كۇرەس تۇرلەرىنەن ەل چەمپيوناتى وتەدى دەگەن حابار الدەقاشان تاراعانىمەن, باسشىلىق تاراپىنان ناقتى جاۋاپ بولعان جوق. سەبەبى, كوروناۆيرۋسقا بايلانىستى ءىرى جارىستار ۇيىمداستىرۋعا ءالى دە تىيىم سالىنعان. فەدەراتسيا وكىلدەرى الماتى قالالىق دەنە شىنىقتىرۋ جانە سپورت باسقارماسىمەن ءبىراز ۋاقىت كەلىسسوز جۇرگىزگەننەن كەيىن بالۋاندار باسەكەسىنىڭ بيىل ۇيىمداستىرىلاتىنى رەسمي تۇردە حابارلاندى.
الماتىداعى تۋرنيرگە كورەمەندەر قاتىستىرىلمايدى. سانيتارلىق-ەپيدەميولوگيالىق تالاپتاردى ساقتاپ, ءبىر جەردە جۇزدەن اسا ادامنىڭ شوعىرلانۋىنا مۇمكىندىك بەرمەۋ ءۇشىن بۇل قادامنىڭ دۇرىس ەكەنىن انىق.
سونداي-اق, ءار وبلىستان 15 سپورتشى, 2 جاتتىقتىرۋشى, 2 تورەشى جانە ءبىر وكىلدىڭ قاتىسۋىنا رۇقسات بار.
جارىسقا كەلۋشىلەر (سپورتشىلار, باپكەرلەر, وكىلدەر, تورەشىلەر) تۋرنيرگە قاتىساردان 1-3 كۇن بۇرىن ارالىعىندا پتر تەست تاپسىرۋعا مىندەتتى. پتر تەست تەرىس ناتيجە كورسەتكەندە عانا, بالۋاندار ەل چەمپيوناتىنا جىبەرىلەدى.
سونىمەن قاتار, جارىسقا قاتىسۋشىلار ءوز ايماقتارىندا مەديتسينالىق تەكسەرۋدەن ءوتىپ, دەنساۋلىعىندا ەشقانداي اقاۋ جوقتىعىن دالەلدەيتىن انىقتامانى مانداتتىق كوميسسياعا تاپسىرۋى ءتيىس.
ءار كوماندادا سپورتشىلار مەن باسقا دا وكىلدەردىڭ دەنساۋلىق جاعدايى تۋرالى ۇيىمداستىرۋشىلارعا حابارلاپ وتىراتىن دارىگەردىڭ بولۋى - باستى تالاپتاردىڭ ءبىرى.
قازىرگى احۋالعا بايلانىستى قازاقستان چەمپيوناتىنىڭ اشىلۋ جانە جابىلۋ سالتاناتى وتكىزىلمەيدى. بالۋاندار مەن جاتتىقتىرۋشىلاردىڭ ءباسپاسوز ءماسليحاتىن ۇيىمداستىرۋىنا, سۇحبات بەرۋىنە تىيىم سالىنادى. تاعى ءبىر ايتا كەتەرلىگى, بەلدەسۋگە شىققان بالۋانداردىڭ ءبىر-بىرىمەن قول الىسۋىنا رۇقسات جوق جانە ماراپاتتاۋ راسىمىندە الەۋمەتتىك ارا-قاشىقتىقتى ساقتاۋى قاتاڭ قاداعالانادى. باسەكەنى قابىلدايتىن سپورتتىق نىساننىڭ بارلىق تالاپتارعا ساي بولۋىن ۇيىمداستىرۋشىلار باستى نازاردا ۇستاماق.
ۇزاق ۋاقىتتان بەرى بوزكىلەمگە شىقپاعان بالۋاندار قاۋىمى بۇل دودانى اسىعا كۇتۋدە. گرەك-ريم كۇرەسىنەن كوماندا باس باپكەرى باقتيار بايسەيىتوۆتىڭ ايتۋىنشا, تۋرنيرگە قۇراما ۇزدىكتەرى تەگىس قاتىسادى.
