سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتى پالاتا توراعاسىنىڭ ورىنباسارى اسقار شاكىروۆتىڭ توراعالىق ەتۋىمەن «قر سىرتقى ساياساتىنىڭ 2020-2030 جىلدارعا ارنالعان تۇجىرىمداماسى: حالىقارالىق-قۇقىقتىق بازانى يمپلەمەنتاتسيالاۋ» تاقىرىبىنا ارنالعان دوڭگەلەك ۇستەل وتكىزدى.
كەزدەسۋدە حالىقارالىق مىندەتتەمەلەردى ىسكە اسىرۋ جانە جالپىعا بىردەي مويىندالعان ەرەجەلەر مەن ستاندارتتاردى قازاقستاننىڭ قۇقىقتىق جۇيەسىنە ەنگىزۋ ماسەلەلەرى قارالدى.
حالىقارالىق مىندەتتەمەلەردى زاڭ شىعارۋ پروتسەسىمەن جانە قۇقىق قولدانۋ پراكتيكاسىمەن ۇيلەستىرۋ جونىندە جۇيەلى شارالار قابىلداۋ قاجەتتىگى اتاپ ءوتىلدى.
«ادام قۇقىقتارى مەن بوستاندىقتارىن قورعاۋ قازىرگى زامانعى حالىقارالىق قاتىناستارعا تىعىز بايلانىستى بولعاندىقتىن بيىلعى ناۋرىز ايىندا قابىلدانعان قازاقستان رەسپۋبليكاسى سىرتقى ساياساتىنىڭ 2020-2030 جىلدارعا ارنالعان تۇجىرىمداماسى اياسىندا حالىقارالىق-قۇقىقتىق نورمالاردى يمپلەمەنتاتسيالاۋدىڭ ماڭىزى ارتا ءتۇسىپ وتىر. تۇجىرىمداما ماقساتىنىڭ ءبىرى – قازاقستان ازاماتتارىنىڭ ءىس جۇزىندەگى مۇددەلەرىن مەملەكەتتىڭ سىرتقى ساياساتىنىڭ الدىڭعى شەبىنە كوتەرۋ بولىپ تابىلادى, ال سىرتقى ساياساتتى دامىتۋدىڭ قۇجاتتا كورسەتىلگەن مازمۇنى «ادام قۇقىقتارى مەن بوستاندىقتارىن قورعاۋ سالاسىنداعى سىندارلى جانە تەڭ قۇقىقتى ىنتىماقتاستىقتى نىعايتۋدى» قامتيدى», دەدى اسقار شاكىروۆ.
ادامزات تاپ بولىپ وتىرعان قازىرگى زامانعى قاۋىپ-قاتەرلەر مەن وسىعان بايلانىستى حالىقارالىق-قۇقىقتىق تەتىكتەردى جەتىلدىرۋ قاجەتتىگى تالقىلاۋ نىساناسىنا اينالدى. قازاقستان پرەزيدەنتى قاسىم-جومارت توقاەۆ «جاساندى ينتەللەكت – XXI عاسىردىڭ باستى تەحنولوگياسى» حالىقارالىق ونلاين كونفەرەنتسياسى بارىسىندا بولاشاقتا جاساندى ينتەللەكت تەحنولوگيالارىن ادام مەن ونىڭ قۇقىقتارىنا زيان كەلتىرمەۋ تۋرالى مەموراندۋم جاساۋ مۇمكىندىگىن جوققا شىعارمادى. مەملەكەت باسشىسى اتاپ وتكەندەي, جاڭا ءداۋىردىڭ تابىستى بولۋى ءبىز جاڭا تەحنولوگياعا ەنگىزەتىن ادامگەرشىلىك دەڭگەيىنە بايلانىستى بولادى.
توراعا ورىنباسارى بۇل تۇرعىدا ازاماتتاردىڭ ءوز قۇقىقتارى تۋرالى ءبىلىمىن جانە ولاردىڭ جالپىادامزاتتىق قۇندىلىقتاردى ساقتاۋ مادەنيەتىن ارتتىرۋ ەرەكشە ماڭىزعا يە بولاتىنىن اتاپ ءوتتى.
سىرتقى ىستەر ءمينيسترى مۇحتار تىلەۋبەردى كەزدەسۋدىڭ كۇن تارتىبىنە سايكەس اتقارىلعان ىستەردىڭ اعىمداعى جاي-كۇيى تۋرالى حاباردار ەتتى. ماسەلەن, حالىقارالىق شارتتاردىڭ مەملەكەتتىك تىزىلىمىندە 4093 حالىقارالىق شارت تىركەلگەن بولسا, ولاردىڭ 3000-عا جۋىعى قولدانىستا بولىپ وتىر. قازىرگى ۋاقىتتا ولاردى ورىندالۋى جونىندە جۇيەلى تۇردە مونيتورينگ جۇمىستارى جۇرگىزىلىپ كەلەدى.
مينيستر سونداي-اق قازاقستان رەسپۋبليكاسى كونستيتۋتسياسىنىڭ 4-بابىنىڭ جاڭا رەداكتسياسىن ىسكە اسىرۋعا باعىتتالعان حالىقارالىق شارتتاردى رەتتەۋ سالاسىنداعى تۇزەتۋلەرى بار زاڭ جوباسى پارلامەنتكە جىبەرىلگەنى تۋرالى حاباردار ەتتى. قازاقستان رەسپۋبليكاسىنىڭ زاڭدارىنان راتيفيكاتسيالانعان حالىقارالىق شارتتاردىڭ باسىمدىعى, حالىقارالىق شارتتار مارتەبەسىندەگى وزگەرىستەر تۋرالى جۇرتشىلىقتى حاباردار ەتۋ, سونداي-اق حالىقارالىق شارتتاردى توقتاتۋ ءتارتىبى تۋرالى ەرەجەلەر سالالىق زاڭعا ەنگىزىلەتىن بولادى.
دوڭگەلەك ۇستەل بارىسىندا قۇقىق قورعاۋ جونىندەگى زاڭنامانى جەتىلدىرۋ, ونى حالىقارالىق قۇقىقتاعى جالپىعا تانىلعان قاعيداتتارى مەن ەرەجەلەرگە سايكەستەندىرۋ, اتاپ ايتقاندا, ءبىزدىڭ ەلىمىزدىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ فاكۋلتاتيۆتىك حاتتامالارىنا جانە بالا قۇقىقتارى تۋرالى كونۆەنتسياعا قوسىلۋ ماسەلەلەرى قارالدى.
سەناتورلار كوتەرىلگەن ماسەلەلەردىڭ ماڭىزدىلىعىن ەسكەرە وتىرىپ, زاڭ جوبالارىن راتيفيكاتسيالاۋعا دايىنداۋ جانە ەنگىزۋ كەزىندەگى ءىس-قيمىلداردى جان-جاقتى ۇيلەستىرۋ قاجەتتىگىنە مەملەكەتتىك ورگاندار وكىلدەرىنىڭ نازارىن اۋداردى.
كوميتەت توراعاسى مۇحتار قۇل-مۇحاممەد دوڭگەلەك ۇستەلدى قورىتىندىلاي كەلىپ, حالىقارالىق شارتتاردى جاساۋ جانە ورىنداۋ بارىسىندا شەت مەملەكەتتەرمەن جانە حالىقارالىق ۇيىمدارمەن ءوزارا قارىم-قاتىناستاردا ەلىمىزدىڭ ۇلتتىق مۇددەلەرىن ەسكەرۋ باسىمدىققا يە ەكەنىن اتاپ ءوتتى.
كەزدەسۋ مۇددەلى مەملەكەتتىك ورگاندار باسشىلارىنىڭ, ادام قۇقىقتارى جونىندەگى ۋاكىلدىڭ, حالىقارالىق قۇقىق سالاسىنداعى ساراپشىلاردىڭ جانە سەنات جانىنداعى جاس ساراپشىلار كلۋبىنىڭ قاتىسۋىمەن ءوتتى.
وتىرىس قورىتىندىسى بويىنشا ۇكىمەت اتىنا ۇسىنىمدار قابىلداندى.
