قازاقستان • 24 قاراشا، 2020

25 مىڭعا جۋىق قازاقستاندىق ەكولوگيانى جاقسارتۋ شارالارىن ازىرلەۋگە كومەكتەستى

13 رەت كورسەتىلدى

قازاقستاننىڭ ەكولوگيا مينيسترلىگىنىڭ باسشىسى ماعزۇم مىرزاعاليەۆ سەيسەنبى كۇنى ۇكىمەت وتىرىسىندا رەسپۋبليكانىڭ ەكو-بەلسەندىلەرىمەن بىرلەسىپ ازىرلەنگەن وڭىرلەردەگى ەكولوگيالىق احۋالدى جاقسارتۋ جونىندەگى جول كارتالارىن تانىستىردى.

ەكولوگيا مينيسترلىگىنىڭ باسشىسى قورشاعان ورتانى جاقسارتۋ بويىنشا ماڭىزدى شارالاردى قاراستىراتىن ەكولوگيالىق كودەكستىڭ جوباسى ماجىلىسپەن ماقۇلدانىپ، سەناتتىڭ قاراۋىنا جىبەرىلگەنىن ەسكە سالدى.

«جاڭا ەكولوگيالىق كودەكستىڭ قابىلدانۋىن كۇتپەي، «حالىق ۇنىنە قۇلاق اساتىن مەملەكەت» تۇجىرىمداماسىنا سۇيەنە وتىرىپ، ەكولوگيالىق پروبلەمالار مەن ولاردى جۇرتشىلىقپەن، اسىرەسە بارلىق وڭىرلەردەگى ەكوبەلسەندىلەرمەن شەشۋ جولدارى قارالدى. بارلىعى ون جەتى ونلاين كەزدەسۋ وتكىزىلدى. جيىرما بەس مىڭعا جۋىق ادام قاتىستى»، - دەدى مينيستر.

جۇرتشىلىقپەن، اكىمدىكتەرمەن جانە تابيعات پايدالانۋشىلارمەن بىرلەسكەن جۇمىس ناتيجەسىندە وڭىرلەردىڭ ەكولوگياسىن جاقسارتۋ جونىندەگى ناقتى شارالاردى كوزدەيتىن ون جەتى جول كارتاسى ازىرلەندى.

ماسەلەن، قاراعاندى وبلىسىنىڭ ەكولوگيالىق جاعدايىن جاقسارتۋ ءۇشىن دايىندالعان جول كارتاسىندا ەلۋ جەتى ءىس-شارا قاراستىرىلعان. ولاردىڭ اراسىندا «ارسەلورميتتال تەمىرتاۋ» كاسىپورنىندا قازاندىق جانە گاز تازالاۋ جابدىعىن قايتا جاڭارتۋ، اك كۇيدىرۋ تسەحىن تەمىرتاۋ قالاسىنان تىس شىعارۋ جانە جەزقازعان قالاسىندا «قازاقمىس» كاسىپورنىنىڭ جاڭا كۇكىرت قىشقىلى تسەحىن سالۋدى ايتۋعا بولادى. بۇل شارالار قورشاعان ورتاعا تەرىس اسەردى تومەندەتۋگە مۇمكىندىك بەرەدى. سونداي-اق، تەمىرتاۋ قالاسىندا وندىرىستىك اعىندى سۋلاردى تازارتۋ تورابىن جانە بالقاش پەن جەزقازعاندا جاڭا كارىزدىك تازارتۋ كەشەندەرىن سالۋ، «ارسەلورميتتال تەمىرتاۋ» قالدىقتارىن كادەگە جاراتۋ، جەزقازعاندا بيوەلەكتروستانتسيا سالۋ جانە «داريال-ۋ» جەرلەرىن قالپىنا كەلتىرۋ جوسپارلانعان.

الماتى قالاسى بويىنشا جول كارتاسىندا جيىرما ءىس-شارا قاراستىرىلعان. ولاردىڭ ىشىندە: جەو-2 جانە جەو-3 گازعا اۋىستىرۋ، قالاعا ىرگەلەس جاتقان جەكە سەكتور اۋداندارىن گازداندىرۋ، كوممۋنالدىق قىزمەتتەر مەن قوعامدىق كولىكتىڭ اۆتوكولىگىن سىعىلعان تابيعي گازعا اۋىستىرۋ، ديزەل وتىنىمەن قوعامدىق كولىككە كەزەڭ-كەزەڭىمەن تىيىم سالۋ، كوگالداندىرۋ جانە ت.ب.

اقتوبە وبلىسىنىڭ جول كارتاسىندا وتىز ءۇش ءىس-شارا قاراستىرىلعان.

وڭىرلىك ەكو-بەلسەندىلەرمەن بارلىق تالقىلاۋلار ەكولوگيا مينيسترلىگى باسشىسىنىڭ قاتىسۋىمەن ءوتتى.

سوڭعى جاڭالىقتار

ىندەت جۇقتىرعاندار سانى كوبەيدى

كوروناۆيرۋس • بۇگىن، 13:58

سەمەيگە جاڭا اكىم تاعايىندالدى

تاعايىنداۋ • بۇگىن، 11:57

الماتىدا 10 كىتاپحانا جاڭارتىلدى

ايماقتار • بۇگىن، 10:47

قازاقستان «قىزىل» ايماققا كىردى

قازاقستان • بۇگىن، 09:30

جىر بايگەسى مارەسىنە جەتتى

ادەبيەت • بۇگىن، 07:14

ونەرتاپقىش ورەن

ايماقتار • بۇگىن، 07:13

ۇقساس جاڭالىقتار