كەزدەسۋلەر بارىسىندا بيزنەستىڭ جۇيەلى ماسەلەلەرى مەن ولاردى شەشۋ جولدارى قاراستىرىلۋدا. اتاپ ايتقاندا, وزبەكستاننان قازاقستانعا جەڭىل ونەركاسىپ ونىمدەرىن جانە باسقا دا تۇتىنۋ تاۋارلارىن زاڭسىز تاسىمالداۋ وتاندىق ءونىمنىڭ ساتىلۋى مەن ءوندىرىسىنىڭ تومەندەۋىنە, جۇمىس ورىندارىنىڭ قىسقارۋىنا, بيۋدجەتكە سالىق تۇسىمدەرىنىڭ ازايۋىنا سوقتىردى. وسى جاعدايدى شەشۋ ءۇشىن ءا.سمايىلوۆ ءتيىستى مەملەكەتتىك ورگاندارعا زاڭسىز يمپورتقا قارسى جول كارتاسىن ازىرلەۋدى تاپسىردى.
كوروناۆيرۋس پاندەمياسى اۆياتسيا سالاسىنىڭ بيزنەس-پروتسەستەرىنە دە ايتارلىقتاي اسەر ەتتى. قازاقستاندىق اۋە كومپانيالارى ءۇشىن ەاەو ەلدەرىنىڭ اۋماعىندا اۆياتسيالىق قوزعالتقىشتاردى, وتاندىق اۋە كەمەلەرىنە ارنالعان قوسالقى بولشەكتەر مەن جابدىقتاردى جەتكىزۋ مەرزىمدەرىنىڭ ساقتالماۋى, سونداي-اق ولاردى جوندەۋگە جانە تەحنيكالىق قىزمەت كورسەتۋگە قاتىستى ءتارىزدى پروبلەمالار تۋىندادى. سونىڭ سالدارىنان اتالعان سالاداعى مودەرنيزاتسيا السىرەدى.
وتىرىستا جەر زاڭناماسىن بۇزعانى ءۇشىن اكىمشىلىك جاۋاپكەرشىلىكتىڭ ءتيىمدى شارالارىن قابىلداۋ ماسەلەسى دە تالقىلاندى. ءاربىر تالقىلانعان ماسەلە بويىنشا شەشىم قابىلدانىپ, نۇسقاۋلار بەرىلدى. بىرقاتار ماسەلەلەر ۋاكىلەتتى ورگاندار تاراپىنان جان-جاقتى تالقىلانۋى ءۇشىن ۆەدومستۆوارالىق كوميسسيانىڭ قاراۋىنا جىبەرىلەدى. بۇعان دەيىن اگرارلىق سەكتوردى قولداۋ, جەڭىلدەتىلگەن جانە ليزينگتىك نەسيەلەۋ باعدارلاماسىن ىسكە اسىرۋ, سۋ ۇنەمدەيتىن تەحنولوگيالاردى ازىرلەۋ, شەتەلدەن ساتىپ الىنعان باعدارلامالىق جاساقتامانى وتاندىق باعدارلامالارعا الماستىرۋ مۇمكىندىگى, قۇرىلىستا ەۋروكودتاردى پايدالانۋ, مەملەكەتتىك ساتىپ الۋ پورتالىندا وتاندىق وندىرۋشىلەردىڭ ءتىزىمىن جاڭارتۋ جانە وتاندىق بيزنەستى دامىتۋ مەن قولداۋدىڭ باسقا دا ماسەلەلەرى قارالعان ەدى.
