ايماقتار • 13 جەلتوقسان، 2020

جامبىل وڭىرىندە كورسەتكىشتەر قانداي دەڭگەيدە؟

31 رەت كورسەتىلدى

قازىرگى كەزدە مەملەكەت قازىناسىنان وڭىرلەرگە ءتيىستى قاراجات ءبولىنىپ وتىر. الايدا، اتقارىلعان جۇمىس بولىنگەن اقشانىڭ كولەمىنە ساي بولۋى كەرەك. ال، بۇل كورسەتكىش جامبىل وبلىسىندا قاي دەڭگەيدە؟ جۋىردا ش.مۇرتازا اتىنداعى "رۋحانيات جانە تاريحتانۋ" ورتالىعىندا وبلىس اكىمى بەردىبەك ساپارباەۆ ايماقتاعى بىرقاتار باسشىلاردىڭ يدەولوگيالىق سالادا اتقارىلعان جۇمىستارىنىڭ ەسەبىن  تىڭدادى، دەپ حابارلايدى Egemen.kz

وبلىستىق ىشكى ساياسات باسقارماسى باسشىسىنىڭ ورىنباسارى ماقپال دوسىمبەكوۆا مەملەكەت باسشىسىنىڭ قولداۋىمەن وڭىردە "بەيبىتشىلىك پەن كەلىسىم» جوباسى جۇزەگە اسىرىلۋدا ەكەنىن، تۇرعىنداردىڭ نارازىلىعىن تۋدىرۋى مۇمكىن وزەكتى ماسەلەلەردى ەسكەرە وتىرىپ، قاۋىپ-قاتەرلەر كارتاسى ازىرلەنگەنىن، "اسارلاتىپ ءۇي سالۋ" جوباسى اياسىندا 123 ءۇيدىڭ قۇرىلىسى باستالىپ، بۇگىنگى تاڭدا 60 ءۇيدىڭ كىلتى تابىستالعانىن، ال، "ۇلگىلى اۋىل" بايقاۋىنا 13 اۋىل قاتىسقانىن باياندادى. سونىمەن قاتار، وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆتىڭ ايتۋىنشا، اعىمداعى جىلى اتالعان سالانى دامىتۋعا 5،8 ميلليارد تەڭگە بولىنگەن. سپورتپەن جۇيەلى شۇعىلداناتىن جامبىلدىقتاردىڭ سانى 359،3 مىڭ ادامدى قۇرايدى. بۇل ورايدا، وبلىس تۇرعىندارى ءۇشىن قولجەتىمدى 2590 سپورت نىسانى جۇمىس ىستەپ تۇر. سپورتتىڭ ءار ءتۇرى بويىنشا ەلىمىزدىڭ ۇلتتىق قۇراماسىنىڭ قۇرامىنا 1121 جامبىلدىق سپورتشى ەنگەن. باسقارما باسشىسى ءبىر جاتتىقتىرۋشىعا قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، 42 سپورتشىعا ەلىمىزدىڭ سپورت شەبەرى، ەكى سپورتشىعا حالىقارالىق دارەجەدەگى سپورت شەبەرى، ءبىر مامانعا ۇلتتىق سپورت تۇرلەرى بويىنشا سپورت شەبەرى اتاعى بەرىلگەنىن جەتكىزدى. ال، 23 مامان جوعارى ساناتتاعى جاتتىقتىرۋشىلار اتانعان. سونداي-اق، توكيو وليمپياداسىنا جولداما العان دزيۋدوشى ەلدوس سمەتوۆ، ەركىن كۇرەس شەبەرى الىشەر ەرعالي، بوكسشى ءابىلحان امانقۇل ءوڭىرىمىزدىڭ ماقتانىشى ەكەنىن دە اتاپ ءوتتى.

