قويىلىم ەڭ الدىمەن كورەرمەندەردىڭ وزىنە ءشامشى اندەرىن ورىنداتۋدان باستالدى. ال ءدۇيىم قازاق دالاسىندا, اسىرەسە ەرەسەك, ەگدە قاۋىمنىڭ اراسىندا ءشامشىنىڭ ءانىن شىرقامايتىن, قۇلاققا سىڭگەن تانىس اۋەن ەستىلگەندە, توسىرقاپ تۇرىپ قالاتىن ادام بار ما, ءسىرا؟ سەزىم قىلىن شەرتىپ, جۇرەكتى ءلۇپىل قاققىزاتىن ساعىنىشقا تولى ليريكالىق اندەردىڭ ءبىر-ءبىر شۋماعىن ءار كورەرمەن جۇرگىزۋشى ارتىسپەن بىرگە شابىتتانا شىرقاپ, شالقىعان كوڭىل تەك شىمىلدىق اشىلعاندا عانا سابىر تاۋىپ, باسىلعانداي بولدى. «اق بانتيك», «قايىقتا», «انا تۋرالى جىر», «ارىس جاعاسىندا», «كەشىكپەي كەلەم دەپ ەڭ», ء«ومىر-وزەن» – كومپوزيتوردىڭ قاي ءانىنىڭ دە كومپوزيتسيالىق قۇرىلىمى, تاقىرىبى ساحنالىق قويىلىمعا ءوز-وزىنەن سۇرانىپ تۇرعانداي. رەجيسسەر ەركەبۇلان قابدىل ءشامشىنىڭ حالىق اراسىنا كەڭ تاراعان اندەرىنىڭ مازمۇنىن ءبىر ارناعا توعىستىرىپ, قوس عاشىقتىڭ ماحاببات حيكاياسىنا نەگىزدەگەن. ال سپەكتاكلدىڭ سۋرەتشىسى – التىناي ءجۇسىپالى.
قۋىرشاق تەاترىنىڭ اياداي زالى ءاپ-ساتتە ءان پاديشاسىنىڭ ادەمى الەمىنە اينالىپ شىعا كەلدى. رەجيسسەر ە.قابدىلدىڭ جاس كورەرمەنگە ءشامشى اندەرىنىڭ ومىرشەڭدىگىن, تالانت تابيعاتىنا جاسىرىنعان سىردى تۇسىندىرگىسى كەلگەنىن, كومپوزيتور اندەرىن ناسيحاتتاۋدى ماقسات تۇتقانىن اڭعارماۋ مۇمكىن ەمەس. قازاق ونەرىنىڭ تۇتاس ءبىر ءداۋىرىن وركەندەتۋگە ايىرىقشا ۇلەسىن قوسقان ءان سەركەسىنىڭ مۋزىكالىق مۇراسى بۇگىنگى جاس بالالارعا جات بولماي, كەرىسىنشە, جۇرەگىنەن ورىن تاۋىپ جاقىنداي ءتۇسۋى ءۇشىن ساحنالىق تاسىلدەردى كەڭىنەن پايدالانعان. ءان تابيعاتىنا ساي, وبرازعا لايىق, وتە ءساندى تىگىلگەن قۋىرشاقتاردىڭ قاتىسۋىمەن ورىندالاتىن ءاربىر ءان جاندى اسەر تۋعىزادى. ۇلتتىق قۇنارى باسىم, ءان وزەگىنەن ۇشىپ شىققان اناعا, دوسقا, تۋعان جەرگە دەگەن سۇيىسپەنشىلىك, مەيىرىم, سىيلاستىق, ىزگىلىك سەزىمى بالا بويىندا جاڭادان قالىپتاسىپ كەلە جاتقان ادامگەرشىلىك قاسيەتتەرمەن ۇشتاسىپ, وتانشىل ازامات بولىپ ءومىر سۇرۋگە جەتەلەيتىنى ءسوزسىز. «ەڭ باستى ماقساتىمىز – ءشامشى اندەرىن وسكەلەڭ ۇرپاققا ناسيحاتتاپ, ۇلتتىق قۇندىلىقتاردى دارىپتەۋ. ءتول ونەرىن تانىپ وسكەن بالانىڭ كەلەشەكتە ءوز ەلى مەن جەرىنە دەگەن ماحابباتى مول بولادى», دەيدى ەركەبۇلان قابدىل.
بالالارعا ءشامشى قالداياقوۆتىڭ اندەرىن تانىستىرۋ قويىلىمى ساحناداعى ءساتتى قادامنىڭ ءبىرى. سپەكتاكلدە مادەنيەت سالاسىنىڭ ۇزدىگى ماقسات كامالوۆ جانە «ساحناگەر» ۇلتتىق تەاتر بايقاۋى ء«ۇمىت» نوميناتسياسىنىڭ يەگەرى اراي ساقتاعانوۆا ەكى جاستىڭ ماحابباتى لينياسىندا ويناسا, ارايلىم بايىربەكوۆا, رۋسلان ءابۋ, شوقان قۇلنازاروۆ, باقىتجان كايۋوۆ, اسەم چايالكانوۆا, سالتانات تورەباي, عالىم امانگەلدى ۇلى, گۇلبارشىن ءونىمباي سىندى جاس ارتىستەر جارتى عاسىر بويى قالانى دا, دالانى دا تەربەتىپ كەلە جاتقان اسەم اندەردى تامىلجىتا ورىندادى.
ايتا كەتكەن ءجون, قۋىرشاق تەاترى بۇعان دەيىن اقىن مۇقاعالي ماقاتاەۆتىڭ شىعارماشىلىعىن ارقاۋ ەتكەن «مەن دەپ ويلا...» اتتى قويىلىمدى ساحنالاعان. قازاقتىڭ تاعى ءبىر ونەر يەسى ءشامشى قالداياقوۆقا ارنالعان كەزەكتى قويىلىم – وسى تۋىندىنىڭ زاڭدى جالعاسى.
الماتى
