ەسكە سالايىق, مەملەكەت باسشىسى بيىلعى 13 قاراشادا مەملەكەتتىك قىزمەت سالاسىنداعى كەيبىر اكتىگە وزگەرىستەر ەنگىزۋدى كوزدەيتىن جارلىققا قول قويدى.
"وسىلايشا, ەلىمىزدە ساياسي قىزمەتكەرلەردى روتاتسيالاۋ ينستيتۋتى العاش رەت ەنگىزىلدى (بۇرىن روتاتسيا اكىمشىلىك قىزمەتكەرلەرگە عانا قولدانىلعان). ەندى ساياسي قىزمەتكەرلەر اتقاراتىن لاۋازىمىنا تاعايىندالعان كۇننەن باستاپ ءاربىر ءتورت جىل سايىن روتاتسيالاناتىن بولادى", دەپ حابارلايدى ۆەدومستۆو وكىلى.
ءتيىستى مەملەكەتتىك ورگان باسشىسىنىڭ شەشىمى بويىنشا ساياسي قىزمەتشىنىڭ اتقاراتىن لاۋازىمىندا بولۋ مەرزىمى ەكى جىلعا ۇزارتىلۋى مۇمكىن. كەيىننەن ەكى جىلعا ۇزارتۋ پرەزيدەنت جانىنداعى كادر ساياساتى جونىندەگى ۇلتتىق كوميسسيانىڭ شەشىمى بويىنشا عانا مۇمكىن بولادى.
"ساياسي قىزمەتكەرلەردىڭ لاۋازىمدا بولۋىنىڭ رۇقسات ەتىلگەن ەڭ ۇزاق مەرزىمى سەگىز جىلدان اسپايدى. ساياسي قىزمەتكەرلەردى روتاتسيالاۋ ينستيتۋتى 2021 جىلعى 1 قاڭتاردان باستاپ ەنگىزىلەدى", دەلىنگەن حابارلامادا.
سونداي-اق وسى جارلىقپەن "ب" كورپۋسىنىڭ قىزمەتكەرلەرىن روتاتسيالاۋ تارتىبىنە تولىقتىرۋلار ەنگىزىلدى. ماسەلەن, اكىمدىكتەر باسقارمالارىنىڭ باسشىلارىنا وڭىرارالىق روتاتسيالاۋ ەنگىزىلدى (بۇرىن ولاردى روتاتسيالاۋ تەك ءبىر اكىمدىك شەگىندە عانا مۇمكىن بولاتىن). بۇل رەتتە مۇنداي روتاتسيا اكىمدىكتەردە كوماندالىق ورىن اۋىستىرۋعا جول بەرمەۋ ماقساتىندا اگەنتتىكپەن كەلىسىم بويىنشا جۇرگىزىلەدى.
بۇدان بولەك, سوڭعى ءۇش جىلدان كەم ەمەس بەلگىلى ءبىر باسشىلىق لاۋازىمداردى اتقاراتىن, ونىڭ ىشىندە ءارتۇرلى مەملەكەتتىك ورگاندا جۇمىس ىستەيتىن "ب" كورپۋسىنىڭ قىزمەتكەرلەرىن ەرىكتى روتاتسيالاۋ ەنگىزىلدى. مۇنداي روتاتسيا باسقا اكىمشىلىك-اۋماقتىق بىرلىككە عانا مۇمكىن بولادى.
زەينەتكەرلىك جاسقا تولعانعا دەيىن ءۇش جانە ودان از جىل قالعان قىزمەتكەرلەرگە روتاتسيادان باس تارتۋ قۇقىعى بەرىلگەنىن اتاپ وتكەن ءجون.
"روتاتسيانىڭ نەگىزگى ماقساتتارى مەملەكەتتىك ورگاندار قىزمەتىنىڭ تيىمدىلىگىن ارتتىرۋ, سىبايلاس جەمقورلىق قۇقىق بۇزۋشىلىقتاردىڭ الدىن الۋ, سونداي-اق قىزمەتشىلەردىڭ كاسىبي الەۋەتى مەن باسقارۋشىلىق تاجىريبەسىن دامىتۋ جانە ءتيىمدى پايدالانۋ بولىپ تابىلادى", دەدى مەملەكەتتىك قىزمەت ىستەرى اگەنتتىگى.
وسى جارلىقپەن "ب" كورپۋسىنىڭ قىزمەتكەرلەرىن مەملەكەتتىك ورگانداردىڭ ىشىندە اۋىسۋ تارتىبىمەن تاعايىنداۋ مۇمكىندىگى ەنگىزىلدى. سونىمەن مەملەكەتتىك قىزمەتكەرلەر مەملەكەتتىك ورگان ىشىندەگى وزگە دە تەڭ دارەجەلى لاۋازىمعا, سونداي-اق جوعارى تۇرعان لاۋازىمعا وسى مەملەكەتتىك ورگاندا كەمىندە سوڭعى ەكى جىل تومەن تۇرعان لاۋازىمدا ءوتىلى بولعان جاعدايدا اۋىسۋ تارتىبىمەن تاعايىندالۋى مۇمكىن.
بۇل وزگەرىس مەملەكەتتىك قىزمەتشىلەردىڭ مەملەكەتتىك ورگاندار ىشىندە مانساپتىق ىلگەرىلەۋىنە ىقپال ەتەدى.