سونىمەن قاتار، وبلىستىق مادەنيەت، ارحيۆتەر جانە قۇجاتتاما باسقارماسى باسشىسىنىڭ مىندەتىن اتقارۋشى سارا ماديەۆا اعىمداعى جىلى وبلىستىڭ مادەنيەت سالاسىنا 7،1 ميلليارد تەڭگە، ال "جۇمىسپەن قامتۋدىڭ جول كارتاسى-2020" باعدارلاماسى اياسىندا 499،4 ميلليون تەڭگە ءبولىنىپ، يگەرىلۋدە ەكەنىن ايتتى. "اۋىل – ەل بەسىگى" باعدارلاماسى بويىنشا جالپى كولەمى 660 ميلليون تەڭگەگە ءۇش مادەني نىساننىڭ قۇرىلىسى جۇزەگە اسىرىلۋدا ەكەن. ال، "تسيفرلىق قازاقستان" كەشەندى باعدارلاماسى شەڭبەرىندە 139 اۋىلدىق وكرۋگتە كىتاپحانالار جانىنان 202 تسيفرلاندىرىلعان اقپاراتتىق جانە كوۆوركينگ ورتالىقتارى اشىلعان. كارانتين تالاپتارىنىڭ ەنگىزىلۋىنە بايلانىستى بيىلعى جىلعى ناۋرىز ايىنان باستاپ ونلاين رەجيمدە 10444 ءىس-شارا ۇيىمداستىرىلعان. ءوز سوزىندە وبلىستىق ءدىن ىستەرى باسقارماسىنىڭ باسشىسى جانگەلدى وماروۆ وڭىردە 358 ءدىني بىرلەستىك پەن فيليال، 312 مەشىت جانە 46 شىركەۋ جۇمىس ىستەيتىنىن حابارلادى. قازىر كوپتەگەن ادامدار ءوزىنىڭ پىكىرلەرىن الەۋمەتتىك جەلى ارقىلى بىلدىرۋدە. كوپتەگەن سىندار ايتىلۋدا. ولاردىكى ورىندى. الايدا، تۇرعىندار كوبىنە ايماقتا جۇزەگە اسىپ جاتقان اۋقىمدى شارالار تۋرالى بىلە بەرمەيدى. سوندىقتان ىشكى ساياسات باسقارماسى الەۋمەتتىك جەلىلەرمەن جۇمىس جاساۋى ءتيىس. سونىمەن قاتار، ۇكىمەتتىك ەمەس ۇيىمداردىڭ قىزمەتىن باقىلاۋعا الۋ قاجەت. ولارعا جەتكىلىكتى دەڭگەيدە قاراجات بولىنۋدە. جۇمىس تا سوعان ساي بولۋى كەرەك. نەگە وبلىستىق فيلارمونيا اۋىلدارعا بارىپ، اۋىل تۇرعىندارىنا ونەر كورسەتپەيدى؟ وسىعان نازار اۋدارۋىڭىزدى سۇرايمىن"، دەدى بەردىبەك ساپارباەۆ.

