جوعارىداعى ءسوزىمىزدى تارقاتا كەتەيىك, مەكتەپكە وقۋشىنى دايىندايتىن – ارينە مەكتەپكە دەيىنگى ۇيىم. كەيىنگى كەزدە اتا-انالاردان ءبىرىنشى سىنىپقا باراتىن بالالارىنىڭ قاتتى قينالاتىنىن ەستىپ ءجۇرمىز. ورتا ءبىلىم بەرۋدىڭ مازمۇنى جاڭارتىلعاندا مەكتەپكە دەيىنگى بىلىمدە دە جاڭا باعىتقا قاراي وزگەرىس بولۋى كەرەك. مىنە, ءبىز قالالىق ءبىلىم باسقارماسىمەن بىرلەسىپ, سونداي-اق بالاباقشامىزدا تاربيەشى-پەداگوگتەرمەن وسى باعىتتا جۇيەلى جۇمىستاردى جۇرگىزىپ كەلەمىز. نەگىزىنەن وسىدان ءۇش جىلداي بۇرىن قىزىلوردا قالالىق ءبىلىم ءبولىمىنىڭ تاپسىرماسى بويىنشا قالاداعى مەملەكەتتىك جانە جەكەمەنشىك بالاباقشالاردىڭ «№7 ايماق» دەپ اتالاتىن توبى قۇرىلدى. وسى توپ مەكتەپكە دەيىنگى ۇيىم قىزمەتكەرلەرىنىڭ پەداگوگيكالىق باعىتتا ءوزارا تاجىريبە الماسۋىنا كوپ سەپتىگىن تيگىزدى. اسىرەسە جاڭارتىلعان ءبىلىم مازمۇنىنا قاتىستى ادىستەمەلىك كۇندەر تۇراقتى ۇيىمداستىرىلىپ وتىردى. بۇدان بولەك ءبىز دە تاربيە مەن ءبىلىم ۇياسىندا ءوزىمىزدىڭ ماماندارعا تاجىريبەلىك, ادىستەمەلىك ساعاتتاردى وتكىزەمىز.
سول تاجىريبەمە سۇيەنىپ, مەكتەپكە دەيىنگى تاربيە مەن وقىتۋدا جاڭارتىلعان ءبىلىم مازمۇنىنىڭ ەرەكشەلىكتەرى جايىنداعى ماڭىزدى ويلارىمدى ايتا كەتكىم كەلەدى. جاڭارتىلعان ءبىلىم مازمۇنىندا بالانى باعالاۋدىڭ ەرەكشە ءادىسى بار, مۇندا ءاربىر ارەكەتىن, جەتىستىگىن, تالپىنىسىن كورىپ, سوعان ساي باعا بەرىپ وتىرۋ قاجەت. شىن مانىندە باعالاۋ, ماداقتاۋ, ىنتالاندىرۋ ادىستەرى مەكتەپ جاسىنا دەيىنگى بالالار ءۇشىن, ولاردىڭ دامىپ, جەتىلۋى ءۇشىن ۇلكەن ماڭىزعا يە. سوندىقتان بۇل ادىستەردى جاڭارتىلعان مازمۇندا جاڭعىرتا ءجۇرۋ مەكتەپكە دەيىنگى تاربيە جانە ءبىلىم بەرۋمەن اينالىساتىن كەز كەلگەن پەداگوگتىڭ قولىنان كەلەدى.
ال جاڭارتىلعان ءبىلىم مازمۇنىنداعى 4 داعدىنى (تىڭدالىم, ايتىلىم, جازىلىم, وقىلىم) ءالى ءارىپ تانىپ, دىبىستى دۇرىس ايتا المايتىن بالالاردا قالىپتاستىرۋ قيىن-اق. دەسەك تە مەكتەپكە دايىندالىپ جۇرگەن بالانىڭ تىڭداي الۋى, تۇسىنگەنىن, ۇيرەنگەنىن وزگەگە ايتىپ جەتكىزە الۋى, سونىمەن قاتار الداعى جازۋعا دايىندالىپ شيمايلاي الۋى جانە ءتۇرلى بەينەلەر مەن فورمالاردى, بەلگىلەردى اجىراتىپ وقۋعا دايىندالۋى اسا كەرەك. سول سەبەپتى وسى ءتورت داعدىنى بالانىڭ بويىندا بالاباقشادان قالىپتاستىرۋعا مەكتەپكە دەيىنگى ۇيىمداردىڭ پەداگوگتەرى كوپ كوڭىل بولگەنى ابزال. بۇل جان-جاقتى قالىپتاسقان, مەكتەپ تابالدىرىعىن اتتايتىن وقۋشىعا قاجەتتى داعدىلاردى يگەرگەن, ەڭ باستىسى اتا-اناسىنىڭ ىقپالىنسىز, ءوز بەتىمەن ارەكەت ەتە الاتىن بالانى تاربيەلەۋگە ەداۋىر ۇلكەن سەپتىگىن تيگىزەدى.
جاڭارتىلعان ءبىلىم بەرۋ باعدارلاماسىنىڭ تاعى ءبىر ەرەكشەلىگى بالاعا بەرىلەتىن تاپسىرمالاردىڭ ءسپيرالدى قاعيداتپەن, ياعني «شيىرشىق» ادىسىمەن بەرىلۋىندە بولىپ تۇر. بۇل دەگەنىمىز – وڭايدان كۇردەلىگە قاراي ءجۇرىپ وتىرۋ دەگەن ءسوز. سونىمەن قاتار وسى قاعيداتپەن بەرىلگەندە جىل بويىندا وتكەن تاقىرىپتاردى ۇنەمى قايتالاپ وتىرۋعا دا مۇمكىندىك بەرەدى. مىنەكەي, وسى قاعيدات – زەيىنى ءالى تۇراقتالماعان, ءبىر ورىندا بايىز تاۋىپ وتىرۋدى بىلمەيتىن, تەز جالىعىپ كەتەتىن مەكتەپ جاسىنا دەيىنگى بالالاردى تاربيەلەۋگە, جاڭا جانە قيىنداۋ نارسەنى ۇيرەتۋگە تاپتىرمايتىن باعىت.
جاڭارتىلعان ءبىلىم مازمۇنىنا كوشۋ – جىل سايىن ەمەس, كۇن سايىن وزگەرىستەر ورىن الاتىن, دامىپ وتىرعان تەحنيكا مەن تەحنولوگيانىڭ زامانىندا كەزەك كۇتتىرمەيتىن شەشىم. مۇنداي قىزىقتى دا جاۋاپتى جولدا ارىپتەستەرىمە تاباندىلىق تىلەيمىن!
نۇرقايىم چينحودجاەۆا,
№31 «التىن كىلت» بوبەكجاي-بالاباقشاسىنىڭ ادىسكەرى
قىزىلوردا
