وسى اپتادا الەۋمەتتىك جەلىلەردە پاۆلودار قالاسىنداعى جولاۋشىلار تاسىمالىنا قاتىستى شۋ بۇرق ەتە قالدى. بەلگىلى بولعانداي, شاھارداعى اۆتوپاركتەردىڭ ءبىرىنىڭ جۇرگىزۋشىلەرى مەن كوندۋكتورلارى جۇمىسقا شىقپاي قويعان. ءسويتىپ, نارازىلىق تانىتقان. ال ولاردىڭ مۇنداي قادامعا بارۋىنا جولاۋشىلار اقىسىنىڭ تولىق تولەنبەۋى تۇرتكى بولعان. ياعني تاسىمالداۋشىلار شىعىنعا باتا ءجۇرىپ جۇمىس ىستەۋدەن شارشاعان.
ابىلقايىر سقاقوۆتىڭ ايتۋىنشا, بۇل پروبلەمانى جۇيەلى شەشپەسە بولمايدى. ال ورىن العان وقيعا ويداعىداي رەتتەلگەن كورىنەدى.
– تاسىمالداۋشىلار ءۇش باعىت بويىنشا جۇمىسقا شىقپاعان. ولارمەن قالا اكىمى كەزدەستى. ىلە جۇرگىزۋشىلەر مەن كوندۋكتورلاردىڭ 90 پايىزى جۇمىستارىنا ورالدى. پاندەميياعا بايلانىستى جولاۋشىلار اعىنى قىسقارۋدا. ونىڭ ۇستىنە پاۆلوداردا حالىقتىڭ 17 ساناتى تەگىن تاسىمالدانادى. ماسەلەنى سارالانعان تاريف ەنگىزۋ ارقىلى عانا شەشۋگە بولادى. ال سارالانعان تاريف ەلەكتروندى بيلەت جۇيەسى ەنگىزىلگەننەن كەيىن عانا ىسكە قوسىلادى. جاڭاشىلدىقتى ەنگىزۋ 2021 جىلعا جوسپارلانعان. ەلەكتروندىق بيلەت جۇيەسى قانشا جولاۋشى تاسىمالداناتىنىن, ونىڭ قانداي بولىگى جەڭىلدىكپەن جۇرەتىنىن انىقتاۋعا كومەكتەسەدى. سونداي-اق ءادىل ءارى نارىقتىق قاتىناستار قۇرۋ ءۇشىن جولاۋشىلاردىڭ قاي بولىگىنىڭ جولاقىسى بيۋدجەتتەن وتەلۋى ءتيىس ەكەنىن ايقىن كورسەتەتىن بولادى. بۇل باعدارلاما ءالى ىسكە قوسىلۋ ساتىسىندا. قىس ىشىندە كەشەگىدەي كەلەڭسىزدىكتەر قايتالانباس ءۇشىن ءتيىستى شارالاردى قابىلدايمىز, – دەدى اكىم.
پاۆلودار وبلىسى ءۇشىن ەڭ وزەكتى ماسەلەنىڭ ءبىرى – ەكولوگيا. ءوڭىر باسشىسى قورشاعان ورتاعا جايىلاتىن شىعارىندىلاردى ازايتىپ, ايماقتى كوگالداندىرۋ بويىنشا شارالار توپتاماسى ازىرلەنگەنىن جەتكىزدى.
– پاۆلودار وبلىسىندا ەكولوگيا ماسەلەسىن شەشۋ ءتورت نەگىزگى باعىتتان تۇرادى. اتاپ ايتقاندا, ونەركاسىپ كاسىپورىندارىنىڭ شىعارىندىلارىن شەكتەۋ, تۇرمىستىق قاتتى قالدىقتاردى باسقارۋ, كوگالداندىرۋ جانە ەكولوگيالىق قوعام وكىلدەرىمەن ءوزارا ءىس-قيمىلدى كۇشەيتۋ باعدارلامالارى بار. وڭىردە ەكولوگيالىق كەڭەس جۇمىس ىستەيدى. سونىمەن قاتار ERG توبىنا قارايتىن ءىرى كاسىپورىنداردا شىعارىندىلاردى ازايتۋ بويىنشا ون جىلدىق باعدارلاما ىسكە اسىرىلۋدا. ولار ەسكىرگەن فيلترلەردى زاماناۋي گيبريدتەرمەن جاڭارتۋدا. پاۆلودار اليۋميني زاۋىتىندا العاشقى ەكى فيلتر ورناتىلدى. سونىڭ ناتيجەسىندە جىلدىق شىعارىندىلار كولەمى 2,4 تونناعا ازايادى. كەلەر جىلدان باستاپ پاۆلودار قالاسىندا جىل سايىن بيىكتىگى 1,5-2 مەتردەن اساتىن 20 مىڭ اعاش وتىرعىزۋ جوسپارلاندى. بۇل باعدارلاما ەكىباستۇز جانە اقسۋ قالالارىندا دا قولعا الىنادى, – دەدى ابىلقايىر سقاقوۆ.
