بۇل جارىستا قازاقستان, ءازىربايجان جانە وزبەكستاننان كەلگەن بىلعارى قولعاپ شەبەرلەرى كۇش سىناستى.
شارشى الاڭعا 12 جۇپ شىقتى. سولاردىڭ اراسىنان ءتورت جەرلەسىمىزدىڭ ونەرى ەرەكشە اسەر قالدىردى. اتاپ ايتساق, 66,6 كيلو سالماقتا ونەر كورسەتكەن اتىراۋلىق بەكبولات قۇرامىسوۆ الماتى وبلىسىنىڭ وكىلى ولجاس تۇرسىنبايمەن كەزدەستى. قازاقستان رەسپۋبليكاسىنا ەڭبەك سىڭىرگەن جاتتىقتىرۋشىلار داستان سادۋاقاسوۆ پەن سارسەنباي تورعاەۆتان ءتالىم-تاربيە العان ايتۋلى بوكسشىنىڭ ستۋدەنتتەر اراسىنداعى الەم چەمپيوناتىنىڭ ەكى دۇركىن ءفيناليسى جانە ازيا بىرىنشىلىگىنىڭ قولا جۇلدەگەرى دەگەن اتاقتارى بار. كەزىندە بەكبولات «استانا ارلاندارى» ساپىندا جۇدىرىقتاسقانى دا جادىمىزدا. وسىنداي ۇلكەن مەكتەپتەن وتكەن ساقا سپورتشىعا كاسىپقوي رينگتەگى تۇساۋكەسەر كەزدەسۋىن وتكىزگەن ولجاستى ۇتۋ ايتارلىقتاي قيىندىق تۋعىزعان جوق. قۇرامىسوۆ قارسىلاسىن اسا اۋىر سوققىلاردىڭ استىنا العاننان سوڭ تورەشى جەكپە-جەكتى ءۇشىنشى راۋندتا توقتاتتى.
63,5 كيلو سالماق دارەجەسىندەگى باۋىرجان بەيىلدينوۆءتىڭ دە ونەرى جاقسى اسەر قالدىردى. الماتى وبلىسى ىلە اۋدانىنىڭ اتىنان شىعىپ جۇرگەن جاس جىگىتتىڭ جەكپە-جەگىن بۇعان دەيىن دە تاماشالاعان ەدىك. تۇساۋكەسەر كەزدەسۋىندە ول قارسىلاسىن ەكىنشى راۋندا ەسىنەن تاندىرعان ەدى. باۋىرجان بۇل جولى دا سول باعىتىنان جاڭىلعان جوق. ول جەتىسۋ ءوڭىرىنىڭ تاعى ءبىر تۇلەگى اقجول نۇردۋندى باسەكە باستالعان بەتتە بۇيىردەن ۇرىپ سۇلاتىپ سالدى.
ءبىر شوعىر ساڭلاقتاردى تاربيەلەگەن تانىمال باپكەر ساعاتبەك مۇساحانوۆتىڭ دا شاكىرتتەرى وسى جارىستار جاسىنداي جارقىرادى. كوپتەگەن بوكس كەشتەرىندە ونەر كورسەتىپ, جانكۇيەرلەر جۇرەگىن جاۋلاپ ۇلگەرگەن جەڭىل سالماقتاعى ەسكەندىر حارسانالتى راۋندتىق باسەكەدە ەرجان جاسۇلاندى جەڭدى. ونىڭ تاكتيكالىق تا, تەحنيكالىق تۇرعىدان دا قارسىلاسىنان شەبەرلىك دەڭگەيى ءبىر باس جوعارى ەكەنى كوزگە انىق ۇرىپ تۇردى. ورتا سالماقتاعى عاني سپاتاەۆ (79,7 كيلو) تاجىكستاندىق ابۋۆاحيت راحماتۋللاەۆتى ايقىن باسىمدىقپەن ۇتتى.
