم جۇرەمىن» دەپ ايقاي سالعانىم ەسىمدە... ارادا جىلدار ءوتتى. 2010 جىلدىڭ ءبىر كۇنى جاڭاقورعان اۋدانىندا تۇرىپ جاتقان قۇربىم گۇلشات حابارلاس­تى. ول «گازەتتەردە جاريالانىپ جۇرگەن سۋرەتىڭدى كوردىڭ بە؟» دەدى. «جوق، ول قانداي گازەت؟» دەرەۋ گازەتتى تاۋىپ الىپ قاراسام، ءبىر توپ ميليتسيانىڭ قورشاۋىندا ايدالىپ بارا جاتقان ءدال ءوزىم. ۇستىمدە شاقپاق پالتو. شاشىم قيىلعان، بۇيرا. ويتكەنى ەكى كۇن بۇرىن شاشىمدى قيىپ، حيميا سالدىرعانمىن. مەنى ۇستاپ الىپ كەتىپ بارا جاتقان كەزدە الاڭدا سۋرەتكە ءتۇسىرىپ الىپتى. بۇل سۋرەتتىڭ تاريحى وسى، – دەدى انار راقىمجانوۆا.

انار تولەگەنقىزى قازىر الماتىدا تۇرادى، شاعىن ساۋدا نۇكتەسى بار. جولداسى مارات بايەكەنوۆ ەكەۋى بالا-شاعاسىن ءوسىرىپ، امان-ەسەن ءجۇرىپ جاتىر.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار