حالىقارالىق سىبايلاس جەمقورلىققا قارسى كۇرەس كۇنىنە وراي ۇيىمداستىرىلعان ءىس-شارادا اتالعان دەرتپەن كۇرەسۋ ماسەلەلەرى جان-جاقتى تالقىعا ءتۇستى.
شىمكەنت قالاسىنىڭ اكىمى مۇرات ايتەنوۆ فورۋمنىڭ ماڭىزدىلىعىنا توقتالىپ, بۇل باعىتتاعى اتقارىلعان جۇمىستاردان حاباردار ەتتى.
– مەملەكەت باسشىسى قاسىم-جومارت توقاەۆ "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋ ءۇشىن "مەملەكەتتىك باسقارۋدىڭ جاڭا ۇلگىسىن قالىپتاستىرۋ", "ادىلەتتى مەملەكەت قۇرۋ" جانە "ازاماتتاردىڭ مەملەكەتتى باسقارۋ ىسىنە قاتىستىرۋ" باعىتىندا مەملەكەتتىڭ جاڭا ستاندارتتارىن ازىرلەۋ بويىنشا بىرقاتار تاپسىرمالار بەردى. بۇل دەرتپەن كۇرەسكە قوعام بولىپ جۇمىلۋىمىز كەرەك. قالادا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا "شىمكەنت – ادالدىق الاڭى" جوبالىق كەڭسەسى, "اشىق اكىمدىك", "فرونت وفيس" جوبالارى جۇمىس ىستەۋدە. شىمكەنت قالاسى اكىمدىگى تاراپىنان كورسەتىلەتىن مەملەكەتتىك قىزمەتتەر تۇرلەرىن ەلەكتروندى فورماتقا اۋىستىرۋدا كوپتەگەن جۇمىستار اتقارىلدى. اتقارىلعان جۇمىستاردىڭ ساپاسىن جوعارى ناتيجەگە جەتكىزۋ ءۇشىن قالا تۇرعىندارى اراسىندا سىبايلاس جەمقورلىققا مۇلدەم توزبەۋشىلىك قاعيداسىن ىسكە اسىرۋىمىز كەرەك, – دەدى قالا اكىمى.
سونداي-اق فورۋمدا سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى اسحات جۇماعالي, اقپاراتتىق-اعارتۋشىلىق شتابىنىڭ مۇشەلەرى – جازۋشى مارحابات بايعۇت, قوعام قايراتكەرى شالاتاي مىرزاحمەتوۆ, ساياساتتانۋشى ساكەن ماجىنبەكوۆ, تاعى باسقالار بايانداما جاساپ, ءوز ويلارىن ورتاعا سالدى.
ءىس-شارا سوڭىندا بەلسەندى قوعام وكىلدەرى, باق وكىلدەرى, "پاراساتتى وتباسى", جاس سۋرەتشىلەر, بەينەروليك بايقاۋىنىڭ جەڭىمپازدارى ماراپاتتالدى.