جالپى، اعىمداعى جىلدىڭ 11 ايىنىڭ قورىتىندىسى بويىنشا جامبىل وبلىسى جوعارى الەۋمەتتىك-ەكونوميكالىق كورسەتكىشتەرگە قول جەتكىزىپ وتىر. وڭىردەگى ونەركاسىپ، اۋىل شارۋاشىلىعى، قۇرىلىس، ساۋدا، كولىك جانە بايلانىس سەكىلدى التى نەگىزگى سالالارىنىڭ دامۋ ديناميكاسى ايرىقشا ماڭىزدى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆانىڭ ايتۋىنشا، ونىڭ قىسقامەرزىمدى ەكونوميكالىق ينديكاتورى 102،5 پايىزدى قۇراعان. سونداي-اق، ول ەل ۇكىمەتى مەن وبلىس اكىمى اراسىنداعى مەموراندۋمدا بەلگىلەنگەن ينديكاتورلاردىڭ ورىندالۋى تۋرالى بايانداپ، بۇگىنگى تاڭدا 22 ينديكاتوردىڭ 18-نە قول جەتكىزىلسە، بىرەۋىنىڭ اسىرا ورىندالعانىن ايتتى. ال، 3 ينديكاتورعا قول جەتكىزىلمەگەن. ونەركاسىپ ونىمدەرىنىڭ ەكسپورتى مەن نەگىزگى كاپيتالعا سالىنعان ينۆەستيتسيالاردىڭ ءوسۋ كورسەتكىشتەرى تومەن بولعان. ال، ءۇشىنشى ينديكاتوردىڭ ورىندالماۋىنا انا ءولىمى اسەر ەتكەن. وتكەن كەزەڭدە وبلىستىق بيۋدجەتتىڭ اتقارىلۋى كىرىستەر بويىنشا 102 پايىزدى قۇراپ، سالىقتىق تۇسىمدەر 110،3 پايىزعا قامتاماسىز ەتىلگەن. بۇل رەتتە وبلىس بويىنشا بيۋدجەت قاراجاتىن يگەرۋ 99،4 پايىزدى قۇراعان. وبلىستىق قارجى باسقارماسىنىڭ باسشىسى روزا يساەۆا بۇگىنگى تاڭدا يگەرىلمەگەن 2 ميلليارد 493 ميلليون تەڭگە قالىپ وتىرعانىن، وسى ورايدا شۋ اۋدانىنىڭ جۇمىسى باياۋ ەكەنىن، وندا يگەرىلمەگەن بيۋدجەت قاراجاتىنىڭ كولەمى 329،7 ميلليون تەڭگەنى قۇراپ وتىرعانىن جەتكىزدى. ال، الدىن الا ەسەپتەۋلەر بويىنشا وبلىستىق دەنساۋلىق ساقتاۋ باسقارماسىندا 364 ميلليون تەڭگەدەن استام قاراجات يگەرىلمەي قالۋ ىقتيمالدىلىعى دا ايتىلدى. بۇل تىزىمگە تاراز قالاسى، بايزاق اۋدانى مەن وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسى دا ەنەدى. بۇل ورايدا، بەردىبەك ساپارباەۆ تاراز قالاسى مەن اۋدان اكىمدەرىنە بولىنگەن بيۋدجەت قاراجاتىن يگەرۋگە جانە 2020 جىلعا بەلگىلەنگەن مىندەتتەمەلەردى ورىنداۋعا بار كۇش-جىگەرلەرىن سالۋدى تاپسىردى. سونداي-اق، وبلىس اكىمى كوروناۆيرۋس بويىنشا جاعداي ءالى دە الاڭداتارلىق كۇيدە ەكەنىن اتاپ ءوتتى. سونىمەن قاتار، اكىم وڭىردەگى باس دارىگەرلەرگە تۇرعىندار ساپالى مەديتسينالىق قىزمەت الۋى ءۇشىن باسقا ەلگە سابىلماۋى كەرەكتىگىن ەسكەرتتى.

