قازاقستاندىقتار بۇل ماتچقا مىناداي قۇرامدا شىقتى: پوكاتيلوۆ, ماروچكين, لوگۆينەنكو, ءالىپ, ۆوروگوۆسكي, تاعىبەرگەن, ابىكەن, دوسماعامبەتوۆ, قۋات, ششەتكين جانە ايىمبەتوۆ. ليتۆانىڭ نامىسىن مىنا ويىنشىلار قورعادى: شۆەدكاۋسكاس, ۆايتكۋناس, گيردۆاينيس, بەنەتا, ميكوليۋناس, ۆوروبەۆ, شيمكۋس, سيرگەداس, سليۆكا, نوۆيكوۆاس جانە لاۋكجەميس.
العاشقى جارتى ساعاتتا ەكى كوماندانىڭ ويىنشىلارى الما-كەزەك شابۋىلدار ۇيىمداستىرعانىمەن, كوگىلدىر ەكرانعا كوز تىككەن كورەرمەندەر ەلەڭ ەتە قالاتىنداي ەش نارسە بولعان جوق. قاقپاعا سوققى باعىتتاۋ بىلاي تۇرسىن, تىپتەن ايىپ الاڭىندا بولعان اسا ءبىر قاۋىپتى ءساتتى كورە المادىق. ايتەۋىر, بىردە قازاقستاننىڭ, بىردە ليتۆانىڭ فۋتبولشىلارى ارامتەر بولىپ, ءارلى-بەرلى جۇگىرىپ ءجۇردى. ويىننىڭ 38-مينۋتىندا الاڭ يەلەرى بۇرىشتاما بەرۋ مۇمكىندىگىنە يە بولدى. قاقپا ماڭىنا باعىتتالعان دوپقا ەگيديۋس ۆايتكۋناس پەن ابات ايىمبەتوۆ قاتار سەكىردى. ءسال شاپشاڭداۋ قيمىلداعان قانداسىمىز قورعاۋشىنىڭ الدىن وراپ كەتتى. اباتتىڭ باسپەن سوققان دوبى قاقپا تورىنان تابىلدى. قازاقستان العا شىقتى – 1:0.
شىنى كەرەك, ابات ايىمبەتوۆتىڭ ادەمى دە اسەرلى گولىنا قۋانتىپ تا ۇلگەرمەدىك. ارادا ەكى مينۋت وتپەي جاتىپ, تارازى باسى تەڭەستى. بۇل رەتتە ەگيديۋس ۆايتكۋناستىڭ ەڭبەگى ەرەن. سونىڭ الدىندا عانا ورەسكەل قاتەلىك جىبەرگەن قورعاۋشى سول قاپتالمەن جانۇشىرا العا ۇمتىلدى. ايىپ الاڭىنا جاقىنداعان تۇستا مودەست ۆوروبەۆقا جاقسى پاس بەردى. ول ءوز مۇمكىندىگىن قالت جىبەرمەدى – 1:1.
ەكىنشى كەزەڭ باستالعان بەتتە ەكىنشى رەت سارى قاعاز العان يسلامبەك قۋات الاڭنان قۋىلدى. الاڭدا ءبىر ويىنشىسى كەم بولسا دا, قازاقستاندىقتار قارسىلاستارىنا تىزگىندى بەرمەدى. بالتىق جاعالاۋىنان كەلگەن جىگىتتەر دە جاعدايدى شيەلەنىستىرۋگە اسىقپادى. ويتكەنى تەڭ ويىن ولاردى قاناعاتتاندىرادى. وسىلايشا, ويىن ءبىر سارىندى ءوربىپ جاتتى. ەكى كوماندا دا وسى ەسەپكە كەلىسكەندەي اسەردە بولدىق. الايدا نەگىزگى ۋاقىتقا تورەشى قوسقان ءتورت مينۋتتىڭ سوڭعى سەكۋندتارىندا قوناقتار تارازى باسىن تەڭسەلتىپ كەتتى. ءدال ايىپ الاڭىنداعى سىزىقشانىڭ قاسىنا كەلگەن بەتتە ارۆيداس نوۆيكوۆاستىڭ شىرەنە تەپكەن دوبى نىساناعا ءدال ءتيدى – 1:2.
ءسويتىپ, قازاقستان ۇلتتىق قۇراما كومانداسى ايتۋلى جارىستىڭ س توبىنداعى ەڭ سوڭعى 4-ورىندا قالىپ قويدى. ءبىزدىڭ فۋتبولشىلار بار-جوعى ءتورت ۇپايدى قاناعات تۇتتى. كوش باسىندا – البانيا (11 ۇپاي). ەكىنشى جانە ءۇشىنشى ورىنداردى بەلارۋس (10 ۇپاي) پەن ليتۆا (8 ۇپاي) يەلەندى. ەندى توپتىڭ كوشباسشى قۇراماسى ءبىر ساتى جوعارىلاسا, بەلارۋس پەن ليتۆا وسى توپتا قالا بەرەدى. ال قازاقستان قۇراماسى الداعى جىلدىڭ ناۋرىز ايىندا ءتۇيىسۋ كەزدەسۋلەرىن وتكىزەدى. ءساتتى ويناسا, توپتاعى ءوز ورنىن ساقتاپ قالادى, ءساتسىز ونەر كورسەتسە, ءبىر ساتى تومەن تۇسەدى. ءسويتىپ, ىڭعايسىز بولسا دا ايتايىق, گيبرالتار, سان-مارينو, ليحتەنشتەين سياقتى كارليك-ەلدەردىڭ قۇراماسىمەن قايتادان جوعارىلاۋ ءۇشىن باسەكەگە تۇسەتىن بولادى.
