ينفراقۇرىلىمى الەمنىڭ ەڭ وزىق ستاندارتتارىنا ساي كەلەتىن نىساندا ءبىر مەزگىلدە 650 بالا جاتتىعا الادى. مۇنداعى 11 كورتتىڭ جەتەۋى جابىق. سونىمەن قاتار جالپى جانە ارنايى دەنە شىنىقتىرۋ جۇمىستارىنا ارنالعان زالدار بار.
مەملەكەت باسشىسى جاڭا ورتالىقتىڭ تەحنيكالىق جابدىقتالۋىنا ريزاشىلىق ءبىلدىردى. مىسالى ورتالىقتا ATP/WTA Challenger دەڭگەيىندەگى الەمنىڭ ۇزدىك 100 ويىنشىسى قاتىساتىن حالىقارالىق جانە رەسپۋبليكالىق تەننيس جارىستارىن وتكىزۋگە, سونداي-اق, وتاندىق سپورتشىلاردىڭ كاسىبي شەبەرلىگىن شىڭداۋعا مۇمكىندىك جاسالعان.
– قالا ومىرىندەگى وسىنداي ماڭىزدى نىساننىڭ پايدالانۋعا بەرىلۋىمەن قۇتتىقتايمىن. ءبىز قازىر بۇقارالىق سپورتتى دامىتۋدى ماقسات ەتىپ وتىرمىز. مىنا سپورت ورتالىعى بارلىق بالالاردىڭ ۇلكەن تەننيسپەن شۇعىلدانىپ, دەنساۋلىعىن كۇشەيتۋگە مۇمكىندىك بەرەدى. بۇل كوپجاقتى ءارى ىڭعايلى نىسان. وسى مۇمكىندىكتى پايدالانا وتىرىپ, قازاقستان تەننيس فەدەراتسياسىنىڭ پرەزيدەنتى بولات ءجامىش ۇلى وتەمۇراتوۆقا ريزاشىلىعىمدى بىلدىرەمىن, – دەدى مەملەكەت باسشىسى.
جالپى كولەمى 7,8 مىڭ شارشى مەتردى قۇرايتىن نىسان قۇرىلىسىنا جەكە ينۆەستورلار 2,4 ملرد تەڭگە كولەمىندەگى قاراجات سالعان ەكەن. جاڭادان اشىلعان سپورت نىسانىندا 18 ۇستەلگە ارنالعان ويىن زالى, توعىز تەننيس ۇستەلى ورنالاسقان جاتتىعۋ زالى, مەديتسينا جانە ماسساج كابينەتتەرى, جاتتىعۋ زالى, اكىمشىلىك عيماراتى, تورەشىلەر مەن باپكەرلەردىڭ بولمەلەرى, ءماجىلىس زالى مەن VIP-ورىندار بار. سونىمەن قاتار مۇندا ءماجىلىس زالى مەن ەكى كافەتەري جانە قوناق ءۇي كەشەنى بار. ورتالىقتىڭ 1,5 گەكتار اۋماعى تولىعىمەن اباتتاندارىلىپ, كوگالداندىرىلعان.
قاسىم-جومارت توقاەۆ ورتالىقتىڭ تەك جاتتىعىپ قانا قويماي, حالىقارالىق جارىس وتكىزۋگە بارلىق جاعداي جاسالعان كەلىستى نىسان ەكەنىن اتاپ ءوتتى. سوىنمەن قاتار مەملەكەت باسشىسى ۇستەل تەننيسىنىڭ پرەزيدەنتى دانيار ابىلعازينگە, قاراعاندى وبلىسىنىڭ اكىمى جەڭىس قاسىمبەككە, قازاقستان قۇراماسىنىڭ ۇستەل تەننيسىنەن باس باپكەرى ەلميرا اليەۆاعا العىس ايتىپ, مول جەتىستىك تىلەدى.