ءوڭىر كوروناۆيرۋس ينفەكتسياسىن جۇقتىرۋ كورسەتكىشى بويىنشا «قىزىل ايماقتا» تۇر. ناۋقاستاردىڭ كوبەيۋىنە شەتەلدەن كەلگەن ادامدار اسەر ەتكەن. ويتكەنى وبلىس رەسەيدىڭ كوروناۆيرۋس جايلاعان ءۇش ايماعىمەن شەكتەسەدى. قازان ايىنىڭ باسىنان بەرى اتالعان باعىتتاعى شەكارالىق بەكەتتەر ارقىلى وڭىرگە 33 768 ادام وتكەن. قاراشا ايىندا ەنگىزىلگەن قوسىمشا شەكتەۋلەر رەسەيدەن كەلەتىن ادامدار لەگىن, تيىسىنشە كوروناۆيرۋستىڭ تاسىمالدانۋ فاكتىلەرىن ەداۋىر ازايتقان.
– قازىر كوروناۆيرۋستى جۇقتىرۋ فاكتىلەرى وبلىس ىشىندە كوبەيىپ تۇر. ولاردىڭ نەگىزگى بولىگى – ناۋقاستارمەن تىكەلەي بايلانىسقا تۇسكەن ادامدار. وڭىردەگى احۋال شيەلەنىسىپ تۇرعانىمەن, دەنساۋلىق ساقتاۋ جۇيەسىنىڭ ماتەريالدىق-تەحنيكالىق جانە كادرلىق بازاسىن نىعايتۋدىڭ ناتيجەسىندە جاعدايدى باقىلاۋدا ۇستاۋعا مۇمكىندىك بار. اۋرۋحانالارداعى جالپى توسەك قورى مەن جانساقتاۋ بولىمدەرىندەگى ورىندار كوبەيتىلدى, ستاتسيونارلار بارىنشا جابدىقتالدى. وتتەگى نۇكتەلەرىنىڭ سانىن التى ەسە ۇلعايتتىق. ءدارى-دارمەك قورى دا جەتكىلىكتى. 600 ادامنان تۇراتىن مەديتسينالىق قىزمەتكەرلەر رەزەرۆى بار. وسى جىلى جەدەل جاردەم ستانساسىنىڭ اۆتوپاركى 100 پايىز جانارتىلادى. سونىڭ ناتيجەسىندە جەدەل جاردەمنىڭ كەلۋ ۋاقىتى 7 مينۋتقا دەيىن قىسقاردى. مۇنداي جاعداي ستانسا تاريحىندا العاش رەت ورىن الىپ وتىر, – دەدى اكىم.
ابىلقايىر سقاقوۆتىڭ ايتۋىنشا, ءوڭىر تۇرعىندارىنىڭ جاعدايىن ارتتىرۋعا «جۇمىسپەن قامتۋ جول كارتاسى» مەن وزگە دە مەملەكەتتىك باعدارلامالار وڭ ىقپال ەتۋدە. بيىل 1 مىڭ شاقىرىم جول كۇردەلى جوندەۋدەن وتكەن. ونىڭ بەستەن ءبىر بولىگى – بۇرىن-سوڭدى اسفالت توسەلمەگەن جولدار. سونىمەن قاتار 205 مىڭ اۋىل تۇرعىنى تازا اۋىز سۋمەن قامتىلماق. وسى جىلى جالپى كولەمى 346 مىڭ شارشى مەتر باسپانا تاپسىرىلادى. ونىڭ ىشىندە جالعا بەرىلەتىن پاتەرلەر سانى بىلتىرعىدان توعىز ەسە كوپ بولماق.
– سوڭعى 10 اي ىشىندەگى الەۋمەتتىك-ەكونوميكالىق احۋال تۇراقتى. ءوندىرىستىڭ دامۋ قارقىنى – 100,4 پايىز. وندىرىلگەن ءونىمنىڭ جالپى قۇنى 1,6 ترلن تەڭگەنى قۇرادى. كەن بايىتۋ سالاسىندا مىس كونتسەنتراتىنىڭ ءوندىرىسى ەرەكشە قارقىن كورسەتتى. ەلەكتر ەنەرگياسىن ءوندىرۋ 1,8 پايىزعا ارتتى. ماشينا جاساۋ سالاسىنىڭ دامۋ قارقىنى جامان ەمەس. ماسەلەن, «پرومماشكومپلەكت» كومپانياسى وتكەن جىلمەن سالىستىرعاندا تەمىر جول دوڭگەلەكتەرىن 4,4 ەسە كوپ شىعاردى. سونىمەن قاتار فەرروسيليتسي جانە مەتالل ءوندىرىسى دە الدىڭعى قاتاردا. ءبىزدىڭ وڭىردە وندىرىستىك كلاستەردىڭ بولاشاعى زور. ماسەلەن, وسى كۇنى اليۋمينيدەن اۆتوموبيل دوڭگەلەكتەرى شىعارىلىپ كەلسە, جىلدىڭ سوڭىندا رادياتورلار ءوندىرىسى باستالادى. مىس كلاستەرىنىڭ دە دامۋ الەۋەتى جوعارى. ءبىر عانا «بوزشاكولدىڭ» وزىندە جىلىنا 100 مىڭ توننادان استام مەتالل وندىرىلەدى, – دەدى وبلىس اكىمى.
جىل باسىنان بەرى پاۆلودار وبلىسىنىڭ ەكونوميكاسىنا شامامەن 368 ملرد تەڭگە ينۆەستيتسيا تارتىلعان.
– جىل سوڭىنا دەيىن 33 مىڭنان استام ادامدى جۇمىسپەن قامتيمىز. كەلەر جىلى 35 مىڭ تۇرعىندى ەڭبەككە تارتۋ جوسپارلانىپ وتىر. كۇش-جىگەردى جۇمىسپەن قامتۋعا جۇمىلدىراتىن بولامىز, – دەدى ابىلقايىر سقاقوۆ.
