قوعام • 26 قاراشا، 2020

ۇكىمەتتىك ەمەس ۇيىمداردىڭ بەلسەندىلىگى ارتىپ كەلەدى

7 رەت كورسەتىلدى

ازاماتتىق قوعام تۇرعىناماسىن جۇزەگە اسىرۋدا ەل وڭىرلەرىندە قۇرىلعان ۇكىمەتتىك ەمەس ۇيىمداردىڭ (ۇەۇ) جىل سايىن وسە تۇسۋدە. مۇنداعى باستى ۇستانىم ازاماتتىق قوعام مەن مەملەكەت اراسىنداعى بايلانىستاردى تەرەڭدەتۋگە جانە ءوزارا ۇنقاتىسۋلار مەن سەرىكتەستىستىكتى دامىتۋعا نەگىزدەلگەن. وسى ورايدا ورال وڭىرىندە الەۋمەتتىك،ەكونوميكالىق جانە قوعامدىق مىندەتتەردى جۇزەگە اسىرۋدا ۇەۇنىڭ قوسىپ وتىرعان ۇلەسى سۇبەلى دەۋگە بولادى، دەپ حابارلايدى Egemen.kz.

ولاردىڭ سانى سوڭعى ون جىلدىڭ ىشىندە ءتورت ەسە كوبەيگەن. ايتسە دە ازاماتتىق قوعام قىزمەتىنىڭ باستى كورسەتكىشى ساننىڭ كوپتىگىمەن ەمەس، كەرىسىنشە ناقتى جۇمىس ساپاسىن كوتەرە بىلۋىمەن جانە ەل-جۇرتتى تولعاندىرىپ جۇرگەن كوكەيكەستى ماسەلەلەردى شەشۋ كەزىندەگى سىندارلى ءىس-قيمىلىمەن ەرەكشەلەنىتىن ەسكەرسەك بۇل تۇرعىدا دا وڭ مىسالدار از ەمەس.

تالاس جوق مۇنداي جاعدايدا ۇەۇ مەملەكەتتىڭ قولداۋىنا ارقا سۇيەيتىنى تابيعي ءجايت. بۇل تۇرعىدا اقجايىق ايماعىندا جەرگىلىكتى اتقارۋشى ورگاندار تاراپىنان ازاماتتىق قوعامدى دامىتۋعا باعىتتالعان كەشەندى باعدارلامالاردى قارجىلاندىرۋعا جان-جاقتى كوڭىل بولىنۋدە. قازىرگى كەزدە بۇل باعىتتا بولىنگەن قاراجات مولشەرى 1 ميلليارد 300 ميلليون تەڭگەنى قۇرايدى. مۇنىڭ ءوزى ونىڭ كولەمى سوڭعى سەگىز جىلدا ون ەسەگە جۋىق وسكەنىن كورسەتەدى.

وسىلايشا ورال وڭىرىندە سوڭعى جىلدار بەدەرىندە ازاماتتىق قوعامعا جۇكتەلگەن سان-الۋان ماسەلەلەردى جەدەل ءارى كاسىبي تۇرعىدا شەشە بىلۋگە قابىلەتتى ۇەۇ قالىپتاستى دەسەك شىندىقتان اۋىتقي قويماسپىز. ونىڭ قاتارىندا وتباسى قۇندىلىقتارىن ساقتاۋ مەن دارىپتەۋ، ايماقتاعى ۋربانيزاتسيا ءۇردىسىن رەتتۋ. وڭىردەگى ەكولوگيالىق پروبلەمالاردىڭ شەشىمىن ىزدەستىرۋ جانە مۇمكىندىگى شەكتەۋلى جاندارعا الەۋمەتتىك تۇرعىدان قولداۋ كورسەتۋ سەكىلدى سان-الۋان جوبالار بار.

