ايماقتار • 04 جەلتوقسان، 2020

اۋىل شارۋاشىلىعىنىڭ ۇزدىكتەرىنە "متز-82.1" تراكتورى بەرىلدى

197 رەت كورسەتىلدى

بۇگىن وبلىس اكىمى اماندىق باتالوۆ وڭىردەگى اگروونەركاسىپ كەشەنى ەڭبەككەرلەرىن قۇتتىقتاپ، بىرقاتار ماراپاتتى تاپسىردى. شارا ونلاين رەجىمدە ءوتىپ، اۋدان، قالالاردىڭ وكىلدەرى جيىنعا بەينەبايلانىس ارقىلى قاتىستى، دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.

وبلىس باسشىسى ءوڭىر حالقىنىڭ 80%-ى اۋىلدىق جەرلەردە تۇراتىندىقتان اگرارلىق سالانىڭ دامۋى حالىقتىڭ ءال-اۋقاتىمەن تىعىز بايلانىستى ەكەنىن تىلگە تيەك ەتتى. وبلىستىڭ باسىمدىق بەرەتىن داقىلدارىن ءوسىرۋ، وڭدەۋ ءىسىن دامىتۋ، ينۆەستيتسيا تارتۋ سياقتى كوپتەگەن وسى سالاداعى نەگىزگى باعىتتاردىڭ اياق الىسىنا، اۋىل شارۋاشىلىعى سالاسىنداعى جاڭالىقتار مەن جەتىستىكتەرگە قىسقاشا توقتالدى.

1

"2020 جىل كوروناۆيرۋس ىندەتىنە بايلانىستى وڭاي بولعان جوق. مەملەكەت باسشىسى قاسىم-جومارت كەمەل ۇلىنىڭ تاپسىرماسىنا سايكەس ۇكىمەت دەر كەزىندە قولداۋ شارالارىن قابىلدادى. سونىڭ ارقاسىندا كوكتەمگى ەگىس جۇمىستارى ۋاقىتىلى جۇرگىزىلدى. وبلىسقا كوكتەمگى ەگىس جۇمىستارىنا "اگرارلىق نەسيە كورپوراتسيا" ارقىلى بەرىلگەن 1،1 ملرد تەڭگە جەڭىلدەتىلگەن نەسيە كوپ كومەك بولدى. ەگىس القابىنىڭ كولەمى 7 مىڭ گەكتارعا ارتىپ،  968 مىڭ گەكتارعا جەتتى. اۋا رايىنىڭ قولايسىز بولعانىنا قاراماستان وبلىس ەڭبەككەرلەرىنىڭ تىنىمسىز ەڭبەگىنىڭ ارقاسىندا 1،4 ملن توننا ءداندى داقىلدار جينالدى. جۇگەرىنىڭ شىعىمى  گەكتارىنا 67،2 تسەنتنەردەن بولىپ، 581 مىڭ توننا ءونىم جينالدى. قانت قىزىلشاسى بيىلعى جىلى ورتا ەسەپپەن گەكتارىنان 380 تسەنتنەردەن الىندى.جەكەلەگەن شارۋاشىلىقتاردا بۇل كورسەتكىش 600-800 تسەنتنەرگە جەتتى، 550 مىڭ تونن ءونىم جينالدى، بۇل وتكەن جىلمەن سالىستىرعاندا 25 مىڭ تونناعا ارتىق. بيىل 50 مىڭ توننا اق قانت الۋ جوسپارلانعان. وسى رەتتە وڭىردەگى قىزىلشا وسىرۋشىلەردى قولداۋ ماقساتىندا 2021 جىلدان باستاپ وڭدەۋگە وتكىزىلگەن ءونىمنىڭ ءار تونناسىنا بەرىلەتىن سۋسيديا كولەمىن 10 مىڭ تەڭگەدەن 12 مىڭ تەڭگەگە وسىرەمىز"، دەپ اتاپ ءوتتى ا. باتالوۆ.

سونداي-اق وبلىس اكىمى ءوز سوزىندە مال شارۋاشىلىعىن وركەندەتۋ، يرريگاتسيالىق جۇيەلەردى قالپىنا كەلتىرۋ، سالاعا ستراتەگيالىق ينۆەستورلار تارتۋ ماسەلەسىنە دە توقتالدى. ماسەلەن، امەريكالىق "تايسون فۋدس" كومپانياسىنىڭ ءىرى قارا ەتىن وڭدەيتىن زاۋىتى، گەرمانيالىق ينۆەستور "باۋمان" كومپانياسىنىڭ ۇساق مال ەتىن تەرەڭنەن وڭدەيتىن جوباسى قولعا الىنا باستادى. 7 جىل توقتاپ تۇرعان، قۋاتى  29 مىڭ توننا  بولاتىن "وتان گرين فۋد" قۇس فابريكاسى قايتا جاڭعىرتىلۋدا.

