سىبايلاس جەمقورلىققا قارسى قىزمەتتىڭ باسشىسى «سق-فارماتسيا» جشس وپەراتسيالىق قويماسىنا باردى. قويما وبلىستىڭ ەمدەۋ مەكەمەلەرى مەن ۇيىمدارىنىڭ نۇر-سۇلتان قالاسىنداعى حابتان دارىلىك پرەپاراتتار مەن مەديتسينالىق بۇيىمداردى جەدەل الۋ قاعيداتى بويىنشا ۇيىمداستىرىلعان.
ءتۇرلى اۋرۋلاردى ستاتسيونارلىق جانە امبۋلاتوريالىق ەمدەۋدى قامتاماسىز ەتۋ اياسىندا مەديتسينالىق مەكەمەلەردىڭ ءداستۇرلى وتىنىمدەرىنە دە, كوروناۆيرۋستىق ينفەكتسيانى ەمدەۋگە قاجەتتى قاراجاتقا تاپسىرىستارعا دا قىزمەت كورسەتىلەدى.
«اكىمدىك ءدارى-دارمەكتەر, دارىگەرلەردى قورعاۋ قۇرالدارى, ونىڭ ىشىندە گۋمانيتارلىق كومەك اياسىنداعى اشىقتىققا نازار اۋدارا وتىرىپ, قوعامدىق ۇيىمداردى بەلسەندى تۇردە تارتۋدا. پاندەميا ءاربىر قازاقستاندىققا اسەر ەتتى. سوندىقتان بارماق باستى, كوز قىستى جۇمىس بولماۋى ءتيىس. ءاربىر ءدارى-دارمەك الاياقتاردىڭ تابىس كوزىنە اينالماي, تۇتىنۋشىسىنا جەتۋى وتە ماڭىزدى», - دەپ باسا ايتتى اليك شپەكباەۆ.
ايتا كەتەيىك, بۇعان دەيىن بىرقاتار وڭىرلەردە مونيتورينگتىك توپتار ءدارى-دارمەكتەر مەن قورعانىس قۇرالدارىنىڭ ازايمايتىن قورىن قالىپتاستىرۋداعى ماسەلەلەر تۋرالى مالىمدەگەن بولاتىن. «سق-فارماتسيا» قوستاناي فيليالىنىڭ وكىلدەرى بارلىق لوگيستيكالىق قاتەلەر ەسكەرىلگەنىن جانە بۇگىنگى كۇنى وڭىردە قاجەتتى قور بار ەكەنىن ايتتى.
جەرگىلىكتى اتقارۋشى ورگانداردىڭ وكىلدەرى حابارلاعانداي, كوروناۆيرۋستىق ينفەكتسيانى, پنەۆمونيانى جانە جرۆي ەمدەۋگە باعىتتالعان دارىلىك زاتتارمەن ازاماتتاردى قامتاماسىز ەتۋ ماقساتىندا ءدارىحانا جەلىلەرى مەن فارماتسەۆتيكالىق فيرمالاردىڭ ديستريبيۋتورلارىنا 538 ملن.تەڭگە ءبولىندى.
وسىعان بايلانىستى, اگەنتتىك توراعاسى پاندەميانىڭ ەكىنشى تولقىنىنا دايىندىق بارىسىندا وبلىستىڭ ماتەريالدىق قورى ەسەبىنەن ساتىپ الىنعان ءدارى-دارمەكتەردى ساتاتىن «تسۆەتنايا» ءدارىحانا جەلىسىن ارالادى.
