ءيا, رەسەي وكىلىنىڭ بيىلعى ماۋسىمدا ءساتتى ونەر كورسەتىپ, الەمنىڭ ءتورتىنشى راكەتكاسى دارەجەسىنە دەيىن كوتەرىلگەنى راس. بىراق «ۇلكەن دۋلىعا» ساناتىنداعى تۋرنيرلەردە دانيل مەدۆەدەۆ بىردە-ءبىر رەت توپ جارعان ەمەس. 2019 جىلى اقش-تىڭ اشىق بىرىنشىلىگىنىڭ فينالىنا دەيىن جەتتى. مەدۆەدەۆتىڭ سپورتتىق مانسابىنداعى ەڭ ۇزدىك كورسەتكىشى وسى. دەسەك تە ۇلىبريتانيانىڭ استاناسىنداعى اتر-ءدىڭ قورىتىندى ءتۋرنيرىن رەسەيلىك تەننيسشى وتە قارقىندى وتكىزدى. ول توپتىق سايىستاردىڭ ۇشەۋىندە دە كۇمانسىز جەڭىسكە جەتتى. تارقاتىپ ايتساق, سەربيالىق نوۆاك دجوكوۆيچ (6:3, 6:3), گەرمانيالىق الەكساندر زۆەرەۆ (6:3, 6:4) جانە ارگەنتينالىق ديەگو شۆارتسمان (6:3, 6:3) سىندى ساڭلاقتاردى سان سوقتىردى. جارتىلاي فينالدا اتاعى الىسقا جايىلعان يسپانيانىڭ ماقتانىشى رافاەل نادالدان باسىم ءتۇستى – 6:7, 7:6, 6:3. اقتىق ايقاستا اۋستريالىق دومينيك ءتيمدى تىزە بۇكتىردى – 4:6, 7:6, 6:4.
وزدەرىڭىز بايقاعانداي, جارتىلاي فينالدىق جانە فينالدىق باسەكەنى مەدۆەدەۆ ءساتسىز باستادى. ەكى رەتتە دە ول ءبىرىنشى سەتتە جەڭىلىس تاپتى. بىراق سوعان بولا ونىڭ جىگەرى جاسىعان جوق. كەرىسىنشە, كورتقا قايراتتانىپ, قۋاتتانىپ شىقتى. ەكىنشى سەتتەردە ويىن تاي-برەيككە دەيىن ۇلاستى. شيەلەنىسكە تولى بۇل باسەكەلەردى دانيل ءوز پايداسىنا شەشتى. داڭقتى نادال دا, تەگەۋرىندى تيم دە شەشۋشى تۇستا رەسەي تەننيسشىسىنىڭ ەكىپىنىنە شىداس بەرە المادى. ءۇشىنشى سەتتە قارسىلاستارىنا قاراعاندا الدەقايدا شيراق قيمىلداعان مەدۆەدەۆ ءوزىنىڭ سپورتتىق مانسابىنداعى ەڭ زور تابىسىنا قول جەتكىزدى. اسىرەسە ونىڭ سوڭعى 10-15 جىلدا شاشالارىنا شاڭ جۇقتىرماي كەلە جاتقان الەمنىڭ 1-ءشى جانە 2-راكەتكالارىن ۇتقانىن اتاپ ايتقان ارتىق
ەمەس.
لوندونداعى جارىستىڭ جۇلدە قورى بيىل 5 ملن 700 مىڭ اقش دوللارىن قۇرادى. سونىڭ 1 ملن 564 مىڭى باس جۇلدەنى ولجالاعان دانيل مەدۆەدەۆكە بۇيىردى. تارقاتىپ ايتساق, ول تۋرنيرگە قاتىسقانى ءۇشىن 153 مىڭ, توپتىق سايىستارداعى ءار جەڭىسى ءۇشىن 153 مىڭنان, جارتىلاي فينالداعى جەڭىسى ءۇشىن 402 مىڭ جانە فينالدىق سايىستاعى جەڭىسى ءۇشىن 550 مىڭ دوللارعا يەلىك ەتتى. قالعان ويىنشىلار دا قۇرالاقان قالعان جوق. ولار دا تۇماندى البيون ەلىنەن ءبىراز ولجامەن ورالدى.
اتر-ءدىڭ قورىتىندى ءتۋرنيرىنىڭ تاريحىنا قىسقاشا توقتالساق, بۇل دودا 1970 جىلدان بەرى ۇزدىكسىز ۇيىمداستىرىلىپ كەلەدى. ءار جىلدارى توكيو, پاريج, بارسەلونا, بوستون, مەلبۋرن, ستوكگولم, حيۋستون, نيۋ-يورك, مايندەگى فرانكفۋرت, گاننوۆەر, ليسسابون, سيدنەي جانە شانحاي سىندى ءىرى شاھارلاردا ايتۋلى جارىستىڭ جالاۋى جەلبىرەدى. 2009 جىلدان بەرى بايراقتى باسەكە لوندوندا ءوتىپ كەلەدى. ال 2021 جىلدان باستاپ يتاليانىڭ تۋرين قالاسىندا ۇيىمداستىرىلاتىن بولادى.
جىل سوڭىندا وتەتىن وسى جارىستا ەڭ كوپ ولجاعا كەنەلگەن رودجەر فەدەرەر ەكەنى بارشاعا ءمالىم. 2003-2011 جىلدار ارالىعىندا شۆەيتساريانىڭ ساڭلاعى جەتى مارتە توپ جاردى. حح عاسىردىڭ سەكسەنىنشى جىلدارى چەحوسلوۆاكيالىق يۆان لەندل جانە توقسانىنشى جىلدارى امەريكالىق پيت سامپراستىڭ جاسىنداي جارقىلداعانى جانكۇيەرلەردىڭ جادىندا. بۇگىنگى تاڭدا نوۆاك دجوكوۆيچ تەڭدەسسىز ونەر كورسەتۋدە. اتاقتارى الىسقا جايىلعان ايتۋلى ازاماتتار بەس رەتتەن تەڭدەسسىز دەپ تانىلدى. بىلتىرعى جارىس گرەكيالىق ستەفانوس تسيتسيپاستىڭ جەڭىسىمەن اياقتالسا, بيىل دانيل مەدۆەدەۆتىڭ مەرەيى ۇستەم بولدى. بۇل – رەسەي تەننيسشىلەرىنىڭ اتر-ءدىڭ قورىتىندى تۋرنيرىندە ەكىنشى مارتە توپ جارۋى. العاش رەت وسىدان 11 جىل بۇرىن, ياعني 2009 جىلى ءدال وسى اتاققا نيكولاي داۆىدەنكو قول جەتكىزگەن بولاتىن.
