وتكەن عاسىردىڭ 40-جىلى الماتى وبلىسىنىڭ قاراساي اۋدانىنا قاراستى شامالعان اۋىلىندا تۋعان اقىن قازاقتىڭ ايتىس ونەرىندەگى ايتۋلى تۇلعانىڭ ءبىرى. ۇلتى ورىس بولعانىمەن, قازاق مەكتەبىندە ءبىلىم العان نادەجدا اندرەيقىزى قالامدى بالا كۇنىنەن جولداس قىلىپ, ەل ءومىرىن, تابيعات عاجايىبىن جىرمەن كەستەلەگەن. 1969 جىلى اباي اتىنداعى قازاق پەداگوگيكالىق ينستيتۋتى فيلولوگيا فاكۋلتەتىنىڭ قازاق ءبولىمىن بىتىرگەن. ال ايتىس ساحناسىنا العاش1963 جىلى قىزىلوردا قالاسىندا شىعىپ, وسىندا وتكەن وبلىستىق ايتىسقا قاتىسىپ, جۇلدەگەر بولدى. ونىڭ شىمكەنتتىك اقىن قالدىبەك الىقۇلوۆپەن ايتىسى كينوعا ءتۇسىرىلىپ, كەڭەس وداعى كورەرمەندەرىنىڭ نازارىنا ۇسىنىلعان. نادەجدا لۋشنيكوۆا تەك ايتىس ونەرىندە عانا ەمەس, رۋحانياتتىڭ باسقا سالاسىندا دا تەر توكتى. كوپ جىلدار گازەتتە ادەبي قىزمەتكەر, باسپا رەداكتورى, مەكتەپتە مۇعالىم بولدى. 1985 جىلدان باستاپ ۇمبەتالى كارىباەۆ مۇراجايىنىڭ ديرەكتورى قىزمەتىن اتقارىپ, بۇگىندە زەينەتكە شىققان.
اقىن نادەجدا لۋشنيكوۆانىڭ 80 جاسقا تولۋىنا وراي مەملەكەت باسشىسى قاسىم-جومارت توقاەۆ قۇتتىقتاۋ حاتىن جولداعان ەكەن. جاقىندا الماتى قالاسى اكىمىنىڭ ورىنباسارى ەرجان باباقۇماروۆ نادەجدا اندرەيقىزىنىڭ شاڭىراعىنا كەلىپ, پرەزيدەنتتىڭ سالەمىن جەتكىزدى. ال الماتى وبلىسى اكىمىنىڭ ورىنباسارى رۋستام ءالي اقىندى وبلىس باسشىسى اماندىق باتالوۆتىڭ اتىنان قۇتتىقتاپ, وبلىستىق ءماسليحاتتىڭ شەشىمىمەن بەرىلگەن «الماتى وبلىسىنىڭ قۇرمەتتى ازاماتى» اتاعىن تاپسىردى.
سونداي-اق نادەجدا اقىن ءوز تۋعان كۇنىندە مادەنيەت جانە سپورت ءمينيسترى اقتوتى رايىمقۇلوۆادان, «قازاقستاندىق سالالىق مادەنيەت, سپورت, تۋريزم جانە اقپارات قىزمەتكەرلەرىنىڭ كاسىپتىك وداعى» قوعامدىق بىرلەستىگىنەن, وبلىستىق مادەنيەت, ارحيۆتەر جانە قۇجاتتاما باسقارماسىنان دا العىس حاتتار الدى. ال اۋدان اكىمى باعدات اليەۆ اقىنعا بارشا جامبىل اۋدانى تۇرعىندارىنىڭ ىستىق سالەمىن جەتكىزىپ, سىي-سياپات جاسادى.
الماتى وبلىسى
