پارتيانىڭ سايلاۋالدى باعدارلاماسىن تالقىلاۋعا قازاقستان ستراتەگيالىق زەرتتەۋلەر ينستيتۋتىنىڭ ديرەكتورى زارەما شاۋكەنوۆا, ەكونوميكالىق زەرتتەۋلەر ينستيتۋتىنىڭ توراعاسى رۋسلان سۇلتانوۆ, ساياساتتانۋشىلار ايدوس سارىم, ماكسيم كازناچەەۆ, يسلام كۋراەۆ جانە راسۋل جۇمالى, ەۋرازيالىق ينتەگراتسيا ينستيتۋتىنىڭ ديرەكتورى ەرلان سايروۆ, «تالاپ» قولدانبالى زەرتتەۋلەر ورتالىعىنىڭ باسشىسى راحىم وشاقباەۆ, ساراپشىلار يارالي حاليلوۆ, نۇرلان ماحمۋدوۆ, بەللا گازديەۆا, ءلاززات نۇرقاتوۆا قاتىستى.
كەزدەسۋدە ءسوز العان Nur Otan پارتياسىنىڭ حاتشىسى ارمان قىرىقباەۆ ەلباسى, پارتيا ليدەرى نۇرسۇلتان نازارباەۆتىڭ تاپسىرماسىمەن جۇمىس توبى ۇكىمەتپەن بىرلەسە بۇرىنعى تاجىريبە مەن الەمدىك ترەندتى ەسكەرە وتىرىپ, قوعام سۇرانىسىنا جاۋاپ بەرەتىن باعدارلامانى ەكى اي بويى پىسىقتاعانىن جەتكىزدى.
ەلىمىز بويىنشا 70-كە جۋىق فوكۋس-توپتان تۇراتىن زەرتتەۋ جۇرگىزىلىپ, حالىقتىڭ كوڭىل كۇيى مەن مەملەكەتتىك ورگاندار, ساياسي پارتيالاردان نە كۇتەتىنى زەردەلەنگەن.
باستاپقىدا باعدارلاما جوباسى سالالىق سيپاتقا يە بولسا, پىسىقتالعاننان كەيىن بەسجىلدىق قۇجاتتا حالىقتىڭ بارلىق توبىنىڭ سۇرانىسى بارىنشا قامتىلعان.
Nur Otan پارتياسىنىڭ باعدارلاماسى پرەزيدەنت قاسىم-جومارت توقاەۆتىڭ سايلاۋالدى تۇعىرناماسى مەن حالىققا جولداۋىندا كورسەتىلگەن مىندەتتەرگە نەگىزدەلگەن. اتالعان قۇجاتتارداعى يدەيالار پارتيانىڭ سايلاۋالدى باعدارلاماسىنىڭ ناقتى ينديكاتورلارىندا, شارالارى مەن مىندەتتەرىندە انىق كورىنەدى.
ساراپشىلار Nur Otan پارتياسىنىڭ باعدارلاماسى پاندەميا سالدارىنان تۋىنداعان كۇردەلى ەكونوميكالىق احۋالعا قاراماستان, جوعارى كورسەتكىشتەردى كوزدەيتىنىن اتاپ ءوتتى. ولار سونداي-اق جاقىندا وتكەن پارتياىشىلىك پرايمەريزگە قاتىستى دا پىكىرلەرىن ءبىلدىردى.
ساراپشى بەللا گازديەۆانىڭ ايتۋىنشا, پرايمەريزدىڭ ارقاسىندا ازاماتتاردىڭ وزەكتى ۇسىنىستارى مەن وتىنىشتەرى جينالىپ, باعدارلاما جوباسىنا ەنگەن. ءوز كەزەگىندە ساياساتتانۋشى ماكسيم كازناچەەۆ پارتيا الداعى سايلاۋ ناۋقانىنىڭ كۇن ءتارتىبىن ايقىنداپ العانىن اتاپ ءوتتى.
«سايلاۋالدى باعدارلاما پارتيانىڭ داعدارىس كەزىندە جەدەل شەشىمدەر قابىلداي وتىرىپ, زامان ىرعاعىنا ساي ارەكەت ەتەتىنىن كورسەتەدى. وتكەن پرايمەريز پارتيانىڭ جۇيەلى جاڭارۋعا دايىن ەكەنىن دالەلدەدى. پارتياىشىلىك ىرىكتەۋ بارىسىندا بەلسەندى تۇلعالاردى انىقتاۋعا مۇمكىندىك تۋدى. پارتيا قاتارى جاڭا مۇشەلەرمەن, ونىڭ ىشىندە ءوز سالاسىنىڭ تانىمال تۇلعالارىمەن تولىقتى. وڭىرلەردەگى پىكىرتالاستاردا باعدارلامالاردىڭ قىزۋ تالقىلانۋى قورىتىندى قۇجاتتا ناقتى پروبلەمالاردىڭ ەسكەرىلەتىنىن بىلدىرەدى», دەدى ماكسيم كازناچەەۆ.
كەزدەسۋ سوڭىندا قاتىسۋشىلار بىرقاتار ۇسىنىستارىن ورتاعا سالدى. ارمان قىرىقباەۆ بارلىق ۇسىنىستاردىڭ قارالىپ, ەسكەرىلەتىنىن جەتكىزدى.
وسىعان دەيىن پارتيا كوشباسشىسى نۇرسۇلتان نازارباەۆتىڭ تاپسىرماسىمەن Nur Otan ءار ءوڭىر, قالا مەن اۋدان بويىنشا 216 سايلاۋالدى باعدارلاماسىنىڭ جوباسىن ازىرلەگەن-ءدى. جوبالار وڭىرلەردەگى, ونىڭ ىشىندە شالعاي ەلدى مەكەندەردەگى حالىقپەن كەزدەسۋلەردەن تۇيگەن ماسەلەلەر كارتاسى نەگىزىندە ازىرلەنگەن.
پرەزيدەنت قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا باعدارلامالاردىڭ بارلىق جوبالارى پرايمەريز بارىسىندا تۇرعىندارمەن كەڭىنەن تالقىلانىپ, قابىلدانعان وڭىرلىك باعدارلامالاردا ازاماتتاردان تۇسكەن 17 مىڭ ۇسىنىس پەن ەسكەرتۋلەردىڭ 80%-دان استامى نازارعا ىلىككەن.