بۇعان قوسا ازاماتتىق قوعام ينستيتۋتىنىڭ وكىلدەرى تۇرعىندارعا كورسەتىلەتىن قىزمەتتىڭ ساپاسىن باقىلاۋ مەن ونى بۇدان ءارى جاقسارتۋ جونىندەگى ماسەلەلەرگە دە جەدەل ءۇن قوسىپ وتىر. وسى ورايدا وبلىستا قۇرىلعان ارنايى مونيتورينگتىك توپتىڭ ءرولى جوعارى دەي الامىز. ونىڭ قۇرامىنا بىرقاتار ۇەۇ-نىڭ جەتەكشىلەرى، قوعام جاناشىرلارى مەن بەلگىلى بلوگەرلەر جانە ماسليحات دەپۋتاتتارى ەنگىزىلگەن. وسى شەڭبەردەگى باقىلاۋ ارنالارىنا اباتتاندىرۋ ۇدەرىستەرى، جول قۇرىلىسى، الەۋمەتتىك نىساندار شوعىرى مەن وزگە دە ينفراقۇرىلىمدىق جۇيەلەر كىرەدى. اتالعان ءىس-شارالار كەشەنى بويىنشا «اقجايىق – ادالدىق الاڭى» جوبالىق كەڭسەسى مەن بىرقاتار قوعامدىق كەڭەستەر ىلكىمدى ءىس-قيمىل تانتىپ ءجۇر. ونىڭ مۇشەلەرىنىڭ ۇشتەن ەكىسىن ۇەۇ مەن باق جانە مەملەكەتتىك ۇيىمداردىڭ وكىلدەرى قۇرايدى.

ءبىز وسى ماتەريالدى گازەت وندىرىسىنە ازىرلەۋ كەزىندە باتىس قازاقستان وبلىسىنداعى ازاماتتىق اليانستىڭ پرەزيدەنتى سۆەتلانا تەنيشەۆاعا جولىعىپ اتقارىلىپ جۇرگەن ىستەرىنىڭ ءجاي-كۇيى جونىندە ايتىپ بەرۋىن وتىنگەن ەدىك. بۇگىنگى كۇنى ءوڭىردىڭ ازاماتتىق سەكتورى كوكەيكەستى ماسەلەلەردىڭ شەشىمىن تابۋعا قابىلەتتى ازاماتتىق بىرلەستىكتەردىڭ بەرىك جۇيەسىن قۇرايدى. مەملەكەتتىك قۋاتتى بولۋى – مىقتى ازاماتتىق قوعامنىڭ قالىپتاسۋىنا دا بايلانىستى ەكەنى انىق. وسى ورايدا ۇكىمەتتە ازاماتتىق باقىلاۋ جونىندەگى زاڭ جوباسىن قابىلداۋعا قاتىستى جۇيەلى جۇمىستار قولعا الىنعانى ازاماتتىق ينستيتۋتتىڭ ىرگەتاسىن كەڭەيتە تۇسۋگە ۇلكەن سەپتىگىن تيگىزەدى دەگەن ويدامىز. سوڭعى ۋاقىتتا بەلسەندى ازاماتتاردىڭ الەۋەتىن قوعامدى ودان ءارى دامىتۋعا تارتۋ ءىسىنىڭ كوكجيەگى كەڭەيىپ كەلەدى. اليانس قىزمەتىنىڭ باستى ارناسى دا وسىنداي اسقاق مۇراتتارعا نەگىزدەلگەن. بۇل رەتتە رەسپۋبليكالىق ازاماتتىق اليانس قۇرامىنا كىرگەن وڭىردەگى قوعامدىق بىرلەستىكتەردىڭ جەتەكشىلەرى بەلسەندى ءىس-قيمىل تانىتىپ ءجۇر دەدى ول.

مىنە، وسىلايشا ورال وڭىرىندە ۇەۇ بەلسەندىلىگى جىل سايىن ارتىپ كەلەدى.

سوڭعى جاڭالىقتار

ۇقساس جاڭالىقتار