"اۋىل شارۋاشىلىعىنا تارتىلعان ينۆەستيتسيا كولەمى 50،9 ملرد. تەڭگەگە جەتتى، جىل باسىنان 25 ينۆەستيتسيالىق جوبا ىسكە قوسىلدى. جالپى قابىلدانعان شارالار نəتيجەسىندە جىل سوڭىنا قاراي اۋىل شارۋاشىلىعى ءونىمىنىڭ جالپى كولەمى 900 ملرد. تەڭگەگە جەتەدى. ءبىز بۇل تابىستارمەن توقتاپ قالمايمىز. كەلەسى جىلى بۇل كورسەتكىشتى 1 ترلن. تەڭگەگە جەتكىزەمىز دەپ جوسپارلاپ وتىرمىز. ءبىزدىڭ بۇگىنگى ماقساتىمىز – پرەزيدەنتىمىزدىڭ اگروونەركاسىپ كەشەنىندەگى ەڭبەك ونىمدىلىگىن جəنە اۋىل شارۋاشىلىعى ونىمدەرىنىڭ ەكسپورتىن 2،5 ەسە ارتتىرۋ تۋرالى تاپسىرماسىن ورىنداۋ. ول ءۇشىن بىزدە بارلىق جاعدايلار بار، سونىڭ ىشىندە ەڭ باستىسى ەڭبەكقور ءəرى جاۋاپكەرشىلىگى مول ادامدار – ءبىزدىڭ باستى بايلىعىمىز. سىزدەر، اگرارلىق سالانىڭ ماماندارى، وزدەرىڭىزدىڭ كۇندەلىكتى تىنىمسىز ەڭبەكتەرىڭىزدىڭ ارقاسىندا ازىق-ت ۇلىك قاۋىپسىزدىگىن قامتاماسىز ەتىپ، حالىقتىڭ əل-اۋقاتىن ارتتىرۋعا، جالپى ەلدىڭ دامۋىنا زور ۇلەس قوسىپ كەلەسىزدەر. قاجىرلى ەڭبەكتەرىڭىز ءۇشىن سىزدەرگە العىس ايتامىن"، دەپ ءسوزىن قورىتىندىلادى ا. باتالوۆ.

1

وسى جيىندا وبلىس اكىمى بىرقاتار ازاماتتارعا ماراپات تاپسىردى. اتاپ ايتقاندا، اۋىل شارۋاشىلىعى مينيسترلىگىنىڭ "ەڭبەك ارداگەرى" مەدالىمەن اقسۋ اۋدانىنداعى "مارلەن-ا" جشس-ءنىڭ جەتەكشىسى مۇسەكە ءامىروۆ، ەسكەلدى اۋدانىنان "رومانەنكو ۆ.ۆ" شق-نىڭ باسشىسى ۆيكتور رومانەنكو، سارقاندىق "سامال" شق باسشىسى ەرمەك قاليەۆ ماراپاتتالدى. سول سياقتى وتكەن جىلدىڭ قورىتىندىسى بويىنشا اۋىل شارۋاشىلىعى سالاسىندا بالقاش اۋدانىنداعى "اگروفيرما بىرلىك" جشس ۇزدىك دەپ تانىلىپ، ونىڭ ديرەكتورى الماس قىستاۋباەۆقا ءى دارەجەلى ديپلوم مەن "متز-82.1" تراكتورىنىڭ كىلتى بەرىلدى. ءدال وسىنداي سىيلىق شارۋا قوجالىقتارى اراسىندا ۇزدىك اتانعان جامبىل اۋدانىنىڭ "شالتاباەۆا ج.ە" شارۋا قوجالىعىنا تاپسىرىلدى. ماراپاتتى قوجالىق وكىلى تالانت سەڭگىرباەۆ الدى. جيىندا ءسوز العان "اگروفيرما بىرلىك" جشس ديرەكتورى الماس قىستاۋباەۆ سەرىكتەستىكتىڭ جۇمىسى تۋرالى ازدى-كەم ايتىپ ءوتتى. ونىڭ ايتۋىنشا، ۇجىمنىڭ ەسەلى ەڭبەگىنىڭ جانە مەملەكەتتىڭ جاندى قولداۋىنىڭ ارقاسىندا بيىل 4600 توننا كۇرىش، 7200 توننا استىق جينالعان. 250 ادام ەڭبەك ەتەتىن سەرىكتەستىك ءىرى جانە ۇساق مال سانىن قازىر 10 مىڭعا جەتكىزگەن. مالدىڭ جەم-ءشوبى دەر كەزىندە دايىندالعان، قيىندىق جوق. ونىمدەرىن ەكسپورتقا شىعارۋعا نيەتتى. قايىرىمدىلىقپەن دە اينالىسىپ، كوپ بالالى وتباسىلارىنا ازىق-ت ۇلىك جاعىنان كومەكتەسىپ تۇرادى. ا. قىستاۋباەۆ ەركىن ەڭبەك ەتۋگە مۇمكىندىك جاساپ، بارىنشا قولداۋ كورسەتكەن ەل باسشىلىعىنا ريزاشىلىعىن ءبىلدىرىپ، ارىپتەستەرىن كاسىبي مەرەكەلەرىمەن قۇتتىقتادى.  

سونىمەن قاتار "شالتاباەۆا ج.ە" شارۋا قوجالىعىنىڭ وكىلى تالانت سەڭگىرباەۆ تا پىكىر ءبىلدىرىپ، قۇتتىقتاۋ ءسوز سويلەدى.

ارى قاراي اۋىل شارۋاشىلىعى قىزمەتكەرلەرىنىڭ كۇنىنە وراي ماراپاتتاۋ راسىمدەرىن جەرگىلىكتى جەرلەردە اۋدان، قالا اكىمدەرى جالعاستىردى.

سوڭعى جاڭالىقتار

دوللار ارزانداپ جاتىر

ەكونوميكا • بۇگىن، 11:37

ۇقساس جاڭالىقتار