بەردىبەك ساپارباەۆ وبلىستىق پەريناتالدىق ورتالىقتا وتكەن كەزدەسۋگە دە قاتىسىپ، دەنساۋلىق ساقتاۋ سالاسىنداعى جاعدايمەن تانىستى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا، اتالعان سالانى دامىتۋعا 90 ميلليارد تەڭگەدەن استام قاراجات بولىنگەن. وبلىستىق كوپبەيىندى اۋرۋحانانىڭ بازاسىندا دۇرىس تاماقتانۋ ورتالىعى، كوپبەيىندى بالالار اۋرۋحاناسى بازاسىندا «قامقورلىق» وڭالتۋ ورتالىعى اشىلعان. جەدەل جاردەم ماشينالارى GPS ناۆيگاتسياسىمەن جابدىقتالعان. سونداي-اق، 18 رەانيموبيل، 8 جىلجىمالى مەديتسينالىق كەشەن جانە 70 سانيتارلىق اۆتوموبيل ساتىپ الىنىپ، 1 069 079 تۇرعىننىڭ ەلەكتروندىق دەنساۋلىق پاسپورتى راسىمدەلگەن. "جۇمىسپەن قامتۋدىڭ جول كارتاسى" باعدارلاماسى اياسىندا 10 دەنساۋلىق ساقتاۋ نىسانى كۇردەلى جوندەۋدەن، 4 نىسان اعىمداعى جوندەۋدەن وتكەن. الايدا، وكىنىشكە قاراي، انا ءولىمى، ونكولوگيالىق اۋرۋلاردان بولاتىن ءولىم-ءجىتىم كورسەتكىشى ارتقان. بۇل رەتتە اكىم دارىگەرلەر جۇكتى ايەلدەردىڭ ەسەبىن جۇرگىزىپ، ولاردىڭ ۋاقىتىلى تەكسەرۋدەن ءوتۋىن قاداعالاۋى كەرەكتىگىن تاپسىردى. سونىمەن قاتار، بۇگىندە جالپى 4000-نان استام توسەك-ورىن ازىرلەنىپ، ءدارى-دارمەكتىڭ ەكى ايلىق قورى جاساقتالعان. جاز ايىمەن سالىستىرعاندا قازىر مەديتسينالىق جابدىقتاردىڭ سانى ارتقان. الايدا، جيىندا مەديتسينا مامانداردىڭ جەتىسپەۋشىلىگى ءسوز بولدى. وبلىسقا 194 جاس مامان كەلسە، ونىڭ 76-سى تاراز قالاسىندا، 118-ءى اۋدانداردا جۇمىسقا ورنالاسقان. 98 مامانعا الەۋمەتتىك كومەك كورسەتىلىپ، ولاردىڭ 15-ءى تۇرعىن ۇيمەن قامتاماسىز ەتىلگەن. ماماندار ماسەلەسىن شەشۋ ءۇشىن تاراز قالالىق كوپسالالى اۋرۋحانا بازاسىندا س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ فيليالى اشىلاتىن بولدى. ال، كەلەر جىلى ونكولوگيالىق ورتالىق اشىلادى. ونىڭ جانىنان مەملەكەتتىك-جەكەمەنشىك ارىپتەستىك اياسىندا كوپسالالى اۋرۋحانا سالىنادى. بەردىبەك ساپارباەۆ باسقا وڭىرلەردىڭ تاجىريبەسىن نەگىزگە الا وتىرىپ، مۇعالىمدەر مەن دارىگەرلەردى تۇرعىن ۇيمەن قامتاماسىز ەتۋ جۇزەگە اسىرىلاتىنىن، مەملەكەت باسشىسىنىڭ تاپسىرماسىنا سايكەس مەديتسينا قىزمەتكەرلەرىنىڭ جالاقىسىن كەزەڭ-كەزەڭىمەن ارتتىرۋ جوسپارلانۋدا ەكەنىن اتاپ ءوتتى. سونداي-اق، بارلىق قابىلدانىپ جاتقان قولداۋ شارالارىنا قاراماستان، دەنساۋلىق ساقتاۋ سالاسىنىڭ قازىرگى جاي-كۇيى كوڭىل كونشىتپەيتىنىن باسا ايتتى.

سوڭعى جاڭالىقتار

قيلى-قيلى تاعدىرلار

تاريح • كەشە

ءبىر شاڭىراقتان – ءۇش مايدانگەر

رۋحانيات • 08 مامىر، 2021

قازاق دەگەنىمىز – باۋىرجان...

رۋحانيات • 08 مامىر، 2021

505-ءشى تۇرمەنىڭ تۇتقىندارى

تاريح • 08 مامىر، 2021

اسكەري ينجەنەرلەر ۇستاحاناسى

وقيعا • 07 مامىر، 2021

ۇقساس جاڭالىقتار