وبلىس 23 قاراشادان بەرى قاۋىپتىڭ قىزىل ايماعىنا ەنگەن وڭىرلەر قاتارىندا بولاتىن. سوڭعى تاۋلىكتە 60 ادامنىڭ اۋرۋعا شالدىققانى بەلگىلى بولدى. ياعني, اۋرۋدىڭ تارالۋى باسەڭدەگەن. ەگەر كوكشەتاۋ قالاسىن جەكە قاراستىرساق, قاراشانىڭ باسىندا كۇنىنە 70-كە جۋىق ادام اۋىرسا, قازىر كۇن سايىن وبلىس ورتالىعىندا 35-32 ادامنان جامان تۇماۋ انىقتالۋدا.
"قازىر وبلىس ورتالىعىنداعى جاعداي ەداۋىر تۇزەلىپ, ۆيرۋستىڭ تارالۋى شامامەن 50 پروتسەنتكە تومەندەدى. بىراق, كارانتين شارالارىن جەڭىلدەتۋگە ءالى دە ەرتە. كوپ جاعدايدا تۇرعىندار جەكە قاۋىپسىزدىك شارالارىن ساقتامايدى. بۇل جاي ىندەتتىڭ قايتا ورشۋىنە اكەلىپ سوعۋى مۇمكىن", – دەيدى وبلىس اكىمىنىڭ ورىنباسارى اينا ءمىسىرالىموۆا.
وبلىستىڭ سانيتارلىق باس دارىگەرىنىڭ ايتۋىنشا, وڭ ناتيجە ءبىر اپتا بويى ساقتالسا, كارانتين شارالارىن جەڭىلدەتۋ جايلى ۇسىنىس جاسالۋى مۇمكىن.
"ەل "سارى" ايماققا وتتىك دەپ ساقتىق شارالارىن ساقتاي بەرمەۋى مۇمكىن. سونداي سالعىرتتىقتىڭ سالدارىنان ىندەت قايتا ءورشۋى دە ىقتيمال. مۇندايعا جول بەرمەۋ ءۇشىن كوپشىلىك ءىس-شارالاردى وتكىزبەۋگە, بارىنشا قوعامدىق ورىندارعا بارماۋعا مىندەتتىمىز", – دەيدى ايناگۇل مۋسينا.
وبلىس اۋماعىندا رەپرودۋكتيۆتىلىك كورسەتكىشى 1-دەن تومەندەگەن. بۇعان دەيىن بۇل كورسەتكىش 1,27 بولسا, قازىر, 0,95-كە تەڭ. الايدا, اسىعىس بايلام جاساۋعا بولمايدى. ماماندار ءوڭىر تۇرعىندارىن كارانتين تالاپتارىن قاتاڭ ۇستانۋعا شاقىرادى.