«قازاقستان چەمپيوناتى الداعى ماۋسىم قارساڭىندا ۇلتتىق قۇرامانى جاساقتاۋ ءۇشىن تاپتىرماس دودا. ەل بىرىنشىلىگى بارىسىندا جاڭا ەسىمدەر شىعىپ جاتسا, بىردەن باس كومانداعا شاقىرتۋ الادى. سەبەبى, وسى دودادا ۇزدىك اتانعان جاستار ءبىزدىڭ بولاشاعىمىز بولماق. وزدەرىڭىز بىلەتىندەي, بۇگىندە ۇلتتىق قۇراما ساپىنداعى بالۋانداردىڭ باسىم بولىگى وزدەرىنىڭ سوڭعى وليمپيادالىق كەزەڭدەرىندە تەر توگىپ ءجۇر. ماسەلەن, نۇرماحان تىناليەۆ, المات كەبىسپاەۆ, دەمەۋ جادىراەۆ, اسحات دىلمۇحامەدوۆ سىندى تىسقاققان بوزكىلەم شەبەرلەرى ءۇشىن بۇل سوڭعى وليمپيادالىق كەزەڭ بولۋى ىقتيمال. سوندىقتان, بىزگە بۇگىنگى باتىرلاردىڭ ورنىن باساتىن ءىزباسارلار كەرەك", - دەيدى باس باپكەر.
ايەلدەر كۇرەسىنەن كوماندا باس باپكەرى نۇرلان امانقوسوۆ تا ەل بىرىنشىلىگىندە جاس سپورتشىلاردىڭ كوزگە تۇسەتىنىن سەنىمدى.
"قازاقستان چەمپيوناتىنا ۇلتتىق قۇراما ساپىنان قاتىساتىندار ءتىزىمى جارىس جاقىنداعاندا بەلگىلى بولادى. قازاقستان چەمپيوناتى ناتيجەسىندە جاڭا ەسىمدەر شىقسا ۇلتتىق قۇراماعا شاقىرامىز. جەڭىمپاز بەن جۇلدەگەر اتانعان سپورتشىلار قاتارىنان جاس بالۋاندار كەزدەسەدى دەپ ويلايمىن. وليمپيادا ويىندارىنا دەيىن قازىرگى قۇرامنىڭ وزگەرۋ-وزگەرمەۋى سپورتشىلارعا تىكەلەي بايلانىستى. ەگەر الەمدىك دودالاردا وزدەرىن جاقسى كورسەتىپ, جوعارى ناتيجەگە قول جەتكىزىپ جۇرسە, ارينە, قۇراماداعى ورىندارى ساقتالادى. ال ەگەر جاڭا ەسىمدەر شىعىپ, جاس بالۋاندار حالىقارالىق ارەنادا ەل نامىسىن ابىرويمەن قورعاپ جۇرسە, وندا سولارعا مۇمكىندىك بەرىلەدى. وليمپياداعا دا ءدال سولاي, كىم دايىن - سول بارادى», - دەيدى باپكەر.
ەركىن كۇرەستەن ەكى دۇركىن ازيا چەمپيونى دانيار قايسانوۆ بولسا, ۇزاق ءۇزىلىستىڭ بالۋاندار ءۇشىن وڭاي بولماعانىن ايتادى.
ء«بىز سەگىز ايدان بەرى ەشقانداي جارىسقا قاتىسپادىق. بۇل كاسىبي سپورتشى ءۇشىن ۇلكەن ءۇزىلىس. قاراشا ايىندا ەل چەمپيوناتى ۇيىمداستىرىلادى دەگەن حابار الدىق. شىنى كەرەك, قۋانىشتى جايت. بۇگىنگە دەيىن كوپتەگەن ەلدەر ىشكى بىرىنشىلىگىن وتكىزىپ تاستادى. سوندىقتان, بالۋانداردىڭ بارلىعى جارىس وتەتىن كۇندى اسىعا كۇتىپ ءجۇر», - دەيدى ول.
كۇرەس تۇرلەرىنەن 2020 جىلعى قازاقستان چەمپيوناتى بارلىق سانيتارلىق نورمالاردى جانە UWW بەكىتكەن ەرەجەلەردى ساقتاۋ ارقىلى وتەدى. تۋرنير 26 قاراشادا مارەسىنە جەتەدى.
