كەلەر جازدا بىرنەشە جاڭا تۋريستىك نىسان قىزمەتىن باستايدى دەپ كۇتىلۋدە. اۋەلى اۋماعى ات شاپتىرىم, قاسيەتتى ابىلاي حان الاڭىندا ەل تاريحىن ەكشەپ, قولمەن قويعانداي ەتىپ باياندايتىن كورنەكتى كورمە اشىلماق. الاڭدا ايبارلى حاندار مەن ەل قورعاعان باتىرلاردىڭ ماڭگى ولمەس ءىزى جاتىر. ەرلىك سورابى ەل ەسىنەن ەش ۋاقىتتا وشپەۋى كەرەك. سوندىقتان, بۇل ورايدا مۋلتيمەديالى-ينتەراكتيۆتى پاركتىڭ اشىلۋى سان سانانى سىلكە جاڭعىرتىپ, وتكەننىڭ وڭدى ءىسىن ەسكە سالادى دەپ كۇتىلۋدە. جوبانىڭ جالپى قۇنى 4,2 ملرد تەڭگەنى قۇرايدى. الداعى جازدا پايدالانۋعا بەرىلمەك.
تالايدى تامساندىرار قۋاتى بار اقبۋرا كەشەنىنىڭ قۇرىلىسى جالعاسۋدا. ءبىر ەرەكشەلىگى, بۇل نىسان شۆەيتساريالىق تۋريستىك تاجىريبەنى نەگىزگە الىپ وتىر. تابيعي كوركى الەمنىڭ كەز كەلگەن جەرىندەگى سۇلۋلىقپەن تارازى باسىنا تۇسە الاتىن بۇل ولكە ۇزدىك تاجىريبەنى ۇشتاستىرسا, باعى جانىپ, باعاسى ارتا تۇسەرى ءسوزسىز. دەمالىس ورنىنىڭ العاشقى كەزەڭى جازعى تۋريزم كەزىندە پايدالانۋعا بەرىلسە, جوبانىڭ تياناقتى اتقارىلىپ, ءتورتىنشى كەزەڭىن جۇزەگە اسىرۋ بىرنەشە جىلعا سوزىلۋى ابدەن مۇمكىن. كەشەن اۋماعى ۇلكەن شاباقتى مەن تەكە كولىنىڭ جاعالاۋلارىنداعى 230 گەكتاردان استام جەردى الىپ جاتىر. ءبىر-بىرىنە ماعىنا ۇستەمەلەيتىن ءتورت كەزەڭنەن تۇرادى. ەڭ باستىسى, اتالمىش نىسان تولىق قۋاتىنا ەنگەن كەزدە جاڭادان ءۇش مىڭ جۇمىس ورنى اشىلماق. الاقانداي اۋدان حالقى ءۇشىن تاماشا ولجا.
– قازىردەن باستاپ بۇل نىساندى بىلىكتى ماماندارمەن قامتۋ ماسەلەسىن دە ەگجەي-تەگجەيلى ويلاستىرۋدامىز, – دەيدى «AQBURA DEVELOPMENT» سەرىكتەستىگىنىڭ ديرەكتورى ساپار بەگايداروۆ, – شۆەيتساريادان ارنايى كومپانيا وكىلدەرى كەلىپ كاسىبي ءبىلىم بەرمەك.
ازىرگە دەمالىس ورنىنا 4 ملرد تەڭگە كولەمىندە ينۆەستيتسيا قۇيىلعان. العاشقى كەزەڭدە تاۋلىگىنە 200 دەمالۋشىعا دەيىن قابىلداۋعا مۇمكىندىگى بار. جوبا جەتەكشىسى ساپار بەگايداروۆتىڭ ايتۋىنا قاراعاندا, نىساننىڭ كەلەسى دامۋ كەزەڭدەرىنە قارجى سالۋعا ىنتالى ينۆەستورلار از ەمەس ەكەن. دەمەك, بۋراباي باۋرايى بۇرىنعى كەيپىنەن دە كوركەيە ءتۇسۋى ابدەن مۇمكىن.
اقمولا وبلىسى,
بۋراباي اۋدانى
