57 كيلو سالماق دارەجەسىندەگى بارلىق بالۋانداردىڭ دەڭگەيلەرى بىردەي بولدى. جارىس قارساڭىندا دۋالى اۋىز مامانداردىڭ وزدەرى ەشكىمدى بولە-جارا اتاي المادى. دەسەك تە جەكپە-جەكتە ءبىر عانا جەڭىمپاز بولۋعا ءتيىس. بۇل جولى اقمولالىق داۋلەت تەميرجانوۆ دارا شىقتى. فينالدا قانداسىمىز قاراعاندىلىق جاۆوحير يريستاەۆتى جەڭدى. شىمكەنتتىك عابيت تولەپباي مەن جامبىلدىق راحات قالجان قولا مەدالداردى يەلەندى.
86 كيلو سالماقتا شىعىسقازاقستاندىق ازامات داۋلەتبەكوۆ پەن الماتىلىق ادىلەت داۋلىنباەۆتىڭ ءوزارا تارتىسىن تاعاتسىزدانا كۇتتىك. ەكەۋى دە تالاي ءدۇبىرلى دودالاردا ابدەن ىسىلعان اككى بالۋاندار. بارلىق قارسىلاستارىن سىپىرا ۇتقان ازامات اقتىق سىنعا القىنباي جەتتى. ال ادىلەت جارتىلاي فينالدا تالدىقورعاندىق ەسقالي داۋلەتقازىنىڭ وسال تۇسىن تابا المادى. فينالدا داۋلەتبەكوۆ پەن داۋلەتقازى كۇرەستى. بۇل باسەكەدە ازاماتتىڭ اسىعى الشىسىنان ءتۇستى. ادىلەت پەن ماڭعىستاۋلىق نۇرداۋلەت كوكتەۋباەۆ ءۇشىنشى ورىنعا تابان تىرەدى.
